Nyuma yuko Amerika ibwiwe ko yaterwa igisasu aho ari hose, iri gutakambira isi yose gufatira mbarigo gihugu cya Koreya ya Ruguru

Nyuma yuko ku munsi w’ejo, Koreya ya Ruguru yongeye kugerageza igisasu cya kirimbuzi ikanishongora kuri Amerika ivuga ko gishobora kugera aho ariho hose muri iki gihugu, byateye Leta Zunze Ubumwe za Amerika zisaba zinginga ibihugu byose guhagarika imigenderanire mu bya dipolomasiya n’ubucuruzi bigirana n’igihugu cya Koreya ya Ruguru.

Ibi byasabwe kuri uyu wa gatatu na Nikki Haley uhagarariye Amerika mu ishyirahamwe mpuzamahanga rya ONU, mu nama yabaye igitaraganya y’akanama ka ONU gashinzwe amahoro n’umutekano ku isi nyuma yo kubona ko igihugu cya Koreya ya Ruguru gikomeje kuvunira ibiti mu matwi kigakomeza kugerageza ibitwaro bya kirimbuzi kirengagije amabwiriza cyahawe na ONU.

Ku munsi w’ejo tariki ya 29 Ugushyingo 2017, nibwo Koreya ya Ruguru yongeye kugerageza igisasu cya kirimbuzi. Nyuma y’ibi Amerika yamenyesheje iki gihugu ko nubwo cyahisemo inzira y’intambara, mu gihe byaba bibaye ngombwa ko haba intambara, izasambura iki gihugu cyose ku buryo bukomeye nkuko idasiba kubivuga.

PNG - 509.4 ko
Iki gisasu Koreya ya Ruguru yagerageje bivugwa ko gishobora kugera aho ari hose muri Amerika


Nikki Haley, yamaganiye kure igihugu cy’u Bushinwa agisaba guhagarika guha peteroli Leta ya Koreya ya Ruguru.

U Burusiya nabwo bubicishije ku ntumwa yabwo muri ONU, bwemeza ko Koreya ya Ruguru yakoze igikorwa cyo gushotorana. Iki gihugu cyongeyeho ko nubwo bimeze gutya, gukoresha ingufu za gisirikare atari wo muti w’iki kibazo.

Zimwe mu ngamba zatuma iki gihugu gihagarika ibi bikorwa bya Nikleyeri, u Bushinwa n’u Burusiya byasabye Leta Zunze Ubumwe za Amerika guhagarika imyitozo ya gisirikare gikorana na Koreya y’Epfo muri ako karere.

Kuri uyu wa gatatu nibwo uhagarariye igihugu cy’u Bushinwa yongeye gutanga iyi ngamba mu gihe Amerika nayo yabyamaganiye kure.

Daniel MUKESHIMANA/Umubavu.com



Tanga igitekerezo kuri iyi nkuru



Igitekerezo