Nyuma yo kurahira Odinga arasaba ko amatora yasubirwamo

Umuyobozi w’Impuzamashyaka atavuga rumwe na Leta (NASA) muri Kenya, Raila Odinga yasabye ko amatora y’Umukuru w’Igihugu yakongera agasubirwamo. Ibi abitangaje nyuma y’icyumweru arahiye nka Perezida w’abaturage ba Kenya.

Aganira na BBC, Odinga yahakanye kuba ari gucura umugambi wo guhirika ku butegetsi Uhuru Kenyatta, wemejwe n’Urukiko rw’Ikirenga ko ariwe watsinze amatora yasubiwemo mu Ukwakira 2017.

Odinga wabaye nk’uwitaza ibijyanye no gushyiraho Guverinoma ye bwite, yakomeje avuga ko atemera Kenyatta nka Perezida wa Kenya kuko yagiyeho mu buryo bunyuranyije n’ugushaka kw’abaturage.

Ibi abitangaje mu gihe bamwe mu bayobozi muri NASA barimo David Ndii, bari baherutse gutangaza ko bagiye gushyiraho itsinda rizafasha Odinga gushyira mu bikorwa inshingano za nka Perezida w’abaturage.

Ndii yavuze ko iri tsinda rizatangazwa mu nama ya NASA iteganyijwe mu mpera z’uku kwezi, igikorwa kizabanzirizwa no kuzenguruka intara zitandukanye z’igihugu.

NASA ivuga ko ibi byose bizaba mu gihe igitereje ko muri Kanama 2018 haba andi matora anyuze mu mucyo kandi yubahirije amategeko. Ni mu gihe Leta ya Kenya yo ikomeje kugaragaza ko ibiri gukorwa na NASA ari ubugambanyi kuko binyuranyije n’Itegeko Nshinga ry’iki gihugu.

Odinga arasaba ko amatora asubirwamo mu gihe n’ubundi mu mwaka ushize aribwo Urukiko Rukuru rwa Kenya ruyobowe n’umucamanza, David Maraga rwatesheje agaciro ibyari byavuye mu matora ya mbere ruvuga ko yabayemo uburiganya.

Aya matora yari yabanje, Komisiyo y’amatora yari yemeje ko Uhuru Kenyatta yatsinze Raila Odinga ku majwi 54,27%, mu gihe Odinga yari yagize 44,74%.

Nyuma amatora yaje gusubirwamo tariki ya 26 Ukwakira 2017 n’ubundi birangira Uhuru Kenyatta ari we wegukanye intsinzi n’amajwi arenga 98% mu gihe Odinga we yanze kuyitabira avuga ko nta mucyo uzayaranga.

Daniel MUKESHIMANA/Umubavu.com



Tanga igitekerezo kuri iyi nkuru



Igitekerezo