Nyuma y’ubwegure bwa Mugabe, Emmerson Mnangagwa agiye kurahirira kuyobora igihugu

Nyuma yuko umukambwe Robert Mugabe w’imyaka 93 y’amavuko wari umaze imyaka 37 yose ku butegetsi yemeye bidasubirwaho kwegura ku mwanya w’umukuru w’igihugu cya Zimbabwe, kuri uyu wa gatanu tariki ya 24 Ugushyingo 2017 bitegenyijwe ko uwari Visi Perezida, Emmerson Mnangagwa arahirira kuba Perezida.

Nyuma y’intambara ya Politiki yari imaze iminsi mu gihugu cya Zimbabwe igamije gushaka uburyo Robert Mugabe yakwegura ku butegetsi. Ibi byasabye uyu mukambwe kubitekerezaho nyuma yuko byari biteganyijwe ko Inteko Inshingamategeko imitwe yombi ya Zimbabwe itangira ibikorwa byo kumweguza.

Ni kuri uyu mugoroba wo ku wa 21 Ugushyingo 2017, Umukambwe Robert Mugabe yafashe icyemezo cyo kurekura ubutegetsi yari amazeho imyaka isaga 37 yose.

PNG - 894.7 ko
Robert Mugabe wemeye bidasubirwaho kurekura ubutegetsi


Emmerson Mnangagwa w’imyaka 75 y’amavuko ugiye kurahirira kuyobora igihugu cya Zimbabwe mu gihe cy’inzibacyuho ubwo hazaba hategurwa amatora, yari Visi Perezida w’igihugu aza kwirukanwa ku mirimo ye na Mugabe agamije gushakira inzira umugore we Grace Mugabe kugira ngo azabe ari we umusimbura ku butegetsi.

PNG - 937.7 ko
Emmerson Mnangagwa ugiye kurahirira kuyobora Zimbabwe


Uyu ni umugambi utarahiriye umukambwe Mugabe kuko nyuma y’izi mpinduka byahise bituma igisirikari kirya karungu gifata icyemezo cyo gushaka uburyo cyeguza uyu musaza kuko cyabonaga ko ntaho igihugu cyerekeza dore ko n’ibibazo by’ubukungu byari bimeze nabi.

Nyuma y’ubwegure bwa Mugabe abaturage ba Zimbabwe bose baraye mu mihanda bishimira ko bigobotoye ingoma bitaga iy’igitugu bavuga ko ntacyo yabamariye nyamara hakaba n’abavuga ko yabakoreye byinshi birimo kubagobotora ku ngoma y’abakoloni itari iboroheye na gato.

Emmerson Mnangagwa bigaragara ko akunzwe n’abaturage benshi, nyuma yo kumva ubwegure bwa Mugabe nawe yamwenyuye cyane ko yari azi ko ashyigikiwe n’igisirikari ku kuba ari we wahita ayobora igihugu.

Emmerson Mnangagwa yagize ati “ abaturage ba Zimbabwe bigaraganmbije mu mahoro nta bwicanyi bateje kuko icyo bari bagamije ari uko Mugabe yegura”.

Emmerson Mnangagwa ugiye kurahirira kuyobora igihugu cya Zimbabwe, yavutse ku itariki ya 15 Nzeli 1942. Yabaye Visi Perezida wa Zimbabwe kuva mu mwaka wa 2014 ku itariki ya 12 Ukuboza kugeza mu mwaka wa 2017 ku itariki ya 6 Ugushyingo 2017 ubwo yirukanwaga ku mirimo ye na MUgabe.

Robert Mugabe wavutse ku itariki ya 21 Gashyantare 192, yagiye ku butegetsi ku itariki ya 31 Ukuboza mu mwaka wa 1987 akaba yeguye ku mirimo ye yo kuba umukuru w’igihu ku itariki ya 21 November 2017 aho yari amaze imyaka isaga 37 yose ku butegetsi.

Daniel MUKESHIMANA/Umubavu.com



Tanga igitekerezo kuri iyi nkuru



Igitekerezo
NAYITURIKI PACIFIQUE Kuya 22-11-2017

Byari bikwiye kuko hari byinshi yaramajije kugeza kuri iki gihugu Emmerson akomereze aho Mugabe yaragereje kandi akazi keza