Nyuma y’ibiganiro hagati y’u Rwanda na Uganda umunyarwanda yongeye gushimutirwa I Kampala

Umunyarwanda witwa Iyakaremye Claude akomeje gushakishwa n’inzego z’umutekano z’igihugu cya Uganda nyuma yuko ashimutiwe mu mujyi wa Kampala mu ijoro ryo ku Cyumweru tariki ya 25 Werurwe 2018 n’abantu bataramenyekana.

Aya makuru y’ishimutwa ry’uyu mugabo yatanzwe n’umugore wa Iyakaremye witwa Beatrice Nyirahabimana, ashimangira ko yatwawe mu ijoro ryo ku Cyumweru n’abantu atabashije kumenya, bamujyanye mu modoka yo mu bwoko bwa Toyota ifite purake UAJ 921G bikekwa ko ari iy’inzego zishinzwe umutekano z’iki gihugu.

Chimpreports banditse iyi nkuru bavuga ko Beatrice Nyirahabimana umugore wa Iyakaremye yatangaje ko umugabo we yafashwe avanwe mu modoka isaanzwe itwara abagenzi ya Volcano maze yinjizwa ku gahato muri iyo Toyota bigaragara ko ari iy’inzego zishinzwe umutekano muri iki gihugu.

Yagize ati “Nahise ntabaza polisi ikorera kuri sitasiyo yari hafi aho mu mujyi wa Kampala mu gitondo cyo ku wa Mbere, maze bambwira gushaka uhagarariye urwego rw’ubutasi [CMI] ngo abe ariwe ngezaho icyo kibazo gikurikiranwe.”

Umuvugizi wa polisi mu mujyi wa Kampala Emillian Kayima yabwiye Chimpreports ko ikibazo cyagejejwe kubo kireba, kugeza ubu hakaba hari gukorwa iperereza ryimbitse kugira ngo hamenyekane ababa barashimuse uyu mugabo w’umunyarwanda.

Iri shimutwa rya Claude Iyakaremye ryabaye nyuma y’amasaha macye Perezida wa Repubulika y’u Rwanda agiranye ibiganiro na Perezida wa Uganda Kaguta Museveni, byibanze ku mutekano mucye w’abanyarwanda baba muri Uganda, aho bakorerwa ibikorwa by’ishimutwa, iy’icarubozo n’urugomo rwa hato na hato maze bemeranya ko bigiye gushakirwa umuti wihuse.

Kuri iki kibazo cy’abanyarwanda bakorerwa iyicarubozo muri Uganda bashinjwa ko ari intasi, Museveni yavuze ko abakuru b’ibihugu byombi bemeranyije ko inzego zishinzwe ubutasi zagirana imikoranire ya bugufi kugira ngo bajye babona ibimenyetso bihagije kuri buri kibazo.

Yagize ati “Ntabwo ari ku rwego rw’ubutasi gusa ahubwo no mu bindi bijyanye n’iterambere. Birasa n’aho abantu badakoresha izi telefoni, telefoni zirahari. Mu 1996, Uganda yari ifite telefoni ibihumbi 26 ziri ku murongo, uyu munsi dufite miliyoni 23 ziri ku murongo, ntabwo nzi umubare w’iziri mu Rwanda ariko abantu ntibazikoresha ; urabona minisitiri ugowe no guhamagara undi muminisitiri mu Rwanda ; ndakeka dukeneye amasomo mu bijyanye no gutelefona kugira ngo ibintu byorohe.”

Perezida Museveni yakomeje avuga ko mu gihe abantu bakoresheje itumanaho uko bikwiye, byazajya byoroha ko niba hari uwakoze ikintu ku butaka ubu n’ubu, abo ku rundi ruhande bahita bakimenya.

Yakomeje avuga ko muri Mutarama ubwo yahuraga na Perezida Kagame, yamuhaye ibimenyetso bifatika by’uko abanyarwanda bahohoterwa ; hanyuma arabikurikirana.
Perezida Kagame nawe yashimangiye ko hakwiye kujya hagaragazwa ibimenyetso bya nyabyo kugira ngo hafatwe imyanzuro iboneye kuri iki kibazo.

PNG - 640.2 ko
Uyu ni Claude Iyakaremye washimutiwe i Kampala muri Uganda



Tanga igitekerezo kuri iyi nkuru



Igitekerezo