Ntawe nzarenganya ngo ntabwo yanyise ‘Nyakubahwa’- Perezida Kagame

Ubwo yasozaga ku mugaragaro inama y’igihugu y’Umushyikirano yari imaze iminsi ibiri ibera muri Kigali Convention Center, Perezida wa Repubulika y’u Rwanda, Paul Kagame yavuze ko kubahiriza igihe bikwiye kuba umuco uranga abanyarwanda mu rwego rwo kwirinda gutinda mu magambo aho kujya ku bikorwa, avuga ko aho kugira ngo abantu bajye bafata umwanya batinda mu gushima no kwita umukuru w’igihugu Nyakubahwa ahubwo bajya bashyira ibikorwa imbere.

Ibi Perezida Kagame yabigarutseho kuri uyu wa Kabiri tariki 19 Ukuboza 2017, ubwo yasozaga ku mugaragaro inama y’Igihugu y’Umushyikiramo yabaga ku nshuro yayo ya 15, aho abanyarwanda bari hirya no hino mu gihugu bari bashyiriweho uburyo bwo gukurikirana no kugira uruhare muri iyi nama binyuze mu buryo bw’ikoranabuhanga.

Mu ijambo rye Perezida Kagame yagarutse ku myumvire n’imtekerereze yagakwiye kuranga Abanyarwanda ari nabyo bifasha mu kwihutisha iterambere cyane ko rihera mu mitekerereze, anasaba kwimakaza indangagaciro yo guharanira inyungu rusange.

Yagize ati “Nk’uko bikunze kuvugwa akenshi gutera imbere, ubukire, aho bihera ni mu mitwe yacu, gutekereza ibyo twumva n’ibyo dushaka gukora ntabwo biva ahandi ntabwo ari mu butaka ni mu mitwe yacu bikagera aho handi, niyo mpamvu muri izo ndangagaciro kugira imitekerereze aricyo cy’ingenzi.”

Yunzemo ati “Ibyo dukora byose, ibyo dushaka gushyira mu bikorwa tuvanye mu bitekerezo bizima, biganisha mu gukorera Abanyarwanda bose. Iyi ndangagaciro yo gukora uganisha ku gukorera abanyarwanda ikubiyemo ingingo zimwe navuga [….] Iyo ukorera abantu, gukorera abanyarwanda ugomba kubumva kuko nawe iyo urimo ubabwira ubasaba ko bagutega amatwi.”

Yakomeje agira ati “Icya kabiri ni imikorere irangwa no kutemera ibijyanye na ruswa, kudaha abantu agaciro kabo, bityo ukumva ko bariya bantu nta kiguzi kigombwa aho ngaho. Icyo gihe bivuze ko ari ugushaka umwanya wo kugira ngo dukore iby’inyungu zacu ariko tuganisha ku nyungu z’igihugu cyacu tunakoresha umutungo w’igihugu cyacu neza.”

Perezida Kagame kandi yagarutse ku kintu cyo kubaha nk’umuco w’abanyarwanda avuga ko nk’uko amateka y’igihugu abigena buri munyarwanda akwiye kuzamura uburyo yubaha, cyane cyane ibijyanye no kubaha abakobwa n’abategarugore uko bikwiye.

Yagize ati “Ntabwo mu muryango habaho ababeraho gukubitwa, ndetse gukubitwa nta n’impamvu usibye ko gushaka impamvu ukubitira umuntu binagoye ariko iyo wageze aho ukubita umuntu ntabwo ari byo ngira ngo mu Rwanda twari tumaze gutera intambwe yo kwishimira ari abagore ari abagore ariko by’umwihariko twubahe icyo gice cy’abanyarwanda dukunze kwikoreza uwo muzigo.”

Perezida Kagame asoza impanuro yageneye abanyarwanda bamaze iminsi ibiri bakurikiranye inama y’Umushyikirano, yagarutse ku muco wo gukoresha neza igihe avuga ko n’ubwo hari byinshi bigomba guhinduka ariko hakwiye kubaho umuco wo kugendera ku gihe mubyo abanyarwanda bakora aho kwirirwa mu gushima ahubwo bagashyira ibikorwa imbere.

Ati “Ntabwo twabigira kamere yacu ngo abe ariko dukora ! Buriya twaba tworoheje ibintu kandi birashoboka. Buriya ibyo kujya mu gushimira (…) Nyakubahwa, nyakubwaha njyewe rwose ntawe nzarenganya ngo ntiyanyise nyakubahwa kuko twarayivuze twararushye.”

Daniel MUKESHIMANA/Umubavu.com



Tanga igitekerezo kuri iyi nkuru



Igitekerezo