Ntabwo abayobozi baberaho kwireba-Perezida Kagame

Kuri uyu wa Gatatu tariki ya 28 Werurwe 2018 i Kigali kuri petit sitade, ubwo yitabiraga umuhango wo gutangiza ku mugaragaro umwiherero w’abayobozi b’inzego z’ibanze, Perezida Kagame yabasabye kwita ku mibereho myiza y’abayoborwa, kuko aribyo bizabaha umurongo mwiza wo kwiteza imbere nk’abayobozi.

Perezida Kagame arasaba abayobozi bo mu nzego z’ibanze mbere na mbere kubanza gutekereza ku mibereho yabo bayobora, mbere yo gutekereza ku buzima bwabo bwite.

Ati “Abayobozi tugomba gutekereza uko dukorera abaturage bacu. Ntabwo abayobozi baberaho kwireba. Iyo uri umuyobozi, kugira ngo ubeho neza n’abawe babeho neza ugomba kuba utekereza abandi uko babayeho, n’uko babaho neza”.

Akomeza abasaba guhagarara neza mu nshingano, bike igihugu gifite bikabyazwa umusaruro, by’umwihariko nk’Abanyarwanda bose bagahora banatekereza ku buryo nta we ugomba kubuza igihugu umudendezo.

Ati “Nk’Abanyarwanda tugomba guhora dutekereza uburyo bwinshi butandukanye bw’ukuntu igihugu cyacu ntawakibuza ubuhumekero,.. Tugomba guhora dutekereza kandi dukora ku buryo budasanzwe. Dukoze nk’uko abadafite ibibazo nk’ibyacu bakora, ntabwo twaba dukora neza,… Buri wese muri twe agomba guhora atekereza uruhare rwe, kandi akumva ko arufite”.

Dushoboye kunoza imikorere yacu, byadufasha kugera kubyo twifuza. Iyi niyo ntego y’uyu Mwiherero. Nk’u Rwanda, kubera aho dutuye nk’igihugu kidakora ku nyanja, akenshi hari ubwo uko tugera kubyo twifuza bigenwa n’uko ibintu bimeze mu baturanyi”.

Arasaba abayobozi gukorana, bakuzuzanya

Perezida Kagame yabwiye aba bayobozi bari mu mwiherero ko bikwiye ko bajya bakorana mu nzego barimo, bakuzuzanya, bagahanahana amakuru, ko ibyo bizaborohereza mu mikorere, bikaba n’inyungu ku gihugu.

Ati “Gukorana na mugenzi wawe, kuvugana n’abo dukorana bo mu zindi nzego, kuzuzanya no kujya inama bigomba kuba umuco, ntiduhore tubyibutswa. Ibi bizana inyungu kuri twese no ku gihugu cyacu,… hari nubwo usanga hari n’abashinzwe ibisa nibyo twaganiriye ariko hakabura guhuza ibikorwa no kuvugana kugira ngo ibintu bishyirwe mu ngiro. Umuntu aribaza ati ‘Habuze iki ?Tugomba kwirinda guhora duhangana n’ibibazo twitera, tugahangana n’ibindi byinshi bihari kandi dufite inshingano yo gukemura”.

Akomeza agira ati “Tugomba kurwana intambara yo kurwanya ubukene, abana bacu ntibagire imirire mibi, abaturage bacu be kurwara amavunja. Tureke umuco wo kwikomeza no kwiremereza, dufatanye n’abaturage turwanye ubukene twese hamwe. Mureke duhindure imikorere, umwanya tumara mu biro n’uwo tumara tujya mu nama, tuwumare tuganira n’abaturage dushakira hamwe umuti w’ibibazo dufite”.

Perezida Kagame arasaba aba bayobozi bagiye kumara iminsi itatu muri uyu mwiherero, kuzawuvamo batahanye imikorere n’imyumvire mishya, ati “Ntabwo twaba abantu bahora biyemeza guhinduka ariko twasubira iwacu ugasanga turacyakora nk’uko twakoraga mbere”.

Insanganyamatsiko y’uyu mwiherero uzamara iminsi itatu igira iti “Imiyoborere mpinduramatwara ishingiye ku muturage”, witabiriwe n’abayobozi 1300 barimo Abanyamabanga Nshingwabikorwa b’imirenge, abajyanama b’uturere n’Umujyi wa Kigali ; abanyamabanga Nshingwabikorwa b’uturere n’abandi.

PNG - 947.7 ko
Aba bayobozi bagera kuri 1300 bahuriye mu mwiherero w’iminsi itatu ugomba kureberwamo ibijyanye n’ishyirwa mu bikorwa rya gahunda z’iterambere ry’igihugu.

@Umubavu.com



Tanga igitekerezo kuri iyi nkuru



Igitekerezo