Niteguye gupfa ariko nkarahirira kuyobora igihugu-Raila Odinga

Umuyobozi w’Impuzamashyaka atavuga rumwe na Leta iriho muri Kenya (National Super Alliance, NASA), Raila Odinga, aratangaza ko yiteguye gupfa ariko akarahirira kuyobora igihugu dore ko abarwanashyaka be badahwema kubimusaba bavuga ko nta Perezida bafite.

Raila Odinga yabwiye Leta iriho ko itangira gushaka ibihano izamuhanisha mu gihe azaba amaze kurahira nka Perezida wa Kenya, bivuze ko yiteguye guhanishwa ibihano ibyo ari byo byose nkuko yabyitangarije.

Umuhango w’irahira rya Odinga na Kalonzo Musyoka basanzwe bafatanyije kuyobora impuzamashyaka atavuga rumwe na Leta wagiye usubikwa inshuro nyinshi ariko kuri iyi nshuro barashimangira ko biteguye kurahira ku itariki ya 30 Mutarama 2018 batitaye ku bihano bashobora guhabwa dore ko n’abayoboke babo bavuga ko no mu gihe baramuka batinye barahizwa ku ngufu.

Ubwo yaganiraga n’abayoboke be, Odinga yavuze ko adatinya gufungwa cyangwa kujyanwa mu nkiko nyuma yo kurahira.

PNG - 721.9 ko
Odinga abwira abayoboke be ko adatinya kuzajyanwa mu nkiko


Odinga kandi yabwiye abayoboke be ko yiteguye no gupfa mu gihe Leta yaba ibonye ariyo nzira nziza yo kuzana amahoro mu gihugu. Avuga kandi ko atitaye ku magambo y’umucamanza mukuru wamubujije kurahira dore ko ashyigikiwe n’Abanya-Kenya batari bake batemera ko Uhuru Kenyatta ari Perezida nyamara yaratowe byemewe n’amategeko akanarahirira kuyobora igihugu ku mugaragaro ku wa Kabiri tariki ya 28 Ugushyingo 2017 kuri manda ye ya kabiri ari nayo ya nyuma ayobora igihugu nkuko Itegeko Nshinga ribiteganya.

Ikinyamakuru TUKO cyanditse ko bamwe mu bashinzwe gutegura ibikorwa byo kurahiza Odinga nabo batangaza ko bakomeje kwitegura ku buryo bukomeye ndetse bemeza ko imyiteguro igeze heza kandi ko iri kugenda neza nta kibazo na kimwe bafite batindiwe n’umunsi w’umuhango nyirizina.

Bamwe mu bayoboke ba Odinga kandi bavuga ko nabo biteguye no kuba batakaza ubuzima ariko umuyobozi wabo akarahirira kuyobora igihugu.

Daniel MUKESHIMANA/Umubavu.com



Tanga igitekerezo kuri iyi nkuru



Igitekerezo