Ni inde uyoboye abantu 10 bavuga rikijyana ku Isi muri 2018?Dore urutonde

Ubu tuvugana, iyi si dutuyeho imaze kugeza ku baturage barenga Miliyali 7.5. Uko iminsi ishira muri aba baturage niko hagenda hagaragaramo abakunze kwitwa ko bavuga rikijyana kuko usanga bashobora kuvuga Isi igakangarana bitewe n’ubudahangarwa bw’ibihugu baturukamo, bayobora , akayabo k’amafaranga bibitseho n’ibindi byose bituma icyo bavuze cyumvikana ndetse kigahabwa agaciro kuruta ibindi.

Ku rutonde rw’abantu 75 bashyizwe ahagaragara n’ikinyamakuru Forbes kimenyerewe mu gukora intonde zitandukanye ku bintu runaka kitibagiwe n’abantu, Umubavu.com tugiye kukugezaho urutonde rw’abantu 10 bavuga rikijyana ku Isi muri uyu mwaka wa 2018 (bafite ijambo n’ubutware mu ntoki zabo kubera impamvu twakubwiye haruguru).

1. Xi Jinping, Perezida w’u Bushinwa

Xi Jinping, w’imyaka 64 ni Perezida w’igihugu cy’u Bushinwa akaba n’Umunyamabanga Mukuru w’ishyaka riri ku butegetsi rya CPC (Communist Party of China) . Uyu mugabo ashyizwe kuri uru rutonde mu gihe mu gihugu cye baherutse guhindura Itegeko Nshinga, aho byamuhaye uburyo bwo kuyobora u Bushinwa kugeza igihe ashatse kuviraho cyangwa apfuye.

Si ibyo gusa, igihu cy’u Bushinwa gisa nkaho kihariye isoko hirya no hino ku Isi bitewe n’uburyo kizamuka mu bukungu muri ibi bihe.

2. Vladimir Putin, Perezida w’u Burusiya


Vladimir Putin afite imyaka 65, ni Perezida w’igihugu cy’u Burusiya, yagiye ku butegetsi mu mwaka wa 2000, amaze gutorerwa Manda 4 nka Perezida, uyu nawe uburyo yagiye ahangana, akanavuguruza Amerika ku byemezo yagiye ifata, no kuba igihugu cye kiri mu bihugu bivuga rikijyana mu Muryango w’Abibumbye, bigenda bimugaragaza nk’umunyembaraga dore ko no mu matora aherutse yagize amajwi 77% bityo akaba yashyizwe ku rutonde aza ku mwanya wa kabiri.

3. Donald Trump, Perezida wa Amerika

Ni Perezida wa Leta Zunze Ubumwe za Amerika (USA), afite imyaka 71, birumvikana ko kujya kuri uru rutonde bitaba impanuka bitewe n’uko ayoboye igihugu cy’igihangange kivuga rikijyana mu Muryango w’Abibumbye.Si ibyo gusa kuko uyu mugabo ubusanzwe ni umwe mu baherwe bafite ifaranga ritubutse. Kuri uyu mugabo kandi hari abo usanga bibwira ko kuba ayoboye Amerika byamuhesha kuba uwa mbere mu kuvuga rikumvikana vuba ariko siko bimeze.

4. Angela Merkel, uyobora u Budage

Ayobora igihugu cy’u Budage, afite imyaka 63, akaba ari we mugore rukumbi ugaragara kuri uru rutonde rw’abantu 10 bavuga rikijyana ku isi. Mu mwaka wa 2017 yatorewe Manda ya kane, uyu na we uburyo igihugu cye kihagazeho mu bukungu ugereranyije n’ibindi by’i Burayi no kuba ari umwe mu bavuga rikijyana bimushyira ku mwanya wa 4.

5. Jeff Bezos, Umuherwe wibereye aho

Afite imyaka 54, ni umuherwe akaba nyiri Amazon.com, afite ibikorwa by’ubucuruzi butandukanye, aza mu bakire ba mbere ku isi , akaba afite ubutunzi bubarirwa muri Miliyari 100 z’Amadolari ya Amerika, ni we washinze uru rubuga rukorerwaho ubucuruzi butandukanye, ibi byose bikamuhesha kuvuga rikumvikana.

6. Papa Francis, umushumba wa Kiriziya Gatorika

Afite imyaka 81, ni Umushumba wa Kiriziya Gatorika (Roman Catholic Church), uyu mushumba wa Kiriziya afite ijambo kuri iyi Isi ya Rurema kuko Miliyari hafi 2 muri Miyali 7 zirenga ari abayoboke b’idini Gatorika. Ni umwe mu bigaragaje batanga ubutumwa buhindura, bwunga bukanakiza abatuye iyi si. Ibi bimuhesha kuba umwe mu bavuga rikijyana ku isi.

7. Bill Gates, Umuherwe

Ku myaka ye 81 y’amavuko, ni umwe mu baherwe ba mbere ku isi ndetse agenda agaruka ku rutonde rw’imbere rw’abafite agatubutse, uyu ni nawe nyiri ‘Bill & Melinda Gates Foundation’, aho abarirwa muri Miliyari hafi $92 z’Amadolari ya Amerika.

8. Mohammed Bin Salman Al Saud

Afite imyaka 32 akaba ari umwana w’umwami wa Saudi Arabia, uyu nawe ni umwe mu bavuga rikumvikana bitewe n’ubukire bwo mu muryango n’uburyo igihugu cyabo gifite ijambo mu ibihugu by’Abarabu cyangwa ibigendera ku mahame ya Kiyisilamu.

9. Narendra Modi, Minisitiri w’Intebe w’igihugu cy’u Buhinde

Ni Minisitiri w’Intebe w’igihugu cy’u Buhinde, afite imyaka 67 y’amavuko, uyu nawe kuba ayobora igihugu gifite abaturage barenga Miliyari imwe, hafi miliyari imwe n’igice bimuha kuvuga rikijyana kandi igihu cy’u Buhinde ni kimwe mu bihugu byiyubaka umunsi ku wundi aho mu ikoranabuhanga no mu buvuzi, ubuhanzi n’ibindi kiza mu bya mbere byihagazeho.

10. Larry Page, Umuherwe

Afite imyaka 67, ni umuyobozi wa Alphabet, akaba akomoka mu muryango w’abashinze Google, uyu akaba afite ubutunzi bukabakaba Miliyari $51.1.

Birashoboka ko ushobora kumva utangajwe n’uburyo uru rutonde rwakozwe gusa ikinyamakuru Forbes cyarukoze kizobereye mu gukora intonde zitandukanye kigendeye ku bintu bifatika bityo rero ntiwite cyane ku buryo wowe wumvaga abantu bavuga rikijyana ku isi bakurikirana.

Daniel MUKESHIMANA@Umubavu.com


Travel for Free!


Tanga igitekerezo kuri iyi nkuru



Igitekerezo