Musanze : Barataka ubujura bupfumura inzu bukanibasira imyaka mu mirima

Abatuye mu kagari ka Bikara, kamwe muri dutanu tugize umurenge wa Nkotsi barataka ubujura buciye icyuho burangwa no gupfumura inzu ndetse no kwiba imyaka mu mirima ku buryo ngo no ku manywa basigaye batinya kuva mu rugo kubera kwikanga ko basanga inzu zabo zapfumuwe nk’uko abaganiriye na TV na Radio one babitangaje.

Umwe muri bo yagize ati " Uragenda ugasanga inzu bayipfumuye, ibirimo byose bakabitwara, nijoro nabwo waba usinziriye ukajya kumva ukumva barapfumuye bagusanze mu nzu."

Umuturanyi we nawe ati" Ushobora gusiga umwana mu rugo wagaruka ugasanga ibitoki mu murima babitemye byashizemo."

Ubuyobozi bw’umurenge wa Nkotsi mu ijwi rya MUKANTABANA Bellancile ushinzwe irangamimerere ari nawe urimo gukora mu mwanya w’umunyamabanga nshingwabikorwa w’uyu murenge, buvuga ko iki kibazo cy’ubujura koko gihari gusa kidakabije ariko kandi ngo bakaba barimo gukaza amarondo ngo gicike cyane cyane mu kagari ka Bikara gasa n’akarimo gufata isura y’umujyi muri iyi minsi bitewe n’ibikorwa by’iterambere birimo n’amashuli byahagejejwe.

Yagize ati" ... ni akagari gatuwe n’abantu batandukanye, barimo abanyeshuri, abacumbitsi bakora indi mirimo itandukanye bigaragara ko kagiye kuba umujyi gahunda twafashe ni ugukaza amarondo no kubarura abantu bacumbitse tukamenya ikibagenza."

Ariko ayo marondo nayo abaturage bavuga ko batabona umusaruro wayo mu gihe nta mujura baragaragarizwa wafashwe n’irondo mu gihe badasiba gusabwa amafaranga yaryo bakarenga bagahora bibwa.

Icyakora ubuyobozi bw’umurenge wa Nkotsi bukavuga ko kugira ngo ayo marondo agere neza ku ntego zayo hakenewe n’ubufatanye bw’abaturage.



Tanga igitekerezo kuri iyi nkuru



Igitekerezo