Muri Uganda RNC  mu mugambi wo gushinga umutwe w’abarwanyi  ugamije  guhungabanya u Rwanda

Umunsi ku wundi, hakomeje kujya hanze amakuru mashya avuga ku mubano w’u Rwanda na Uganda, aho iki gihugu cy’igituranyi gishyirwa mu majwi ku kuba indiri y’abashaka guhungabanya umutekano w’u Rwanda binyuze mu barwanya ubutegetsi bwarwo.

Amakuru agezweho ni uko hari umugambi uri gucurirwa muri Uganda wo gushaka abantu bo guhungabanya umutekano w’u Rwanda, ibikorwa birangajwe imbere na RNC ikuriwe na Kayumba Nyamwasa, wahoze ari umusirikare mu Ngabo z’u Rwanda ariko akaza guhunga igihugu nyuma y’amakosa yatumye yamburwa impeta zose za gisirikare.

Bivugwa ko RNC iri mu bikorwa byo gushaka abarwanyi bo guhungabanya umutekano w’u Rwanda ibakuye mu nkambi z’impunzi muri Uganda, bikaba bikorwa inzego z’ubutasi z’iki gihugu zibizi kandi zibihagarikiye.

Ikinyamakuru The Standard cyo muri Kenya cyatangaje ko gifite amakuru yizewe ko abarwanyi bashya batoranywa mu nkambi za Nyakivale na Bweyale Kiryadongo.

Izi nkambi ziri gukurwamo aba bagamije guhungabanya umutekano, zibarizwamo abanyarwanda banze gutaha mu rwababyaye abenshi bafite ibyaha bikekaho baba barakoze mu gihe bari mu Rwanda.

Ni mu gihe Ishami ry’Umuryango w’Abibumbye ryita ku mpunzi, UNHCR, ryatangaje ko sitati y’ubuhunzi ku Banyarwanda, izaba yarangiranye n’itariki ya 31 Ukuboza 2017.

Iki kinyamakuru cyatangaje ko gifite amakuru yizewe aturuka ku bazi iby’uwo mugambi, aho ngo ku wa Gatanu abantu bo muri RNC baherekejwe n’abo mu Rwego rw’Ubutasi bwa Gisirikare muri Uganda, Chieftaincy of Military Intelligence, (CMI) bajya mu nkambi ya Nyakivale, bakangurira urubyiruko ku mugaragaro kujya muri uwo mutwe.

Umunyamakuru w’iki kinyamakuru yasuye iyo nkambi y’impunzi zimuhamiriza ko abayobozi biriwe umunsi wose barebamo abakiri bato, bababaza imyirondoro yabo ; amazina n’imyaka yabo ndetse babizeza ko bazagaruka.

Umwe mu babaruwe wasaga n’utazi ibiri kuba ati “Badusezeranyije ko bazagaruka.”

Uku gufata amazina y’izi mpunzi guhishe byinshi kuko ari umugambi muremure ugamije gusiga icyasha u Rwanda. Bivugwa ko abatajyanywe mu myitozo muri RNC, bafatwa bagakurwa mu nkambi hanyuma hagatangira gukwizwa amakuru ko bashimuswe na Leta y’u Rwanda, bityo rukagaragara nk’igihugu cyinjiriye Uganda kikavogera ubusugire bwayo.

Umwambari wa RNC witwa Rugema Kayumba wavuye muri Norvège aho yari yarahungiye akajya gukorera i Kampala aho ubu ari umuntu wisanga mu rwego rw’Ubutasi rwa Gisirikare muri Uganda, (CMI) ; ni umwe mu barangaje imbere iki gikorwa cyo gushaka abahungabanya umutekano w’u Rwanda.

Ngo mu gihe cyo gutoranya abajya muri RNC, Rugema akora ubukangurambaga, ibikorwa byose bikayoborwa na Brig. Gen. Abel Kandiho uyobora CMI, akaba ari nawe utanga ibikoresho n’abarinda umutekano muri icyo gihe.

Umugambi wabo ni uwo guhimba amakuru y’itotezwa n’ishimutwa ry’Abanyarwanda baba muri Uganda bakavuga ko rikorwa n’u Rwanda, bakayasakaza mu bitangazamakuru.

Ubutumwa bwajyanye Rugema muri Uganda, bunareberwa cyane mu magambo yandika kuri Facebook. Urugero ni aho kuwa Gatandatu tariki 18 Ugushyingo, yanditse ati “Abicanyi benshi b’Abanyarwanda bari muri Kampala. Bagenzi banjye b’impunzi murabe menge. Umugambi wabo ni ugusiga Kampala amaraso yanyu.”

Muri ibyo bikorwa byo gushakira RNC abarwanyi, Rugema afatanya n’undi witwa Sande Charles bahimba Mugisha Robert na Maj. (rtd) Habib Mudathir.

Abo bavugwaho gushinga inkambi y’imyitozo y’uwo mutwe mu gace ka West Nile hafi ya Sudani y’Epfo na Repubulika Iharanira Demokarasi ya Congo.

Uretse aho, hanavugwa indi mu ntara ya Kivu y’Amajyepfo ahitwa Minembwe, yo ihabwa ibiryo, imiti, imbunda n’amafaranga na Leta y’u Burundi bikurikiranwa n’Umugaba Mukuru w’ingabo z’icyo gihugu.

Abarwanya u Rwanda bari mu Minembwe barimo Kanyemera Claude, Ruhinda Bosco, Karemera Alex n’uwitwa Butare.

Uyu mugambi uhishuwe nyuma yaho hari hashize iminsi igera kuri ibiri hatahuwe undi wo gushinja u Rwanda kugirira nabi abaturage barwo bahunze.

Ibinyamakuru byo muri Uganda bimaze igihe byandika inkuru ku mubano w’u Rwanda na Uganda byavuze ko zimwe mu mpunzi z’Abanyarwanda zari mu mugambi wo kugeza ibibazo ku Nteko Ishinga Amategeko ya Uganda, zitabaza ko u Rwanda rwohereza abazihohotera.

Gusa iki kintu cyateye urujijo benshi bibaza uburyo impunzi zitagira uburenganzira bwo gutora zishobora kugana Inteko aho gutabaza Ishami rya Loni rizishinzwe, UNCHR.

Rugema aherutse kwandika kuri Facebook ashimagiza Minisitiri w’Umutekano n’Umuryango wa Perezida Museveni, bikerekana umubano abarwanya Leta y’u Rwanda bafitanye n’ubugetsi bwa Uganda.

Uyu Rugema watorotse igisirikare cy’u Rwanda ari Corporal, afite umugore w’Umuhimakazi witwa Peace Rugema ucuruza ibiribwa i Kampala. Rugema kandi ngo akorana bya hafi na Corporal AbdulKarim Mulindwa uzwi nka Mukombozi ukora muri CMI, umuntu wa hafi w’ibiro bya Col. Abel Kandiho uyobora urwo rwego rw’iperereza.

Ikinyamakuru Red Pepper cyazize gutangaza imigambi y’abarwanya Leta

The Standard ivuga ko abantu bo mu butasi mu Mujyi wa Kampala bemeza ko gufunga ikinyamakuru Red Pepper biherutse, bidafite aho bihuriye n’inkuru cyanditse ku Rwanda na Uganda ahubwo ko byaturutse ku kuba cyaratinyutse guhishura umugambi mubisha ucurirwa u Rwanda wari waragizwe ibanga.

Bati “Red Pepper yazize guhishura ukuri iyi ngoma ya Kampala ishaka guhisha abaturage.”

Iki kinyamakuru cyanditse inkuru ivuga ko hari umugambi uri gucurwa na Perezida Museveni ashaka guhirika ubutegetsi bw’u Rwanda. Nyuma yayo, abayobozi b’icyo kinyamakuru barafunzwe.

Bivugwa ko iyi migambi yose iri gucurirwa muri Uganda bigizwemo uruhare n’inzego z’iperereza zayo zikoresha abahoze mu gisirikare cy’u Rwanda mu kurushinja "guhohotera impunzi, gushimuta no kuneka", igamije kurugaragaza nka leta ishotorana.

Impuguke mu bijyanye n’umutekano zigaragaza ko ibyo bikorwa bigamije kuzamura umwuka mubi hagati y’u Rwanda na Uganda, cyane ko n’ubusanzwe u Rwanda rutishimiye kuba igihugu nka Uganda cyacumbikira abarwanya ubutegetsi barwo bari mu ishyaka RNC.

Ibi bibaye mu gihe abakurikiranira hafi politiki yo mu Karere n’imibanire y’ibihugu bagaragaza ko Uganda imaze igihe ki​tari gito​ ikora ibikorwa by’ubushotoranyi ku Rwanda​​, bihereye no mu itangazamakuru.

Mu bikorwa bindi bifatwa nk’ubushotoranyi Uganda iherutse gukora harimo kwirukana Abanyarwanda barenga 90 bari bariyo mu buryo yita ko bunyuranyije n’amategeko, ibintu byaje bikurikiye ibindi bikorwa bitandukanye.

Hashize iminsi kandi Umunyarwanda René Rutagungira ashimutiwe i Kampala muri Uganda aho yakoreraga ubucuruzi, nyuma aza kugaragara yaramugaye kubera iyicarubozo ndengakamere yakorewe n’inzego z’umutekano za Uganda.

Umwe mu bakurikirira hafi imibanire y’ibihugu byombi waganiriye na IGIHE ariko utashatse ko amazina ye atangazwa kubera imirimo akora, yavuze ko kuva kera Uganda yagiye ikorera u Rwanda ibikorwa by’ubushotoranyi ariko rwo ntirusubize.

Ngo ibi bihera kera mu gihe cy’intambara ya Congo aho Uganda isa n’iyivanze muri uru rugamba, ndetse na nyuma yaho ikaba yaragiye ikorana mu buryo bweruye n’abarwanya ubutegetsi mu Rwanda.

Hari amakuru yizewe avuga ko Perezida Museveni ubwe yigeze kwerura akandikira umwe mu bayobozi b’u Bwongereza ko mu banzi bakomeye afite kugeza ubu, u Rwanda ruza ku mwanya wa mbere. Ni mu gihe benshi mu basirikare bakuru mu Rwanda bamufashije kujya ku butegetsi ahiritse Milton Obote.

Srce:Igihe



Tanga igitekerezo kuri iyi nkuru



Igitekerezo
fatu Kuya 5-12-2017

ariko uriya kayumba wabavugishije menshi mwashatse uko mumugenza mbese nka karegeya ????ikindi ubugande bwatumye mwikiza umwanzi ,bishoboka ko namwe muriyi minsi mwabaye umwanzi,mutege rero namwe babikize kko bacumugani ngo ntaheza hisi

Tuyisabe Kuya 5-12-2017

Nababwira iki nibagerageze,icyonzi cyo nuko u Rwanda ntaho bazarumenera, impande zose zirubakitse, baribeshya.

Tuyisabe Kuya 5-12-2017

Nababwira iki nibagerageze,icyonzi cyo nuko u Rwanda ntaho bazarumenera, impande zose zirubakitse, baribeshya.

Jado C Kuya 4-12-2017

Ariko njyewe sibyumva neza, abayobozi beshi bu Rwanda baturutse Uganda, kdi abeshi mubasirikare by Rwanda batunze abagore babagande ! Ubwo se ntimuba mushaka kumva ayo tuvuga koko. Ahaaa

Erice Kuya 4-12-2017

Ibyo ntagihamya bifite ni mutuze KBS ibintu namahoro