Loni irasaba Leta y’u Rwanda gufungura Col Byabagamba na bagenzi be ndetse ikabaha impozamarira

Itsinda ry’impuguke za Loni rikurikirana ibijyanye no gufunga abantu ku karengane riramagana ifungwa ry’abasirikare batatu bakuru b’u Rwanda barimo Tom Byabagamba rigasaba Leta y’u Rwanda kubarekura no kubaha impozamarira.

Izi mpuguke za Loni zamaganye ifungwa rya Col Tom Byabagamba wahoze akuriye umutwe ushinzwe kurinda perezida, Frank Rusagara na Francois Kabayiza iri tsinda rivuga ko bafunzwe bazira ubusa.

Umuryango w’Abibumbye ukaba waremeje ko aba bantu bafunzwe bazira ubusa mu mwanzuro watowe mu kwezi gushize kw’Ukuboza ndetse uhita usaba ko aba bahita bafungurwa.

Mu kiganiro yagiranye na RFI, Roland Adjovi, umwe muri batanu bagize iri tsinda ry’impuguke za Loni, yavuze ko bakurikiranye ifungwa ry’aba bantu kuva ryatangira, akemeza ko ifungwa ryabo ari amakosa.

JPEG - 241 kb

Uyu yongeyeho ko iri tsinda ryanasabye ko aba bagomba gufungurwa byihuse ndetse bakazahabwa impozamarira na guverinoma.

Abajijwe niba hari igisubizo cy’u Rwanda babonye, yagize ati: “Oya. Twoherereje guverinoma umwanzuro, dufite n’uburyo bwo gukurikirana mu gihe cy’amezi 6, tuzagenzura icyo guverinoma yakoze, hanyuma tuzatangariza ibyavuyemo akanama k’uburenganzira bwa muntu.”

JPEG - 241 kb

Roland Adjovi

Kuwa 31 Werurwe 2016, nibwo Urukiko Rukuru rwa Gisirikare i Kanombe rwakatiye Col Tom Byabagamba na bagenzi be bari bakurikiranyweho n’ubushinjacyaha bwa gisirikare ibyaha bitandukanye birimo kugambanira igihugu, Col Tom Byabagamba akatirwa imyaka 21, anamburwa impeta za Gisirikare.

Rtd Brig Gen Frank Rusagara wareganwaga na Col Tom Byabagamba, nyuma yo gutangarizwa n’urukiko ko ibyaha bitatu ubushinjacyaha bwamureze bimuhama, nawe yakatiwe igifungo cy’imyaka 20.

Rtd Sgt Kabayiza Francois nawe nyuma yo guhanagurwaho icyaha cyo gutunga imbunda ku buryo butemewe n’amategeko, agahamwa n’icyaha cyo guhisha ibimenyetso byashoboraga kwifashishwa mu kugenza icyaha, yakatiwe igifungo cy’imyaka itanu, ndetse n’ihazabu y’amafaranga ibihumbi 500.


Travel for Free!


Tanga igitekerezo kuri iyi nkuru



Igitekerezo