Kwemezwa kw’Itegeko ryemerera Museveni kuzongera kwiyamamaza bisize bamwe mu Badepite hanze y’Inteko

Inteko Nshingamategeko ya Uganda yemeje ihindurwa ry’Itegeko Nshinga rizatuma umukuru w’igihugu uriho ubu, Yoweri Kaguta Museveni w’imyaka 73 ashobora kongera kwiyamamariza kuyobora igihugu ku nshuro ye ya gatandatu. Kwemezwa kw’iri tegeko kandi bisize hari bamwe mu Badepite bahagaritswe ku mirimo yabo bazira kwamagana iri tegeko.

Nkuko BBC dukesha iyi nkuru ibitangaza, iri tegeko ryemejwe mu bihe bitari byoroshye byafashe iminsi itatu aho Abadepite batoye ku bwinshi, batesha agaciro Itegeko ryasabaga ko uwifuza kwiyamamariza kuyobora igihugu ataba arengeje imyaka 75 y’amavuko.

Ibi bisobanura ko Perezida Yoweri Kaguta Museveni kuri ubu ufite imyaka 73 kandi umaze kuyobora igihugu cya Uganda imyaka irenga 30, ashobora kuzongera kwiyamamariza kuyobora igihugu mu mwaka wa 2021 ubwo azaba arangije Manda ye.

PNG - 562 ko
Mu matora akurikira Museveni azaba afite imyaka 77


Itegeko ryateganyaga Manda ebyiri ku mukuru w’igihugu naryo ryakuweho mu mwaka wa 2005, kugira ngo Museveni ashobore kuyobora igihugu ku nshuro ye ya gatatu.

Abamushyigikira bavuga ko Abagande bashobora kuzamukura ku butegetsi biciye mu matora.

Abadepite bo mu mashyaka atavuga rumwe n’ubutegetsi bahise basohoka bava muri iyo Nteko, batandatu barahagarikwa bazira kwamaganira kure iryo tegeko.

Daniel MUKESHIMANA/Umubavu.com



Tanga igitekerezo kuri iyi nkuru



Igitekerezo