Kutavuga rumwe na Leta ntibivuze guhangana – Perezida Kagame

Mu kiganiro Perezida Kagame yagiranye n’abayobozi b’ibitangazamakuru bya Leta muri Africa bari mu nama rusange i Kigali kuva kuwa mbere w’iki cyumweru, yavuze ko nta buryo bw’imiyoborere buboneye bwabera ibihugu byose, kandi ngo yumva kutavuga rumwe na Leta atari uguhangana.

Emmanuel Wongibe uyobora Radio na Televiziyo bya Cameroun wayoboye iki kiganiro, yabajije Perezida Kagame ukuntu u Rwanda rwaje kumvikana kuri Politike y’ubwumvikane, utsinze ntatware imyanya yose, ndetse niba yanagira inama ibihugu bya Africa kuyiyoboka.

Perezida Paul Kagame yavuze ko nta banga ridasanzwe ahubwo u Rwanda rwisobanukiwe rubasha gusobanura intego n’ikerekezo rushaka, hanyuma abanyarwanda bumvikana uko babigeraho.

Yavuze ko impamvu mu Rwanda utsinze amatora adatwara imyanya yose nk’uko bigaragara mu bihugu byinshi, ari ukwirinda ko hagira igice cy’abaturage cyumva ko cyatsinzwe amatora, ntacyo gifite kikajya mu ihangana.

Ati “Dukeneye amahoro n’umutekano, dukeneye iterambere kandi buri wese agomba kubigiramo uruhare. Twaje guhitamo Politike yo kumvikana no gushyira hamwe kugira ngo tugere ku ntego dufite.”

Perezida Kagame yavuze ko kuba utsinda amatora mu Rwanda agabana imyanya n’abo yatsinze bifitiye inyungu igihugu, dore ko ngo n’ubundi kutavuga rumwe na Leta bikwiye kuba “kuzana ibitekerezo bitandukanye bigamije gufasha igihugu kugera ku ntego zacyo”.

Yavuze ko iyo bijemo kubuza igihugu kugera ku ntego no gushaka gusenya ibyagezweho ibyo byo biba ari ikindi yakwita “Ihangana”.

Gusa, Perezida Kagame yavuze ko nanone atasaba abayobozi b’ibihugu bya Africa kwigana u Rwanda kuko ngo nta buryo na bumwe bw’imiyoborere bubaho bwabera ibihugu byose.

Ati “Na babandi baba bashaka kutwigisha no kudutegeka ibyo dukora muri iyi minsi bafite ibibazo.”

Muri iki kiganiro kandi, Perezida Kagame yanabajijwe ibibazo bitandukanye bijyanye n’iterambere ry’itangazamakuru muri Africa.

Aha, Perezida yasabye ko ibihugu bya Africa byashyira amafaranga mu bitangazamakuru kugira ngo bibashe kubona ubushobozi bwo gukora neza.

Ndetse anavuga ko ashyigikiye igitekerezo kigeze kuzamurwa mu myaka 10 ishize kikaza gusinzira cyo gushing igitangazamakuru nyafurika gikomeye cyajya kiviga inkuru za Africa uko biri, aho kugira ngo bijye bivugwa n’ibitangazamakuru by’abanyamahanga gusa bibivuga uko bishatse.

Ati “Kugira ngo uvuge/wivugire ukenera umunwa.”

Perezida Kagame yananenze uburyo hari ibirori nk’imikino usanga bibera ku butaka bwa Africa, ikinwa n’abanyafurika ariko ugasanga abanyafurika badashobora kuyireba kuri Televiziyo kubera ko ubwo burenganzira bwaguzwe n’ibigo bikomeye byo hanze ya Africa.

@Umubavu.com



Tanga igitekerezo kuri iyi nkuru



Igitekerezo