Ku nshuro ya 2 intsinzi ya Uhuru Kenyatta ntivugwaho rumwe

Kuva ejo ku munsi wa kabiri tariki ya 14 Ugushyingo nibwo Urukiko Rukuru rwa Kenya rwatangiye kwumva imanza zamagana intsinzi ya Perezida Uhuru Kenyatta yegukanye ku nshuro ya kabiri mu matora yasubiwemo ku wa 26 Ukwakira 2017.

Uru rukiko rwumvise n’urundi rubanza ruregwamo ubuyobozi bw’imitwe itavuga rumwe n’ubutegetsi ihuriye mu ihuriro NASA (The National Super Alliance Political Coalition in Kenya) aho iri huriro riregwa ubugizi bwa nabi bwabaye mu gihe cy’amatora.

PNG - 823.4 ko
Urukiko Rukuru rwa Kenya rwatangiye kumva imanza zitavuga rumwe n’intsinzi ya Kenyatta


Ni ku nshuro ya kabiri mu gihe cy’amezi atatu gusa Urukiko Rukuru rwa Kenya rusabwa kutagira uruhande rubogamiraho kugira ngo hamenyekane ukuri k’uwatsinze amatora.

Rimwe mu mashirahamwe ategamiye kuri Leta risaba ko umuyobozi wa wa NASA, Raila Odinga yakurikiranwaho ibyaha byakozwe biturutse ku kubuza abayoboke be kwitabira amatora ndetse no kwemeza ko mu gihe atayoboye igihugu hagomba kuba imvururu mu baturage.

Abashyikirije imanza zabo Urukiko Rukuru basaba ko intsinzi ya Bwana Kenyatta yokongera igateshwa agaciro, basobanura ko akanama gashinzwe gutegura amatora, IEBC (The Independent Electoral and Boundaries Commission) katahamagaje amatora ya kabiri mu buryo butegekanywa n’Itegeko Nshinga ndetse n’andi mategeko bijyanye.

Ako kanama ngo ntikatangarije ibyavuye mu matora abifuzaga kwiyamamaza mu mwanya w’’umukuru w’igihugu, ibi bigatuma bavuga ko ayo matora ya kabiri nta gaciro yakagombye guhabwa.

Ku bijanye n’icyo kibazo, Perezida Uhuru Kenyatta n’akanama gashinzwe gutegura amatora IEBC basobanuye ko bitari bikenewe guhamagaza bushyashya amatora ngo mu gihe urukiko rwari rwatesheje agaciro ibyari byavuye mu matora ya mbere.
Urukiko rwa Kenya rutangiye kwumva izo manza kuri uyu wa kabiri rukaba rufite iminsi irindwi yo kuzicara nyuma rugafata icyemezo kuri izi manza.

Mu ntangiriro z’ukwezi kwa kenda, nibwo uru rukiko rwafashe icyemezo kidasanzwe mu mateka y’isi nzima cyo gutesha agaciro intsinzi ya Perezida by’umwihariko yari anasanzwe ari ku butegetsi. Aya matora yari yabaye ku itariki ya 8 Kanana 2017 bivugwa ko yari yabayemo uburiganya buturutse kuri amwe mu makosa yakozwe n’akanama gashinzwe gutegura amatora.

PNG - 657.9 ko
Uhuru Kenyatta wegukanye intsinzi mu matora yasubiwemo ku itariki ya 26 Ukwakira 2017

Daniel MUKESHIMANA/Umubavu.com



Tanga igitekerezo kuri iyi nkuru



Igitekerezo