Kenya : Polisi imaze kwivugana umuntu umwe mu gihe amatora y’umukuru w’Igihugu arimbanyije

Mu gihe abanyakenya bazindukiye mu matora y’umukuru w’igihugu, kuri ubu umuntu umwe niwe bimaze kumenyekana ko yishwe arashwe n’igipolisi ubwo cyarimo gihangana n’abari mu myigaragambyo mu gace ka Kisumu kari mu burengerazuba bw’iki gihugu.

Abari mu myigaragambyo ni bamwe mu batavuga rumwe na Leta barimo bashaka uburyo baburizamo ibikorwa by’isubirwamwo ry’amatora y’umukuru w’igihugu.
Umukuru w’ishyaka rya NASA n’amashyirahamwe bitavuga rumwe na Leta, Raila Odinga nawe yanze kwitabira aya matora avuga ko ari ikinamico.
Nubwo hari uduce tumwe na tumwe twabayemo imishyamirano by’umwihariko no mu murwa mukuru Nairobi ariko ahenshi mu gihugu haratekanye nkuko igipolisi kibitangaza.

Perezida wari uri ku butegetsi muri iki gihugu cya Kenya, Uhuru Kenyatta wari watsinze amatora yo mu kwezi kwa munani we yahamagariye abantu kwitabira aya matora.

Icyakora abanyamakuru bavuga ko abitabiriye aya matora ari bake ugereranyije n’abo akanama gashinzwe gutegura amatora kavuga bagombye gutora. Ikindi ngo kuri ubu hari amakenga ko n’ubundi aya matora ashobora kutemerwa hagendewe ku mibare yitabiriye gutora.

Urukiko rukuru rwa Kenya ruyobowe na David Maraga mu kwezi gushize rwategetse ko aya matora yari ateganyijwe mu kwezi munani asubirwamwo kuri uyu munsi tariki ya 26 Ukwakira 2017 kubera uburiganya bwayabayemo.

Daniel MUKESHIMANA/Umubavu.com



Tanga igitekerezo kuri iyi nkuru



Igitekerezo