Kenya : Ese amatora ateganyijwe gusubirwamo ku itrariki ya 26 Ukwakira azaba cyangwa ntazaba ?

Kuri uyu wa gatatu tariki ya 18 Ukwakira 2017, umukuru w’ishyaka NASA akaba n’umuyobozi w’amashyaka atavuga rumwe n’ubutegetsi mu gihugu cya Kenya, Raila Odinga yasabye ndetse anahamagarira abayoboke be bose kuzagira imyigaragambyo ikaze ku munsi nyirizina w’amatora y’umukuru w’igihugu ubwo azaba asubirwamo ku itariki ya 26 Ukwakira ndetse anongeraho ko aya matora atazaba nubwo atavuze inzira azakorehsha ngo ayaburizemo.

Odinga avuga ko imyigaragambyo igiye gukomeza kandi ko by’umwihariko ku itariki y’amatora nyirizina aribwo izaba ikomeye cyane mu gihugu cyose. Ibi yabitanganje kuri uyu wa gatatu imbere y’abarwanashyaka n’abayoboke be babarirwa mu bihumbi bari mu ihuriro yateguye mu murwa mukuru Nairobi.

PNG - 803.2 ko
Raila Odinga, umukuru w’abatavuga rumwe n’ubutegetsi mu myigaragambyo i Nairobi muri Kenya


Odinga yemeye kandi ko ku itariki ya 26 nta matora azaba ariko ntiyavuze uko azabigenza cyangwa uburyo azakoresha kugira ngo aburizemo isubirwamo ry’aya matora. Bwana Raila Odinga aheruka gutangaza ko yikuye muri aya matora ko ndetse atazanayitabira ngo abitewe nuko abona atazarangwamo umucyo.

Nyuma y’ibi byose bikomeza kuza mbere y’isubirwamo ry’aya matora mu gihugu cya Kenya binagaragaza ko iki gihugu gishobora guhura n’akaga gakomeye, n’ubundi umwe mu ba komiseri ba Komisiyo y’amatora muri iki gihugu, yeguye ku mirimo ye mu gihe hasigaye icyumweru kimwe gusa ngo amatora y’umukuru w’igihugu asubirwemo.

PNG - 772.9 ko
Dr Roselyn Akombe weguye ku mirimo ye mu kanama gashinzwe gutegura amatora IEBC muri Kenya


Mu ibaruwa y’ubwegure bwe yashyize ahagaragara, Roselyn Akombe wanahise ahungira I New York muri Leta zunze ubumwe za Amerika, yanditse ko akurikije ibyo amaze iminsi abona, asanga amatora ateganyijwe tariki ya 26 atazaba mu mucyo. Yasobanuye ko komisiyo y’amatora itarimo gukorera mu bwisanzure.

Akombe yavuze ko muri komisiyo hari mo umwuka mubi ushingiye ku guhangana hagati y’abakozi n’igitsure bashyirwaho na bamwe mu banyapolitike. Mu kiganiro yagiranye na radiyo y’Abongereza BBC, Akombe yavuze ko yahisemo guhunga igihugu nyuma yo guterwa ubwoba akaba ngo yatinyaga ko ashobora kubura ubuzima.
Mu kiganiro yahaye abanyamakuru, umuyobozi wa komisiyo y’amatora, Wafula Chebukati na we yavuze ko nubwo ibyangombwa byose byabonetse bikigoye kwemeza ko aya matora azaba mu mucyo no mu bwisanzure.

PNG - 820.3 ko
Uhuru Kenyatta, umuyobozi wa IEBC, Wafula Chebukati ndetse na Dr Roselyn Akombe weguye ku mirimo ye ubwo hakirwaga ubwegure bwe


Nubwo ibi byose bimeze gutya nyamara ubwo yari mu bikorwa bye byo kwiyamamaza, Perezida Uhuru Kenyatta we yavuze ko nta kibazo abona kizatuma amatora atagenda neza.

Uwo bahanganye Raila Odinga wo mu mashyaka ndetse n’amashyirahamwe y’abatavuga rumwe n’ubutegetsi yikuye muri aya matora avuga ko hari ibimenyetso byerekana ko atazagenda neza mu gihe haba hatabayeho impinduka mu bagize komisiyo yayo.

PNG - 743.5 ko
Raila Odinga, umuyobozi wa NASA ndetse n’amashyirahamwe atavuga rumwe n’ubutegetsi bwa Kenya


Mu majwi yateshejwe agaciro n’Urukiko rw’Ikirenga rwa Kenya, Bwana Uhuru Kenyatta yari yatsinze amatora ya mbere yabaye ku itariki 08 Kanama 2017 ku majwi 54% mu gihe Raila Odinga bahora bahanganye we yari yagize 45%.

Daniel MUKESHIMANA/Umubavu.com



Tanga igitekerezo kuri iyi nkuru



Igitekerezo