Kenya : Asaga miliyoni 120 z’amadorari niyo azakoreshwa mu matora ya Perezida

Perezida w’igihugu cya Kenya Uhuru Kenyatta yashyize umukono ku itegeko ritanga uruhushya rwo gusohora asaga miliyoni 120 z’amadolari yo gukoreshwa muri gahunda yo gukomeza gutegura neza amatora ateganyijwe gusubirwamo ku itariki 26 z’ukwezi kwa 10/2017.

Akanama gashinzwe gutegura amatora mu gihugu cya Kenya, IEBC biciye ku muyobozi nshingwabikorwa Ezra Chiloba kasabye miliyoni zisaga 122 z’amadolari kugira gashobore gukoresha amatora gusa leta yo yemera miliyoni 100 z’amadolari gusa.
Mu cyumweru gishize, umutwe w’Inteko Nshingamategeko ushinzwe ikoresha ry’amafaranga mu gihugu cya Kenya wemeje miliyoni 20 z’amadolari yo gufasha mu buryo bw’itumanako mu matora yimirijwe mu minsi mike iri imbere.
Inyuma yaho abadepite bemereje miliyoni 20 zo gukoreshwa mu itumanaho, IEBC igiye kwakira yose hamwe asaga miliyoni 120 z’amadorari azakoreshwa mu matora yose .
Kuri ubu kandi Perezida Uhuru Kenyatta yemeje asaga miliyoni 250 z’amadolari agiye gutuma abana bo mu mashuli yisumbuye biga ku buntu kuva mu kwezi kwa mbere mu mwaka utaha.
Tubibutse ko amatora biteganyijwe ko azasubirwamo ku itariki 26 Ukwakira uyu mwaka nyuma y’aho ayari yabaye mbere yateshejwe agaciro n’urukiko rukuru ruvuga ko yabayemo uburiganya. Akanama gashinzwe gutegura amatora muri iki gihugu cya Kenya IEBC kari kemeje ko hazahatana abakandida 2 gusa ari bo Uhuru Kenytta na Raila Odinga uheruka kuvuga ko atazitabira amatora gusa kuri ubu aka kanama kamaze kwemerera n’abandi bakandida bari bitabiriye amatora yabaye mbere kongera kwiyamamaza.

Daniel MUKESHIMANA/Umubavu.com



Tanga igitekerezo kuri iyi nkuru



Igitekerezo