Ibyo kwegura kwa Mugabe bikomeje kuba agatereranzamba

Ni nyuma yuko byari byitezwe ko mu ijambo rye ryo kuri iki cyumweru tariki ya 19 Ugushyingo 2017, Perezida Mugabe atangaza ku mugaragaro ko yeguye ku nshingano zo kuba umukuru w’igihugu cya Zimbabwe nyamara bikaba byarangiye atsembye ko adashobora kwegura. Mugabe yavuze ko azakomeza kuba Perezida ndetse akazanayobora inama rusange y’ishyaka ZANU-PF iteganyijwe mu kwezi gutaha kwa 12.

Ibi bikomeje kuba amayobera kuko mu cyumweru gishize, ibinyamakuru bimwe na bimwe byagiye byandika ko Mugabe yemeye kwegura nta mananiza yandi abayeho ibindi bikavuga ko yanze kwegura none kuri iyi nshuro yari itegerejwe ko ashobora gutangaza ubwegure bwe ku mugaragaro nabyo byarangiye uyu mukambwe akuriye inzira ku murima abibwiraga ko yakwegura.

Nyuma yuko ishyaka riri ku butegetsi ZANU-PF ryari ryamaze gusezerera Mugabe ku butegetsi, ibi byatumye abenshi batekereza ko ari yo nzira yo kugaragaza ko ingoma y’uyu musaza ishyizweho akadomo nyamara si ko byagenze nyuma yuko ku munsi w’ejo mu ijambo rye atsembye ko adashobora kurekura ubutegetsi.

PNG - 915.4 ko
Uretse no kuba ishyaka ZANU-PF ryari ryamaze kwirukana Mugabe ku butegetsi, n’abaturage ntibamushaka


Gusezererwa ku butegetsi n’ishyaka rye kandi byanatumye bamwe mu baturage ba Zimbabwe bigaba mu mihanda bishimira ko Mugabe avuye ku butegetsi ndetse n’ibinyamakuru birimo na BBC na TUKO byandika ko Mugabe yemeye kurekura ubutegetsi mu mahoro ariko byarangiye akuriye inzira ku murima abatekerezaga ko yakwegura.

Mu ijambo yavugiye kuri televiziyo y’igihugu, Mugabe yavuze ko azayobora inama rusange y’iryo shyaka izaba mu Ukuboza. Zanu PF yari yatangaje ko imuvanye ku mwanya wa Perezida wayo imuha amasaha ari munsi ya 24 ngo abe yeguye no kuba Perezida wa Zimbabwe.

Ubuhangange bwa Mugabe bwagabanutse ku wa Gatatu ubwo igisirikare cyafataga ubutegetsi.

Ibi byose byatangiye Mugabe w’imyaka 93 yirukana Visi Perezida we Emmerson Mnangagwa, ibintu byagaragaje ko ashaka ko umugore we Grace ari we uzamusimbura.

BBC ivuga ko imbaga y’abantu benshi yari iteraniye mu murwa mukuru Harare, biteze kwakirana ibyishimo ubwegure bwe.

PNG - 959.7 ko
Abantu ibihumbi bari bategereje kumva Mugabe yegura nyuma aza kubakurira inzira ku murima


Mugabe wari ukikijwe n’abayobozi b’igisirikare yananiwe kwegura ahubwo ati “ Inama y’ishyaka [Zanu PF] iteganyijwe mu byumweru bike kandi nzayobora ibikorwa byayo.”

Yemeye ko igisirikare cyafashe ubutegetsi n’abaturage bigaragambije anasaba ko icyo gihugu gisubirana umutuzo.

Ati “Ibyabaye byose n’uko babikoze, Njye nk’umugaba w’ikirenga nemera impungenge zabo.”

Yagaragaje ko akomeza kuba Perezida nibura kugeza mu kwezi gutaha ubwo hazaba inama rusange ya Zanu PF.

Mugabe yemeye ko habayeho amakosa no guhanga udutsiko muri guverinoma ye no mu ishyaka ariko ntiyavuga ku mugore we Grace.

Kugeza ubu Zimbabwe iracyari mu gihirahiro kuko Zanu PF yavuze ko imwirukana ku buyobozi bw’igihugu naba ataregura saa sita zo kuri uyu wa Mbere.

Ku Cyumweru Mnangagwa yagizwe umuyobozi mushya wa Zanu PF n’umukandida mu matora ateganyijwe mu mwaka utaha.

Inama y’iri shyaka yabaye ejo kandi yirukanye Grace Mugabe n’abandi bayobozi bakuru bari bafatanyije mu kurwanira ubutegetsi.

Benshi biteze kureba ukuntu Mugabe azayobora inama rusange ya Zanu PF kandi yirukanwe ku buyobozi bwayo.

Mnanganwa yahoze ashinzwe umutekano w’imbere ndetse yanarwanye urugamba rw’ubwigenge, ahimbwa ‘ingona’ kubera ubuhangange bwe. Mugabe akimara kumwirukana yahise ahunga ariko bivugwa ko yagarutse.

Chris Mutsvangwa uyoboye ishyirahamwe ry’ingabo zavuye ku rugerero yavuze ko bagiye gukomeza imyigaragambyo.

Ati “Ijambo rye ntaho rihuriye n’ukuri. Turakomeza gusaba ko yegura kandi turasaba abaturage kugaruka mu mihanda.”

Daniel MUKESHIMANA/Umubavu.com



Tanga igitekerezo kuri iyi nkuru



Igitekerezo