Dore ibihano bitegereje Raila Odinga mu gihe yaba arahiye nka Perezida wa Kenya

Mu gihe Raila Odinga, umuyobozi w’ihuriro n’amashyaka atavuga rumwe na Leta iriho mu gihugu cya Kenya yaba arahiriye kuyobora igihugu cya Kenya ku itariki ya 12 Ukuboza 2017 mu gihe gifite Perezida wemewe n’amategeko Uhuru Kenyatta ndetse nkuko byemejwe n’urukiko rukuru, ashobora guhanishwa igifungo cya burundu nkuko ingingo ya 7 mu gitabo cy’amategeko ahana ibyaha cya Kenya kibitegenya.

Nkuko mu gitabo cy’amategeko ahana ibyaha biteganywa mu ngingo yacyo ya 7, amategeko ya Kenya ntiyemerera umuntu uwo ari we wese gukora icyaha nk’iki cyo kubuza umudendezo igihugu. Biteganyijwe ko ugaragaweho n’iki cyaha, ahanishwa igifungo cya burundu gishobora. Iki cyaha kandi gishobora no guhanishwa urupfu nubwo iki gihano amategeko mpuzamahanga atacyemera.

Uyu muyobozi w’abatavuga rumwe n’ubutegetsi ni nawe muyobozi w’ishyaka rya NASA rihora rihanganye n’irya Jubilee ribarizwamo Perezida Uhuru Kenyatta uri ku butegetsi muri manda ye ya kabiri nyuma yo kwegukana intsinzi mu matora yasubiwemo ku itariki ya 26 Ukwakira 2017 mu gihe ayari yabaye mu kwezi kwa munani yari yateshejwe agaciro n’urukiko rukuru ruvuga ko yabayemo uburiganya.

Mu gihe Raila Odinga yaba yirengagije ibi byose dore ko na Leta Zunze ubumwe za Amerika zamugiriye inama yo kuburizamo irahira rye, yahanishwa igifungo cya burundu ari muri gereza nkuko biteganywa n’amategeko ya Kenya ku muntu wese wakoze iki cyaha. Amategeko ya Kenya ntiyemerera umuntu uwo ari we wese gufata umwanya w’umukuru w’igihugu bitanyuze mu matora akozwe mu mucyo na demokarasi.

PNG - 729.3 ko
Raila Odinga wavuze ko azarahira nka Perezida wa Kenya


Ku itariki ya 28 Ugushyingo 2017 nyuma yuko Perezida Uhuru Kenyata arahiriye ku mugaragaro kuyobora Kenya muri manda ye ya kabiri ari nayo ya nyuma yemererwa n’amategeko, nibwo Raila Odinga nawe yahise atangaza ko ku itariki ya 12 Ukuboza 2017 azarahira nka Perezida wa Kenya. Uyu munsi Odinga yatoranyije kurahiriraho niwo igihugu cya Kenya kizihizaho ubwigenge bwacyo.

PNG - 963.8 ko
Uhuru Kenyatta yarahiriye kuyobora Kenya muri manda ye ya kabiri


Ishyaka rya NASA ntiryahwemye kuvuga ko ritazigera na rimwe ryemera Uhuru Kenyatta nka Perezida wa Repubulika ya Kenya.

PNG - 798.3 ko
Abayobozi bakuru b’ishyaka NASA barongowe na Bwana Odinga


Perezida Uhuru Kenyatta na Visi Perezida we William Ruto, barahiriye kuyobora igihugu cya Kenya muri manda ya kabiri ku itariki ya 28 Ugushyingo 2017.

Amahanga ndetse n’abakurikiranira hafi ibya politiki y’igihugu cya Kenya ntibahwemye gusaba Perezida Uhuru Kenyatta kwicarana ku meza na Raila Odinga bagashakira hamwe umuti w’ibibazo bya politiki byugarije igihugu.

Daniel MUKESHIMANA/Umubavu.com



Tanga igitekerezo kuri iyi nkuru



Igitekerezo