Bitunguranye, abayobozi b’intara ya Catalogne bahagaritswe ku mirimo yabo

Carles Puigdemont n’abandi bayobozi 13 bari bafatanyije kuyobora intara ya Catalogne bahagaritswe ku mirimo yabo nyuma y’aho urukiko rukuru rwa Espagne rubahamije ibyaha birimo gushaka kwiyomora ku gihugu no guteza umwuka mubi mu baturage nyuma y’amatora ya kamarampaka yo mu kwezi kwa cumi gushize.

Urukiko rukuru rukorera mu murwa mukuru wa Espagne, Madrid rwategetse abayobozi 13 n’abandi batatu barimo n’uwahoze ayoboye intara ya Catalogne Carles Puigdemont we wavuze ko adashobora gukurikiza iki cyemezo cyangwa ngo yitabe uru rukiko.

Uru rubanza Carles Puigdemont we yise urwa politike aho ari mu Bubiligi, abacamanza bavuze ko mu gihe aba bayobozi baba banze kwitaba ubutabera bashobora gushyirirwaho impapuro zibata muir yombi aho baba bari hose.

Mu cyumweru gishize, Minisitiri w’Intebe wa wa Espagne, Mariano Rajoy yategetse ko intara ya Catalogne iyoborwa n’ubuyobozi bw’i Madrid anahagarika ibikorwa byose by’Inteko Nshingamategeko y’iyi ntara ndetse anashimangira ko hategurwa amatora yihuse aciye mu mucyo na Demokarasi.

Ibi byose bibaye nyuma y’aho abadepite b’intara ya Catalogne batoreye itegeko ry’uko iyi ntara ikomeye mu buzima bwa Espagne yigenga.

PNG - 909.8 ko
Abigaragambya ntibasibye kwigaba mu mihanda basaba ko iyi ntara ya Catalogne yakwigenga


Leta ya Catalogne ivuga 43% by’abitabiriye amatora ya kamarampaka yo mu kwezi kwa cumi, 90% ari bo bemeje ko iyo ntara yigenga ariko ibi byose bigaterwa utwatsi n’ubuyobozi bwa Espagne buvuga ko aya matora yabaye atemewe n’amategeko.

Daniel MUKESHIMANA/Umubavu.com



Tanga igitekerezo kuri iyi nkuru



Igitekerezo