Bidasubirwaho Uhuru Kenyatta yatsinze amatora n’amajwi 98%, Odinga agira 0,96%

Komisiyo ishinzwe amatora mu gihugu cya Kenya yatangaje ibyavuye mu matora y’umukuru w’igihugu ya kabiri yabaye mu cyumweru gishize, yavuze ko yitabiriwe 38,84% gusa by’abagombaga gutora, aho abagera kuri 98,26% batoye Uhuru Kenyatta, Odinga wabujije abamushyigikiye gutora agira 0,96%.

Umuyobozi wa Komisiyo ishinzwe amatora mu gihugu cya Kenya “IEBC” Wafula Chebukati asomera amajwi mu ruhame ahitwa “Bomas of Kenya”, yavuze ko aya matora atari yoroshye kubera ibibazo Politike n’abategaga iminsi Komisiyo y’amatora batifuzaga ko aba.

Wafula yatangaje ko mu Banyakenya 19 611 423 bari kuri lisiti y’itora bagombaga gutora, hatoye abagera kuri 7 616 217 gusa bangana na 38,84%. Muri aba batoye kandi nabwo amajwi yajugunywe (imfabusa/batoye nabi) agera ku 37 713.

Dore uko bakurikiranye mu majwi :

John Ekuru Longoggy Aukot yatowe n’abantu 21 333, bangana na 0,28% ;
Mohamed Abduba Dida yatowe n’abantu 14 107, bangana na 0,19% ;
Shakhalaga Khwa Jirongo yatowe n’abantu 3 832, bangana na 0,05% ;
Japhet Kavinga Kaluyu yatowe n’abantu 7 261, bangana na 0,11% ;
Uhuru Kenyatta yatowe n’abantu 7,483,895, bangana na 98,26% ;
Michael Wainaina Mwaura yatowe n’abantu 6 007, bangana na 0,08% ;
Joseph William Nthiga Nyagah yatowe n’abantu 5 554, bangana na 0,07% ;
Raila Odinga yatowe n’abantu 33 228, bangana na 0,96.

Bica ‘live’ kuri Televiziyo Uhuru Kenyatta na Vice-Perezida we William Ruto bamaze gutangazwa ku buryo ndakuka ko aribo batsinze amatora, banashyikirijwe inyandiko zibyemeza.

Umukuru w’abatavuga rumwe na leta, Raila Odinga, yanze kwitabira ayo matora avuga ko akanama gashinzwe amatora katashoboraga kuyatunganya mu buryo bwizewe.
Yari yanasabye abayoboke be kutajya gutora.

Abantu 39% by’umubare w’abayindakishije gutora nibo bayitabiriye.

Uyu mubare ukaba uri hasi ya kimwe cya kabiri cy’abitabiriye ayabaye mu kwezi kwa munani.



Tanga igitekerezo kuri iyi nkuru



Igitekerezo