Abarwanyi ba M23 barenga 300 bishyikirije  ingabo za Congo

Umuyobozi w’Igikorwa cya gisirikare cyiswe Sokola2 gishinzwe kurandura imitwe yose yitwara gisirikare iboneka ku butaka bwa Congo, Major Ndjije Kaiko avuga ko abarwanyi ba M23 barenga 300 bamaze kwishyikiriza ingabo za Repubulika Iharanira Semokarasi ya Congo kuva uyu mwaka wa 2017 watangira aho ubu bari mu bigo bitandukanye muri gahunda yo kubasubiza mu buzima busanzwe.

Ibi Major Ndjije Kaiko akaba yarabitangaje ku wa Gatatu tariki 18 Ukwakira 201 ubwo abarwanyi 51 ba M23 bari bishyikirije ingabo za Congo ku bushake berekwaga itangazamakuru aho yashimangiye ko aba barwanyi bahisemo kwishyikiriza izi ngabo kubera imibereho mibi aho bari mu nkambi hamwe n’abagenzi babo muri Uganda.

Kaiko akaba yaraboneyeho gusaba indi mitwe y’inyeshyamba ikomeje guteza umutakano muke ko yagera ikirenge mu cy’abarwanyi ba M23 kuko ngo ingabo za Congo ziri maso nk’uko bitangazwa na Radio Okapi.

Umutwe wa M23 washyize intwaro hasi mu Ugushyingo 2013 nyuma yo gutsindwa n’Ingabo za Congo zifatanyije n’iz’amahanga.

Kuva icyo gihe bamwe mu barwanyi b’uyu mutwe bakaba barahungiye mu Rwanda naho ikindi gice kinini gihungira Uganda.Bakaba bakomeje kwibutsa Leta ya Congo kwihutisha inzira yo kubasubiza mu buzima busanzwe ikabacyura mu gihugu nk’uko byari byemejwe mu masezerano y’i Nairobi ku ya 12 Ukuboza 2013.

Aya masezerano yagombaga gutanga imbabazi no gucyura abahoze ari abarwanyi bose ba M23 bahungiye muri Uganda, u Rwanda no mu Burundi.

Gabriel Habineza/Umubavu.com



Tanga igitekerezo kuri iyi nkuru



Igitekerezo