Zanu PF yemeje ko  Mugabe yahiritswe ku butegetsi

Ni nyuma yuko igisirikari cya Zimbabwe cyemeje ku mugaragaro ko Robert Mugabe akuwe ku butegetsi ndetse we n’umuryango we ntibemererwe kuva mu nzu . Kuri ubu, Emmerson Mnangwaga wari uherutse kwirukanwa nka Visi Prezida niwe ugizwe Perezida w’inzibacyuho. Urubyiruko rwa Zanu PF rwiyemeje guhangana n’ingabo.

Kuri televiziyo y’igihugu, ingabo z’igihugu cya Zimbabwe zatangaje ko zafashe ubutegetsi zigambiriye kwigizayo abanyabyaha bari iruhande rwa Perezida Mugabe. Ishyaka ZANU PF ryatangaje ko uwari Visi Perezida, Emerson Mnangagwa uheruka kwirukanwa na Perezida Robert Mugabe ari we ubu wabaye Perezida mu gihe cy’inzibacyuho akigera i Harare.

PNG - 697.8 ko
Igisirikari cyalkajije umutekano mu murwa mukuru Harare


Ni nyuma yuko ishyaka Zanu PF ryari riyobowe na Mugabe ritangaje ko uyu mukambwe yasimbuwe kandi ko Zimbabwe atari umutungo we bwite. Nyamara nubwo bimeze gutya, ingabo z’iki gihugu zemeza ko Robert Mugabe n’umuryango we barinzwe neza nta kibazo cy’umutekano bafite.

Maj Gen Sibusizo Moyo ni we watangaje ko ingabo zafashe televiziyo y’igihugu, ZBC. Yavuze ko abanyabyaha ari bo batumye Zimbabwe yugarizwa n’ibibazo by’ubukungu n’imibereho bityo bakwiye kugezwa mu nkiko.

Ingabo zivuga ko ibi byahereye mu 2015 mu matati yabaye imbere mu ishyaka rya Zanu-PF mu kurwanira ubutegetsi no gusimbura Mugabe w’imyaka 93 akaba amaze imyaka 36 ku butegetsi yagezeho mu 1980.

Uyu musirikare wasomye itangazo kuri TV y’igihugu yavuze ko abaturage ba Zimbabwe bakwiye kuguma mu mahoro gusa bakirinda kugendagenda bitari ngombwa muri ibi bihe, ariko ko abakozi bakomeza imirimo na business zigakomeza mu gihe bagisubiza ibindi mu buryo.

Ikinyamakuru Herald cyaho cyatangaje ko mu bayobozi bakuru batawe muri yombi harimo Minisitiri w’Imari, uw’Uburezi na bamwe mu Bakomiseri bakuru mu ishyaka rya Zanu PF.

Kuri Twitter, ZANU PF yatangaje ko mu ijoro ryakeye Perezida Mugabe n’umuryango we batawe muri yombi bakaba bacungiwe umutekano ku bw’inyungu zo kurengera itegeko nshinga n’isura y’igihugu ngo byari ngombwa ko bibaho.

Ishyaka ryatange ko ZANU PF ndetse n’igihugu cya Zimbabwe atari umutungo bwite wa Perezida Mugabe n’umugore we.

Kuri Twitter bati “Uyu munsi ni intangiriro y’ibihe bishya, kandi inshuti “comrade” Mnangagwa azadufasha kugera kuri Zimbabwe nziza kurushaho.”

Ishyaka Zanu-PF ryatangaje ko nta ‘coup d’etat’ yabayeho ahubwo ko “habayeho guhinduranya ubutegetsi mu mahoro havanwaho abayobozi bamunzwe na ruswa bakanatabwa muri yombi hamwe n’umusaza wari warifatiwe n’umugore we ubu na we ufunze. Abo bacye bari banze gufungwa na bo bafunzwe.”. Amakuru ava muri Zimbabwe ni ay’uko Inyubako Inteko ishinga Amategeko ikoreramo irinzwe n’ingabo ndetse ikaba ifunze.

Trevor Vusumuzi Ncube umunyamakuru uzwi cyane muri Zimbabwe akaba akorera muri Africa y’Epfo, yanditse ko mu bayobozi bakuru bafunzwe harimo Albert Ngulube wari Umuyobozi Mukuru wungirije ushinzwe iperereza na Kudzai Chipanga Perezida w’Urubyiruko rw’ishyaka Zanu PF wari watangaje ejo ku wa kabiri ko bazashyigikira Mugabe, byarimba bagatanga ubuzima bwabo.

Bamwe mu bahagarariye ibihugu byabo mu gihugu cya Zimbabwe basabye abaturage kutava mu ngo zabo bagategereza igihe imvururu zizaba zarangiye. Basabye kandi abanyapolitiki bose kwicara hamwe bagashakira umuti ibibazo byugarije igihugu cyabo cyane ko bishobora gukururira igihugu cyose ibihe by’amage.

Daniel MUKESHIMANA/Umubavu.com



Tanga igitekerezo kuri iyi nkuru



Igitekerezo
mugabi Eugene Kuya 16-11-2017

Birakomeye

mugabi Eugene Kuya 16-11-2017

Birakomeye

mugabi Eugene Kuya 16-11-2017

Birakomeye