Obed yemeje amakuru y’ihunga rye anavuga ko hagati y’urupfu n’ubuzima, yahisemo  ubuzima

Umuyobozi mukuru w’ikinyamakuru "Intambwe ", Obed Ndahayo, aremeza ko atakiri mu Rwanda ko yahunze ariko adashaka kuvuga aho yahungiye kumpamvu z’umutekano we ngo ko hagati y’urupfu n’ubuzima, yahisemo ubuzima ; niyo mpamvu yafashe icyemezo cyo guhunga igihugu.

Uyu munyamakuru Obed Ndahayo, amakuru y’ihunga rye yamenyekanye mu minsi ishize mu bitangazamakuru bya hano mu Rwanda ariko habura gihanya aho ubutumwa bwacicikanye ku mbuga nkoranyambaga ariko hagakemangwa izo mbuga, ubu Obed yamaze gutangaza ko atakiri mu Rwanda yahunze igihugu.

Aragira ati : "Hagati y’urupfu n’ubuzima, nahisemo ubuzima ; niyo mpamvu nafashe icyemezo cyo guhunga". Muri iki kiganiro yagiranye n’ibinyamakuru bikorera hanze y’u Rwanda yavuze ko yakoze mu migara y’intare.

Obed avuga ko yazize ibitekerezo yagiye agaragaza ngo nkaho yavuze ko SACCO y’abanyamakuru igiye kuyoborwa n’abantu batizewe ngo kuko bamwe mu bagaragaje umushinga bari bari mu nkiko bakurikiranyweho uburiganya aha ngo yaje kwandikira urwego rw’abanyamakuru bigenzura (RMC), amenyesha n’izindi nzego zifite aho zihurira n’itangazamakuru ngo anamenyesha Perezida wa Repuburika y’u Rwanda.

Mu nyandiko yanditse agaragazamo aho yanenze raporo y’Ikigo cy’Igihugu cy’Imiyoborere (RGB) yavugaga ko itangazamakuru ryateye imbere kuri 71 %, we aza gutanga igitekerezo kuri Radio Ijwi rya Amerika nk’uko bigaragara muri iyo nyandiko, ati “Icyo gihe nerekanye ko amasoko yose ahabwa ibinyamakuru bya Leta bityo ngaragaza ko tutisanzuye nta n’iterambere dufite.”

Mu bindi, Ndahayo yemera ko yamaganye ubusabe bwa Komisiyo yo kurwanya Jenoside n’Inama Nkuru y’Itangazamakuru basabaga ibinyamakuru byo kuri internet kugenzura ibitekerezo abantu bandika ku nkuru zisohoka mu gihe cyo Kwibuka, ngo hato batazahitisha ibitekerezo birimo ingengabitekerezo ya Jenoside.

Ati “Ibi nabyo narabyamaganye […] ngaragaza ko bigamije kuniga ibitekerezo by’abantu. Icyo gihe nababwiye ko twebwe nta gipimo gipima ingengabitekerezo tugira.”

Urwego rw’abanyamukuru bigenzura mu Rwanda ruvuga ko yakundaga kugera aho rukorera kandi nta kibazo yigeze agaragaza kandi “yari abizi neza ko RMC ari urwego rushobora kurengera umunyamakuru igihe yagize ikibazo.

Ndahayo avuga ko we yajyagayo akababwira ibibazo itangazamakuru rifite.

Umuvugizi wa Polisi y’u Rwanda, ACP Théos Badege, mu minsi ishize yabwiye IGIHE ko kuba uyu munyamakuru yakorwagaho iperereza ntabyo azi cyangwa se kuba yahunze igihugu.

Yagize ati “Kuba yahunze, kuba yakorwagaho iperereza, byose nta na kimwe mbiziho, muzi nk’umunyamakuru nta kindi mperutse.”



Tanga igitekerezo kuri iyi nkuru



Igitekerezo
rurihose Kuya 10-11-2017

arikose ubwisanzure murwanda buzavahe umuntu avuga bakamwirukaho yewe ahaaa imana niyo yokudutabaarada

MUHIRE Kuya 10-11-2017

Ko numvise Rushyashya.net nayo yibasiye uyu munyamakuru ,birenze urugero,uyu munyamakuru we nishyashya ??Nubwo bwose Rushyashya ikunda kwibasira abantu banenga Leta ikarenze urugero ntacyo ibazwa hari aho yibasiye Diane Rwigara n’abandi...,,,,we ngo yagiye yiyandarika n’ibindi biteye isoni ntanditse ,ahandi ngo yabyawe n’umuhutu SVP ni ibyo biyandikiye mfite copy yabyo ,abantu benshi basomye izo nkuru barumirwa
ahubwo sinzi impamvu urwego RMC rutajya rubaza Rushyashya impamvu yandika ibintu nka biriya .Ahari kuri uriya munyamakuru bari bamfite impamvu.Gusa cyera hazagire abazarega RMC n’ikinyamakuru rushyashya tuzabafasha