Museveni ashobora guharurirwa inzira yo kugundira ubutegetsi

Kuri uyu wa mbere tariki ya 18 Ukuboza 2017, Inteko Nshingamategeko y’igihugu cya Uganda yatangiye kwiga ku mushinga w’itegeko ridahurizwaho na benshi, rikuraho imyaka umukandida agomba kuba atarengeje kugira ngo ashobore kwiyamamariza kuyobora igihugu.

Mu gihe itegeko rikuraho imyaka ntarengwa umukandida agomba kuba afite kugira ngo yiyamamarize kuyobora igihugu cya Uganda ryaba ryemejwe n’Inteko Nshingamategeko, Perezida Yoweri Kaguta Museveni yaba yemerewe kongera kwiyamamariza kuyobora iki gihugu ku nshuro ye ya gatandatu ibyo bamwe bavuga yaba aharuriwe inzira yo kugundira ku butegetsi.

Abanyamakuru bo bavuga ko iyi yaba ibaye inzira kuri Perezida Muzeveni yo kumushyigikira kuguma ku butegetsi ubuzima bwe bwose bagendeye ku myaka kuri ubu afite igera kuri 73 yose y’amavuko.

Ibikorwa by’Inteko Nshingamategeko byo kwiga kuri uyu mushinga w’iri tegeko by’uyu munsi, biteganyijwe ko birakurikiranwa imbonankubone (Live) kuri tereviziyo y’igihugu.

Umuyobozi w’Inteko Nshingamategeko yari yavuze ko nta mudepite n’umwe wahirahira ngo asubire kuburabuza igikorwa cy’urwo rwego, ababwira ko uwagerageza gutera akaduruvayo wese yahita ahagarikwa byihuse.

Abashyigikiye umukuru w’igihugu bavuga ko, itegeko rihari ryashyizeho urugero ntarengwa rw’imyaka 75, rivangura mu gihe hari abandi bemeza ko Abanyangihugu benshi badashigikiye iryo hinduka.

Yoweri Kaguta Museveni wavutse tariki ya 15 Nzeli 1944, yagiye ku butegetsi ku itariki ya 29 Mutarama 1986. Mu gihe uyu mushinga w’Itegeko waba wemejwe n’Abadepite, yaba yemerewe kongera kwiyamamariza kuyobora igihugu cya Uganda ku nshuro ye ya 6.

PNG - 357.8 ko
Museveni w’imyaka 73 ashobora kwemererwa kongera kwiyamamariza kuyobora Uganda

Daniel MUKESHIMANA/Umubavu.com



Tanga igitekerezo kuri iyi nkuru



Igitekerezo