Kenya : Bidasubirwaho amatora  ya Perezida azaba  ejo

Komisiyo ishinzwe gutegura amatora mu gihugu cya Kenya, IEBC yatangaje ko amatora ateganyijwe gusubirwamo ejo ku wa kane ku wa 26 Ukwakira azakorwa nta kabuza. Aka kanama gatangaje ibi nyuma y’uko Urukiko Rukuru rubuze umubare wuzuye w’abacamanza bateganywa n’itegeko ngo hasuzumwe urubanza rw’abifuzaga ko aya matora yakongera gusubikwa.

Umucamanza mukuru David Maraga yavuze ko abacamanza babiri gusa aribo babonetse mu gikorwa cyari gutuma aya amatora yongera gusubikwa ku mpamvu zuko akanama gashinzwe gutegura aya amatora katarangiza neza kuyitegura.

Itegeko riteganya ko nibura abacamanza batanu ari bo bemerewe kuba bafata icyemezo runaka mu gihe mu rukiko hari babiri gusa.

Umwe mu bacamanza batari bahari ari we wungirije umucamanza mukuru, ntiyashoboye kujya ku kazi nyuma yaho ushinzwe kumucungira umutekano arashwe n’umuntu utaramenyekena wari witwaje intwaro mu ijoro ryakeye.

Umunyamategeko wo mu mashyaka n’imiryango bitavuga rumwe n’ubutegetsi yavuze ko ibi byatangajwe ari icyemezo cy’iterabwoba gusa.

Raila Odinga, umukuru w’ishyaka rya NASA n’ishuriro ry’amashyaka atavuga rumwe n’ubutegetsi we yavuze ko atazitabira aya matora ya kabiri nk’uko n’ubundi yari yabitangaje mu minsi yashize. Abayoboke be bo mu karere ko mu burengerazuba bw’igihugu kuri ubu bo bakomeje imyigaragambyo ngo kandi nta na gahunda yo kuyihagarika bafite nk’uko Odinga yabivuze ko ahubwo ejo ku munsi w’amatora ari bwo izaba ikaze cyane.

Nubwo bimeze gutya, Perezida Uhuru Kenyatta we yasabye ko aya matora akomeza nta gisibya.

Ibiro ntaramakuru by’Abafaransa(AFP) dukesha iyi nkuru bivuga ko umuyobozi w’iyi Komisiyo, Wafula Chebukati yashimangiye ko aya matora azaba ndetse ko n’abayobozi b’inzego zitandukanye bijeje abanyagihugu umutekano usesuye muri iki gikorwa.

Daniel MUKESHIMANA/Umubavu.com



Tanga igitekerezo kuri iyi nkuru



Igitekerezo