Impamvu nyamukuru ituma Uhuru Kenyatta na Raila Odinga badacana uwaka

Uhuru Kenyatta na Raila Odinga ni abagabo bo mu gihugu cya Kenya badasiba guhora bahanganye mu buryo butandukanye by’umwihariko mu guhatanira umwanya w’umukuru w’igihugu kuri ubu wegukanywe na Uhuru Kenyata mu matora yasubiwemo mu kwezi k’Ukwakira 2017. Igihugu cya Kenya gikomokamo aba bagabo ni igihugu giteye imbere mu bukungu muri Afurika y’Iburasirazuba n’iyo hagati kandi kimaze gutegekwa n’abaperezida bane kuva cyabona ubwigenge mu mwaka wa 1963.

Nyuma y’uko Urukiko Rukuru rwa Kenya rutesheje agaciro intsinzi ya Uhuru Kenyatta yari yabonye mu matora yabaye mu kwezi kwa 8 ruvuga ko aya matora yabayemo uburiganya, nibwo uru rukiko rwahise rutegeka akanama gashinzwe gutegura amatora mu gihugu cya Kenya, IEBC (The Independent Electoral and Boundaries Commission)ko gategurwa amatora mashya atarimo uburiganya akaba ku itariki ya 26 Ukwakira 2017.

Muri aya matora yabaye mu bihe bikomeye by’imyigaragambyo y’abatavuga rumwe n’ubutegetsi niho Uhuru Kenyatta yongeye kwegukana intsinzi ku majwi 98% mu gihe uwo bahora abahanganye Raila Odinga we wari watangaje ko yikuye mu matora yabonye 0,96%.

Nyuma y’ubwumvikane buke burangwa hagati ya Uhuru Kenyatta na Raila Odinga by’umwihariko mu guhatanira umwanya w’umukuru w’igihugu cya Kenya, byatumye Umubavu.com tubakorera ubushakashatsi ku matora yabaye muri iki gihugu kuva cyabona ubwigenge mu mwaka wa 1963.

Abanya-Kenya batangiye kwitabira amatora y’umukuru w’igihugu kuva mu mwaka wa 1920 aho muri icyo gihe batoraga abagize Inteko Nshingamategeko.

Muri iki gihe, abazungu ni bo bakomeje kugenda batorwa, kandi basimburanwa ku ntebe y’ubuyobozi bwa Kenya kugeza yigobotoye ingoyi y’abakoloni mu 1963.

Kenya ni igihugu cyabonye ubwigenge mu w’1963 maze si ukubyinira ku rukoma karahava. Nyuma yo kwigobotora iyi ngoma y’abakoloni nibwo Jomo Kenyatta yahise aba Perezida wa mbere wa Kenya, ahagarariye ishyaka Kenya African National Union, ishyaka rukumbi ryanakomeje kwigarurira imyanya yose y’Inteko Ishinga Amategeko.

Nyuma y’umwaduko w’amashyaka menshi ya politiki mu myaka ya za 1990, nibwo mu matora rusange yabaye mu mwaka wa 1992, Daniel Arap Moi yatsinze amatora aho yari ahagarariye ishyaka rya KANU agahita asimbura Jomo Kenyatta ku butegetsi.

Nyuma y’iyi manda, Daniel Arap Moi yongeye gutorwa mu 1997, maze muri 2002 Uhuru Kenyatta umukandida wa Kenya African National Union akubitwa inshuro na Mwai Kibaki wari uhagarariye National Rainbow Coalition.

Budakeye kabiri muri 2005, habaye Referendumu maze mu matora ya 2007, Raila Amolo Odinga wahoze ashyigikiye Mwai Kibaki amuvaho batavuze rumwe.

Nyuma kandi mu mwaka wa 2012, haje kuba amatora aho Odinga wari umaze igihe yiyomoye kuri Kibaki yahanganye na Uhuru Kenyatta, maze Kenyatta aramwanikira ku ntsinzi y’amajwi 50.5%.

Nyuma yuko yegukanye intsinzi, Uhuru Kenyatta yahise ahuza imbaraga na William Ruto, kuko bombi bashakishwaga n’Urukiko Mpuzamahanga Mpanabyaha rwo mu Buholandi, bakekwaho uruhare mu bwicanyi n’imvururu byakurikiye amatora yo muri 2007.

Ibitabo bitandukanye bivuga ku mateka ndetse n’impuguke mu mateka n’imiterere y’ibihugu, bigaragaza ko politiki ya Kenya ishingiye ku moko azwi nka tribues n’ubundi asanzwe agaragara muri iki gihugu.

Impamvu nyirizina ituma Raila Amolo Odinga na Uhuru Muigai Kenyatta batajya bacana uwaka byo bisobanurwa ko ari amakimbirane akomoka mu miryango, mu mateka ya kera, kuko Se wa Raila Odinga ariwe Jaramogi Ajuma Oginga Odinga yabaye visi perezida wa Jomo Kenyatta igihe cyose yamaze ategeka Kenya.

Nyuma y’aho amatora abereye ku itariki ya 8 Kanama 2017, maze Uhuru Kenyatta akayatsinda, we na visi perezida we William Ruto bagitangira kwishimira intsinzi kuko bari bagaritse Raila Odinga, Odinga ubwe ahita atangaza ko atishimiye ibyavuye mu matora maze mu gacu gato urukiko rukuru ruvuga ko azasubirwamo tariki ya 26 Ukwakira.

Itariki yo gusubirwamo kw’amatora mbere ho iminsi 16, nibwo Odinga yatangaje ko akuyemo kandidatire ye maze avuga ko atazahatana na Kenyatta.

Nyuma y’aya matora nkuko byari binamaze iminsi biba mbere yayo, imvururu zakomeje kwaduka abatavuga rumwe n’ubutegetsi bakigaragambya, abantu bakicwa, kandi icyuka cy’icyoba cyarakwiriye batinya ko hakwaduka intambara, ndetse ubu abanya-Kenya bamwe bahungiye mu Bugande.

Ni ku nshuro ya mbere ku mugabane wa Afurika byari bibaye, aho Perezida w’Urukiko Rukuru atesha agaciro amatora akanategeka ko asubirwamo, kandi Perezida yayatsinze byanatangajwe n’akanama gashinzwe gutegura amatora mu gihugu.

Igihugu cya Kenya cyabaye icya mbere muri Afurika ndetse n’icya gatatu ku Isi nyuma y’ibirwa bya Maldives byasheshe amatora muri 2013 na Autriche muri 2016.

Daniel MUKESHIMANA/Umubavu.com



Tanga igitekerezo kuri iyi nkuru



Igitekerezo