SIFA Rewards igiye kuzajya ihemba abakozi ba Leta n’abanyamahanga bakoze ibikorwa by’indashyikirwa

Mu ijoro ryo kuri iki Cyumweru, tariki ya 1 Ukwakira 2017, abantu ku giti cyabo,abanyamadini, ibigo bya Leta n’iby’igenga byakoze ibikorwa by’indashyikirwa mu gisata cy’iyobokamana byahawe ibihembo bizwi nka ‘Sifa Rewards’ mu birori byabereye muri Mariott Hotel.Ubuyobozi bw’ikigo Isange Corporation butegura ibi bihembo buvuga ko bugiye kwagura iki gikorwa ku buryo n’abakozzi ba Leta ndetse n’abanyamahanga bakoze ibikorwa byiza bazajya bahembwa.

Sifa Rewards ni ibihembo bitangwa buri aho kuri ubu ibi bihembo bitanzwe ku nshuro ya 5 ahahembwe abantu mu byiciro binyuranye bakoze ibikorwa by’ivugabutumwa byagize uruhare mu guhindura umuryango nyarwanda.

Abahawe ibi bihembo bose uko ari 15 bari mu byiciro bitandukanye, bose bagaragaje ko bishimiye ko hari ababonye ko bakoze neza kugeza n’aho bahabwa ibihembo ndetse banashimangira ko bagiye kongera imbaraga mu gukomeza gukora ibikorwa bifitiye akamaro umuryango nyarwanda.

Umuyobozi wa Isange Corporation itegura iki gikorwa, Ntigurirwa Peter, yatangaje ko Sifa Rewards iri kugenda itera imbere ugereranyije no mu myaka yatambutse anavuga ko mu myaka iri imbere bazagura iki gikorwa ku buryo bazagiha imirongo migari maze hakajya hahembwa n’abakozi ba Leta ndetse n’abanyamahanga bakoze ibikorwa by’indashyikirwa .

Yagize ati “[…] Ubutaha tuzashyiramo naba rwiyemezamirimo ahubwo babandi bakozze ibintu bihambaye cyane ku buryo na sosiyete iba ibazi muri rusange. Abatanze imisoro neza,,, ni ukuvuga ngo tuzafata iki gikorwa tugihuze n’imirongo migari ya Leta , noneho ku buryo na leta izisanga mu gikorwa itabizi.”

Yakomeje avuga ko uko iki gikorwa gikura ari nako kigenda kigira imbaraga mu bijyanye n’ubushobozi akaba ari naho aheraho ashimangira ko ubutaha bizagenda neza kurushaho ku kizaba igikorwa mpuzamahanga.

Yagize ati “Uko igikorwa gikura ni nako natwe tugenda tubona ubushobozi ndibaza ko ubutaha muzabona impinduka kuri iki kintu.Ikijyanye no kucyagura ku rwego mpuzamahanga cyo turakirwaye… Igikenewe ni ukuzamura ibikorwa by’urukundo kuko benshi bibabera imbaraga zo kunoza imikorere.”

Sifa Rewards yatangiye gutangwa mu 2013, icyo gihe ihabwa Umuyobozi w’Itorero ry’Abadiventisiti b’Umunsi wa Karindwi mu Rwanda, Byiringiro Esron, iza kugenda yaguka buri mwaka ihabwa n’abandi bayobozi b’amatorero, abahanzi, ibigo bya leta n’iby’igenga.

Urutonde rw’abahawe ibihembo muri Sifa Rewards 2017 :

1. Urwego rw’Igihugu rushinzwe Imfungwa n’Abagororwa (RCS) : Rworohereje ibikorwa by’ivugabutumwa mu magereza.

2. Umuryango wa Gikirisitu Caritas Rwanda : Wagize uruhare mu iterambere ry’abaturage.

3. Umuryango wa Gikirisitu ADRA Rwanda : Ushimwa ko wafashije impunzi.

4. Amasezerano Community Banking : Ikigo cy’Imari cya Gikirisitu cyagize uruhare mu guhindura ubuzima bw’abaturage.

5. Lycée Notre dame de Cîteaux : Ishuri ryagize uruhare mu burezi bw’umwana w’umukobwa.

6. Pasiteri Nyamutera Joseph uyobora Rabagirana Ministries : Yagize uruhare mu gutangiza imishinga igamije kubaka isanamitima, ubumwe n’ubwiyunge.

7. Umuryango Women Foundation Ministries : Uruhare wagize mu kuremera abatishoboye binyuze mu gikorwa cya ThanksGiving.

8. Bishop Margret Rwandamura : Umugore wagize uruhare rukomeye mu ivugabutumwa ryo kuri radiyo.

9. Korali Seraphim Melodies (AEBR) : Uruhare igira mu gikorwa cyo gutanga amaraso ku bayakeneye by’umwihariko mu bitaro bya CHUK.

10. Itorero Inkurunziza : Yatangije amasengesho yo mu gihe cy’ikiruhuko cya saa sita- Lunch Hour

11. Musenyeri Kolini Emmanuel : Yasigasiye ubusugire bw’Itorero ry’u Rwanda.

12. Prof Dr Rwigamba Balinda : Rwiyemezamirimo wa mbere watangije Kaminuza Yigenga ya Kigali (ULK) akanafasha abatishoboye abishyurira.

13. Rugamba Cyprien : Umuhanzi wahimbye ibihangano bikoreshwa cyane mu iyogezabutumwa no muri Sosiyete Nyarwanda.

14. Radio Rwanda : Radio ya mbere yafashije ubutumwa bwiza kwamamara.

15. Africa College of Theology (New Life Bible Church) : Ishuri rya tewoloji rifite ireme ry’uburezi.



Tanga igitekerezo kuri iyi nkuru



Igitekerezo