Umwaka wa 2017 wari uw’amagorwa no kurwana inkundura muri ADEPR

Mu mateka y’Itorero rya ADEPR, umwaka wa 2017 uzahora mu mitwe ya bamwe nk’isereri ry’ibibazo by’ingutu banyuzemo mu gihe abandi bawufata nk’intangiriro y’agahenge ku bibazo byari byugarije itorero. Kuri ubu, ADEPR ifite abakirisitu basaga miliyoni ebyiri mu Rwanda.

Mu ntangiriro za Mutarama 2017, icyavugwaga muri paruwase zose 401 za ADEPR ni imisanzu yo kubaka inyubako ya Dove Hotel, umwe mu mishinga migari ibyara amafaranga iri torero rifite. Imigirire n’uburyo byakorwagamo hari abakirisitu bagaragaje kubyinubira ariko bavugira mu matamatama badashaka kwerura ngo hato batavaho biteranya.

Hadaciye kabiri humvikanye Komisiyo yiyise Nzahuratorero yaje igaragaza inyota yo kurwana ishyaka bashaka gusubiza ku murongo imiyoborere bagaragazaga ko irimo ibibazo.

Iki cyabaye nk’ikizanye urujijo mu bakirisitu ariko benshi bararuca bararumira bemera gukomeza kuyoborwa n’abashumba baragijwe n’Imana nkuko byari mu myemerere n’imyizerere byabo.

Abakirisitu bagerageje kugaragaza ko bashyigikiye ibitekerezo bya Nzahuratorero bashyizwe inyuma y’itorero, bamwe barahagarikwa abandi bahezwa muri gahunda za ADEPR ku buryo hari abagiye nka nyomberi.

Uko iminsi yahitaga niko amakuru mashya yarushagaho gusakara mu bice byose by’urwa Gasabo ahanini ashingiye ku ijwi ryahanitswe ku ikoreshwa ry’umutungo mu itorero abagize Komisiyo Nzahuratorero bagasaba impinduka zihutiyeho nk’iturufu rukumbi babonaga ryashyira iherezo ku bibazo uruhuri byari bihari.

Komisiyo Nzahuratorero mu nyandiko yayo yashinje Komite yari iyobowe na Bishop Sibomana na Bishop Tom Rwagasana guhatira abakirisitu gutanga amafaranga y’imishinga y’itorero, kwiha ububasha bw’ikirenga no kwaya umutungo wa ADEPR.

Komisiyo Nzahuratorero yitabaje Urwego rw’Igihugu rw’Imiyoborere (RGB) rushinzwe gukurikirana imikorere y’amatorero n’imiryango ishingiye ku idini, ihabwa inama yo gukemurira ikibazo cyayo na ADEPR mu nzego zibareberera.

Komite yashinjwe gutanga inka za baringa muri Musanze

Komite Nzahuratorero yahishuye uko ubuyobozi bwa ADEPR bwatanze inka za baringa muri gahunda ya Girinka ku bayoboke b’iri Torero bo mu Karere ka Musanze. Iyi Komite yagaragazaga ko ayo makosa akwiye gusabirwa imbabazi mu maso y’Abanyarwanda.

Muri iki gihe, ADEPR yahumurizaga abayoboke bayo ibabwira ko nta bibazo bihari ndetse itorero ritigeze rizahara nk’uko byavugwaga.

JPEG - 92.9 kb
Bishop Tom RWAGASANA wahoze ari umuvugizi wungirije wa ADEPR


Uruhererekane rw’ibibazo byavugwaga muri ADEPR n’amakuru yumvikanaga mu mpiga z’imisozi itatse urwa Gasabo nk’amashya mu matwi ya benshi yatumye n’inzego z’umutekano zinjira muri iki kibazo zitangira gukora iperereza ryimbitse.

Muri ADEPR zahinduye imirishyo

Muri Gicurasi inzego za Polisi n’ubushinjacyaha zinjiye muri dosiye yari imaze gufata indi ntera aho wasangaga mu bayoboke ba ADEPR hari umwuka utari mwiza. Byaje nk’ibitunguranye ndetse benshi basa n’abaguye mu kantu kubona abakuru b’itorero bafatwa bakagezwa imbere y’ubutabera.

Ku ikubitiro hafashwe Eng. Sindayigaya Théophile;Umuyobozi Mukuru wari ushinzwe Imari, Gasana Valens n’uwitwa Mutuyemariya Christine wari ushinzwe Ubutegetsi n’Imari.

Aba bakurikiwe n’uwari Umunyamabanga Mukuru wa ADEPR, Rev. Sebagabo Bernard na Pasiteri Niyitanga Straton wari Umunyamabanga wihariye mu Biro bya Bishop Tom Rwagasana na we wahise atabwa muri yombi agakurikirwa na Bishop Sibomana Jean wari umuvugizi wa ADEPR. bose bakurikiranyweho ibijyanye no gukoresha nabi umutungo w’Itorero aho baregwa ko hagati ya 2015 na 2017 banyereje miliyari 2 530 395 614 Frw yatanzwe n’abakirisitu mu misanzu ngo hishyurwe umwenda wa BRD urenga miliyari eshatu watanzwe hubakwa Dove Hotel ya ADEPR.

Amatora yateguwe igitaraganya, bamwe bashaka kwiyimika

Abagize Biro Nyobozi ya ADEPR bamaze gufatwa abagize Inteko Rusange ya ADEPR, barateranye ku ya 30 Gicurasi 2017, batora Rev. Karuranga Ephrem nk’Umuvugizi w’itorero mu gihe cy’inzibacyuho.

Yatowe hamwe n’Umuvugizi Wungirije Rev. Karangwa John; Umunyamabanga Mukuru, Pasiteri Ruzibiza Viateur; Ushinzwe Imari n’Ubutegetsi, Umuhoza Aulerie; Umujyanama aba Pasiteri Nsengiyumva Patrick.

JPEG - 71.2 kb
Uwari umuvugizi wa ADEPR mu Rwanda, Bishop SIBOMANA Jean


Rev Karuranga wari Umushumba Wungirije mu Rurembo rw’Amajyaruguru yaratunguranye kuko mu bahabwaga amahirwe atigeze avugwamo. Mbere y’amatora mu banugwanugwaga harimo Rev. Rurangirwa Emmanuel; Pasiteri Uwabimfura Modeste wakunze kugaragaza ibibazo byari muri Komite yegujwe; Dr.Basabose Jean de Dieu wayoboye Komisiyo Nzahuratorero na yo yagize uruhare mu gushaka impinduka muri ADEPR; Rev. Karuranga Edouard n’abandi barimo Rev. Masumbuko Josué; Rev. Nsengiyumva Laurien na Rev. Mutaganzwa Viateur.

Nyuma y’amezi asaga abiri abari abayobozi ba ADEPR batawe muri yombi bagiye bafungurwa by’agateganyo umwe umwe. Bakimara kugera hanze bakirijwe amabaruwa abambura inshingano za gipasiteri, ariko na bo bahita basubiza bagaragaza ko uburyo byakozwemo bubaharabika.

Ihererekanyabubasha rya Nyobozi nshya n’abambaye impuzankano z’abagororwa

Mu gitondo cyo ku wa 2 Kamena 2017, nibwo byari biteganyijwe ko Biro Nyobozi nshya ya ADEPR ishyikirizwa ububasha ariko umuhango ntiwasojwe neza. Icyo gihe abari abayobozi bari mu maboko y’ubutabera, basohowe muri gereza bajya guhererekanya ububasha na Biro Nyobozi iyobowe na Rev Karuranga Ephraim.

Ubwo Igihe cyandikaga iyi nkuru, amakuru yavugaga ko ihererekenyabubasha ryacumbikiwemo hagati na bugingo n’ubu rikaba ritarasojwe neza.

Abayobozi ba ADEPR batawe muri yombi bagafungwa baje kurekurwa gusa ubushinjacyaha buzajya bubahamagara mu gihe bakenewe.

JPEG - 193.1 kb
BASABOSE Jean de Dieu, Umuyobozi wa Komisiyo Nzahuratorero
JPEG - 172.2 kb
Dove Hotel, umwe mu mishinga yateje impagarara muri ADEPR
JPEG - 160.4 kb
Abari abayobozi ba ADEPR bagiye guhererekanya ububasha bambaye impuzankano y’abagororwa
JPEG - 94.7 kb
Uhereye ibumoso: Pasiteri Nsengiyumva Patrick, Umuhoza Aulerie, Pasiteri Ruzibiza Viateur, Rev. Karangwa John na Rev. Karuranga Ephraim ari nawe muvugizi mushya wa ADEPR nyuma y’amatora yo ku wa 30 Gicurasi 2017.
JPEG - 136.9 kb
Rev. Karuranga Ephraim, Umuvugizi mushya w’Itorero rya ADEPR mu Rwanda

Daniel MUKESHIMANA/Umubavu.com


Travel for Free!


Tanga igitekerezo kuri iyi nkuru



Igitekerezo