U Burundi bwongeye gushotora u Rwanda

Kuva mu 2015 ubwo mu Burundi hageragezwaga umugambi wo guhirika ubutegetsi, umubano wabwo n’u Rwanda wajemo ibibazo, birenga dipolomasi bigera no mu buhahirane hagati y’ibihugu, bishingiye ku birego u Burundi butigeze butangira ibimenyetso simusiga.

Learn how to Thrive

Nyamara uyu mwuka mubi usa n’urenga abaturage b’ibihugu byombi ugasigara mu bayobozi b’icyo gihugu gusa, kuko nubwo babwirwa ko u Rwanda rubanga, biragoye kugenda mu murwa mukuru i Kigali ukamara isaha utarabona imodoka y’umurundi, cyangwa ngo nujya mu misa, mu isoko cyangwa mu kabari utahe utumvise aho ayaga.

U Burundi bwongeye kuzamura ibirego nyuma y’Abarundi 2500 baheruka kuva muri Repubulika Iharanira Demokarasi ya Congo (RDC) basaba ubuhungiro mu Rwanda ariko bakanga kubahiriza ibyo basabwa ngo babuhabwe.

Bivugiye mu majwi aranguruye ko aho gukora ibinyuranye n’ibyo Umubyeyi wabo Bikiria Mariya yabategetse baremera bagasubira i Burundi, ubuyobozi bw’icyo gihugu buti babohereje kuko banze kwinjizwa mu mitwe y’abarwanyi!

Uko Abarundi babona u Rwanda ntibihura n’Abategetsi babo

Nyuma yo gutoteza itsinda ry’Abarundi bafite amahame akomeye ashingiye ku myemerere ikomoka ku mukobwa Eusébie Ngendakumana bita ‘Zebiya’ wavugaga ko yabonekewe na Bikira Mariya, wavukiye mu gace kitwa Businde mu Ntara ya Kayanza, Abarundi ibihumbi baje guhungira muri Repubulika Iharanira Demokarasi ya Congo mu myaka ine ishize.

Mbere yo guhunga, Kiliziya Gatolika yanze kwemeza amabonekerwa ya Ngendakumana ahubwo ihagarika ibikorwa bye ndetse na leta ibyinjiramo, hacibwa iteka ko nta muntu uzongera gusengera ku musozi wa Businde bahuriragaho, ahubwo ahafatwaga nk’ahantu hatagatifu leta ihubaka ikigo cy’imyitozo cya gisirikare.

Byakuruye ugushyamirana, muri Werurwe 2013 haba umunsi ukomeye ubwo aba bakirisitu bageragezaga kwegera umusozi wa Businde bajya gusenga, polisi irabatangira bateye hejuru ibarasamo urufaya abenshi barapfa abandi barakomereka.

Uwari Minisitiri w’Umutekano, Edouard Nduwimana, yahise agera aho byabereye, imbere y’imbaga y’ababoroga n’imirambo bayoroshe ibitenge, ahavugira amagambo akomeye ati “Abamaritiri mwavugaga ko mushaka uyu munsi murababonye. Abantu barahaguye, aya maraso abe aya nyuma kuri uyu musozi.”

Abarokotse bakwiye imishwaro bahungira muri Congo, naho baza guhangana n’inzego zishinzwe umutekano zibarasaho, abagera kuri 38 bahasiga ubuzima maze abagera ku 115 barakomereka.

Muri Congo banze kwibaruza mu ikoranabuhanga bavuga ko bishingiye ku kwemera kwabo, ubuyobozi bwa Congo buberurira ko nibabyanga burundu burasenya inkambi yabo, ubundi utabishaka agasubira i Burundi kuzana pasiporo ye, kandi icyo gihe nta biribwa bakomeza guhabwa cyangwa amazi.

Kubona ibyangombwa ngo byagombaga gutuma bajya kuzuza ibyo basabwa mu nzego z’abinjira n’abasohoka, bagasaba kuba muri Congo nk’abimukira basanzwe.
Umuvugizi wabo Dionyse Nyandwi yahamije ko batasubira i Burundi, ati “Mu Burundi twaratotejwe bikomeye kubera ukwemera kwacu guhera mu 2012 no mu 2013 kuwa 12 Werurwe, hari abantu 10 bishwe n’abapolisi, itotezwa rirakomeza kugeza ubwo abayoboke bafashe iy’ubukungiro.”

Nubwo igihugu cyabo gifata u Rwanda nk’ahatagendwa, Nyandwi yeruye ko bigiriye inama yo guhungira mu Rwanda bizeye ko bazakirwa neza “kuko tuvuga ururimi rumwe tukagira n’umuco umwe”.

Impamvu zo kuva mu Rwanda si ibanga

Kuvuga ururimi rumwe ntibyari bihagije gusa ngo bahabwe ubuhunzi, kuko nubwo impunzi zakirwa, umutekano w’abo zisanga uza imbere.

Mu itangazo ibiro bya Perezida Pierre Nkurunziza byashyize ahagaragara kuri uyu wa Gatatu, Umuvugizi wa Guverinoma y’u Burundi Philippe Nzobonariba yavuze ko izi mpunzi zirukanwe mu Rwanda ku mpamvu zitigeze zivugira mu ruhame, nyamara bizwi ko zitarya iminwa.

Ku wa 1 Mata 2018 wari umunsi mukuru wa Pasika, umunsi u Rwanda ruha icyubahiro kuko mu minsi cumi n’itanu y’ikiruhuko abakozi bagira buri mwaka, ibiri yose ifitanye isano nawo. Nyamara abayobozi ku ruhande rw ‘u Rwanda ntibaryamye kuva ku munsi wabanje bazinduika ngo bamenye abatashye, kugeza no ku kubaherekeza ku mupaka wa Nemba-Gasenyi.

Nubwo u Rwanda rwabafashije gusubira iwabo, nta muyobozi w’u Burundi wari waje kubakira, cyakoze imodoka nini u Rwanda rwabahaye ngo zibageze ku mupaka zibavanye mu nkambi y’agateganyo ya Gashora, izarimo imizigo zemerewe kwambuka umupaka metero nke ngo ziyirenze urubibi, zihita zikata.

Bageze ku gice cy’u Burundi bakajya kwicara munsi y’ibiti, bategereje ko babona uko bava aho ku izuba ry’igikatu.

Nzobonariba we ati «Mu makuru ya mbere yatanzwe n’aba bacyuwe ku ngufu, birukanywe n’u Rwanda kuko banze kwinjizwa mu mitwe yitwaje intwaro igamije gutera u Burundi, abakiri bato bashobora kuba bagera ku gihumbi barimo abahungu n’abakobwa ubashyize hamwe, bari babagumanye ngo bashyirwe ku ngufu mu mitwe y’abagizi ba nabi.»

Nyamara mu guherekeza abo barundi 1607 ba mbere, hahise hatangazwa ko mu nkambi y’agateganyo za Nyanza na Nyarushishi, ababishaka batangiye kwiyandikisha ngo bafashwe gusubira iwabo. Mu gitondo cyakurikiye niko byagenze kuko Abarundi 517 bari i Nyanza bafashijwe gutaha banyuze ku mupaka wa Akanyaru.

Hari n’Abarundi bagera kuri 33 baherukaga gutabwa muri yombi bashinjwa kugumura bagenzi babo, nabo bararekuwe basubizwa mu Burundi hamwe na bene wabo.

Nyamara Nzobonariba, we yavuze ko batashye nyuma y’amagambo menshi y’abari batandukanyijwe n’imiryango yabo, “banyujijwe indi nzira: 514 banyuzwa mu mupaka w’Akanyaru naho 318 banyuzwa ku mupaka wa Ruhwa.”

Yongeyeho ati “Ubuyobozi bw’u Burundi buri kugenzura neza imyirondoro yabo kugira ngo burebe ko aribo bari gutakwa n’imiryango yabo ko bababuze.”

Ugutandukanywa kw’izi mpunzi kwakozwe mu mucyo, kuko nyuma y’ibyumweru bibiri bageze mu Rwanda uko basagaga 2500 batagumishijwe mu nkambi y’agateganyo ya Nyarushishi i Rusizi aho binjiriye, ahubwo basaranganywa mu nkambi z’agateganyo za Gashora mu Bugesera, iya Nyanza n’iya Nyarushishi.

Ubwo byakorwaga, Umujyanama wa Minisitiri ku bijyanye n’impunzi muri Minisiteri ishinzwe impunzi no gucunga ibiza, Ngoga Aristarque, yabwiye IGIHE ati “ni ukugira ngo bajye ahantu bakwiriye kuko ni benshi ugereranyije n’ubushobozi bw’aho bari bari.”

Kuba bari barakiriwe mu nkambi z’agateganyo zitandukanye, ubwabyo bigaragaza neza ko batari kwinjirira mu gihugu icya rimwe, ahantu hamwe.

U Burundi ntibwumva ikibazo cyo kutibaruza

Nzobonariba yatangaje ko kuri Guverinoma y’u Burundi, kuba barasubijwe mu gihugu cyabo ngo kuko banze kwibaruza mu ikoranabuhanga nta shingiro bifite, nyamara ubwo impunzi za mbere zagendaga, Umunyamabanga Uhoraho muri MIDIMAR, Kayumba Olivier yavuze ko izi mpunzi zashoboraga gutera ikibazo zidakingiwe.

Yagize ati " Ejo batubwiye ko bafunze imizigo, tubabaza icyo bashaka bati turashaka gusubira mu gihugu cyacu nta kindi. Ibyangombwa kugira ngo babone ubuhungiro basanze badashobora kubyuzuza. ”

“Ibyo byangombwa birimo kubarurwa mu buryo bugezweho, icya kabiri bangaga ko abana babo babona inkigo zikenewe zo kugira ngo babeho, icya gatatu ni uko badashaka ko tubasuzuma mu ndwara zose baba bafite. Dufite abarwayi b’igituntu, dufite abarwayi ba malaria, dufite abarwayi batandukanye, hari n’inkomere bose banze ko tubavura."

Gutaha ku bushake byanashimangiwe na bamwe mu Barundi bari mu nzira bataha, nka Ntamagendero Lusticus, wavuze ko bahisemo gutaha kuko badashaka ko u Rwanda rubakorera ibitajyanye n’imyemerere yabo.

Yabwiye IGIHE ati "Ubu turatashye, na mbere baduhoraga gusenga gusa, duhorana ishapure ni ukwivugira Ndakuramutsa Mariya gusa, umubyeyi wacu ahora adusaba kumwizera kandi tugakorera Imana by’ukuri, kugira ngo turonke ubuzima bw’ijuru."
"Mu busanzwe kutabarurwa, kuvurwa, tubyakira nk’uko twari tubayeho kuko umubyeyi yatubwiye ati burya rero hari imiti usanga ishobora kwica ubuzima, muzajye mureba neza ntimuzajye muyakira.

Imvugo ya Guverinoma y’u Burundi isa no gushaka kwikuraho ikimwaro cy’uburyo yatumye abaturage bayo bajya mu buhungiro igashiduka bayigarukiye, hakiyongeraho kuba itaragiye kubakira ku gihe kandi ari abaturage bayo bari batahutse.

Ni mu gihe mu Rwanda bari bakiriwe neza nkuko byanashimangiwe na Regina Pacis Nduwimana waganiriye na IGIHE ahetse agafuka ke, icyo gihe yari muri metero nke ngo asubire mu gihugu cy’amavuko.

Ati "Ibyabaye byose ni ukwemera kwacu, bikomoka ku masengesho yacu, ntitwemera ibyo badutera tutabirekuriwe. Itegeko riva mu ijuru, byanditse muri Bibiliya mu byahishuriwe Yohani."

"Mu Rwanda batwakiriye neza cyane ariko kubera ko bashatse kutugirira ibyo ukwemera kwacu kutemera, ntitwabishatse, duhisemo gusubira i Burundi iwacu."

PNG - 788.3 kb
Ku Cyumweru, u Rwanda rwashyikirije u Burundi impunzi zirenga 1600, ku munsi ukurikiyeho izigera kuri 517 nazo zisubira ku ivuko ryazo

@Umubavu.com


Travel for Free!


Tanga igitekerezo kuri iyi nkuru



Igitekerezo