Menya amwe mu magambo akomeye yavuzwe n’umwami Salomo  uvugwa muri Bibiliya avuga ku bagore

Umwami Salomo mwene Dawidi na Betisheba, ni umwe mu bami bakomeye batwaye igihugu cya Isirayeli mu buryo butangaje bitewe n’ubwenge n’ubuhanga bidasanzwe yari yarahawe n’Imana ubwo yamusabaga kugira icyo ayisaba akihitiramo “Ubwenge n’Ubuhanga” ntasabe ibindi. Ibi ushobora kubisoma muri Bibiliya Yera muri iyi mirongo : 2 Ngoma 1.3-12, 1 Abami 3.1-15 ; 10.26-29.

Bitewe n’ubwenge n’ubuhanga umwami Salomo yari yarahawe n’Imana kurusha undi mwami wese mu bamubanjirije ndetse no mu bamukurikiye, hari amwe mu magambo akomeye yagiye avuga by’umwihariko avuga ku bagore ahanini ashaka kuvuga ko umugore w’ingeso nziza ari ingenzi cyane ariko kandi yaba uw’ingeso mbi bikaba ibindi.

Aya ni amwe mu magambo akomeye yavuzwe n’umwami Salomo avuga ku bagore :

Mu gitabo cy’Imigani 11.22 : “Umwami Salomo yagize ati “Umugore w’uburanga bwiza utagira umutima, ni nk’impeta y’izahabu ikwikirwa mu mazuru y’ingurube”.

Mu Imigani 12.4 : “Umugore w’ingeso nziza abera umugabo we ikamba, ariko ukoza isoni ni nk’ikimungu kiri mu magufwa ye”.

Imigani 21.9 : “Kuba mu gakinga k’urusenge, biruta kubana n’umugore w’ingare mu nzu y’inyumba”.

Imigani 21.19 : “Kwibera ku gasozi kadatuwe, kuruta kubana n’umugore w’umwaga utera intonganya”.

Aya kandi nayo ni amwe mu magambo akomeye abagore basubije Salomo (Yakuwe mu bitabo bitari Bible) :

1. Aho kubana n’umugabo ugucyuriraho abandi bagore buri munsi byarutwa no kugwa ku ishyiga.

2. Aho kubana n’umugabo ukubwira amagambo meza,hanyuma akayabwira n’abandi bagore, byarutwa ukabana n’ikiragi.

3. Aho kubana n’umugabo ukureba neza akareba neza n’abandi bagore n’abakobwa, byaruta ukabana n’impumyi.

4. Aho kubana n’umugabo w’umukire uguha byose yarangiza akagusiga mu nzu akajya mu bandi bagore, byaruta ukabana n’umukene mushakana dukeya mukanadusangira.

Ibi byose ni ibigaragaza ko umugore, umugabo ndetse n’abantu bose muri rusange bakagombye kurangwa n’ingeso nziza kuko ari byo bituma umuryango urushaho gukomera haba mu buryo bwo kubaha Imana ndetse no mu buzima busanzwe bwa muntu.

Daniel MUKESHIMANA/Umubavu.com



Tanga igitekerezo kuri iyi nkuru



Igitekerezo