Kigali : Umukirisitu wari umaze icyumweru yiyiriza mu cyumba cy’amasengesho kwa Masasu yapfuye

Mu mpera z’icyumweru gishize nibwo humvikanye amakuru ko umwe mu bakirisitu bo mu itorero rya Restoration Church riherereye i Masoro yaba yaritabye Imana azize inzara yari amaranye iminsi kubera ibihe by’amasengesho yarimo.

Amakuru yageze kuri IGIHE dukesha iyi nkuru ni uko uwo mukirisitu witwa Bizimana Bertrand, yasengeraga muri icyo cyumba amazemo iminsi irindwi n’amajoro arindwi, bimuviramo gupfa amarabira.

Ngo byabaye mu masengesho yari amaze icyumweru abera kuri urwo rusengero ku wa Gatanu w’icyumweru gishize, tariki ya 29 Ukuboza 2017.

Nyuma y’aya makuru, iki kinyamakuru kivuga ko cyahamagaye abayobozi b’itorero barimo Umuyobozi Mukuru waryo mu Rwanda, Apôtre Ndagijimana Joshua Masasu n’umuyobozi w’irya Masoro, Pasitori Kamanzi Marcillin ntibabasha kwitaba telefoni.

Ubwo IGIHE yageraga aho iryo torero ryubatse i Masoro mu rwego rwo gutohoza amakuru y’ukuri, ivuga ko yahasanze umusaza usa n’ukuze uri nko mu myaka 50 ababwira ko ahasengera ndetse ko akunze kuba ahari, ariko ko ibyo bitigeze biba. Yagize ati “Amasengesho yo hano arahahora, niba hari urusengero rusenga uru rubamo ariko ibyo ntabwo byigeze bihaba, ntabyo nzi rwose kandi nta kintu cyaba ngo mbure kukimenya.”

Undi mukobwa wasohokaga mu rusengero yavuze ko nawe ahasengera ariko ko ayo makuru atigeze ayamenya, ati “Ayo makuru ntayo nzi.”

Undi winjiraga mu muryango w’urwo rusengero, yavuze ko ibyo byabaye ariko avuga ko uwo muntu ataguye mu rusengero ahubwo ko yari asanzwe afite ikibazo cy’umutima bamujyana kwa muganga aba ari ho agwa.

Ati “Uwo muntu ntabwo yapfiriye mu rusengero ahubwo yagize ikibazo tumujyana kwa muganga aba ariho apfira, ntabwo byabereye hano.”

Umuvugizi wa Polisi mu Mujyi wa Kigali, Spt Emmanuel Hitayezu, yatangaje ko uwo muntu yari afite ikibazo cy’umuvuduko ukabije w’amaraso bamujyana kwa muganga ahita yitaba Imana.

Yagize ati “ Uriya muntu yari asanzwe agira ikibazo cy’umuvuduko ukabije w’amaraso hanyuma baramufata bamujyana kwa muganga, mu by’ukuri ntabwo yaguye mu rusengero, yaje gusenga nk’abandi bose aza kugira ikibazo bihutira kumujyana ku ivuriro nyuma yaho nibwo yaje kwitaba Imana.”

Bizimana Bertand wari umubyeyi w’abana babiri, yitabye Imana ku ya 29 Ukuboza 2017.



Tanga igitekerezo kuri iyi nkuru



Igitekerezo
Pint Kuya 3-01-2018

Yishwe na hypoglycemia,abiyiriza ni byiza ariko mwirinde gukabya isukari mumubiri iba ikenewe,yabaye nkeya nyine ahitapfa

musore gentil Kuya 3-01-2018

ibyo bintu rwose n’ amayobera gusa ndumva yarazize uburwayi kuko ntacyo bahishira !!

musore gentil Kuya 3-01-2018

ibyo bintu rwose n’ amayobera gusa ndumva yarazize uburwayi kuko ntacyo bahishira !!