Bishop Rugamba asanga gusenga iminsi myinshi utarya utananywa ari ubujiji no kutizera !

Mu gihe amateka ya Bibiliya agaragaza ko abakurambere biyirizaga ubusa bashaka kugaragaza guca bugufi imbere y’Imana no kuyitakambira mu gihe babaga bugarijwe n’ibibazo runaka, uyu muco wagiye uhererekanywa uko imyaka igenda ishira kugeza magingo aya nyamara ariko kandi hakaba abo usanga bashaka kubifata uko bishakiye nuko babyumva mu gihe abandi babifata nk’igihe cyo kwihererana n’Imana uyitereta ngo ikugirire neza. Umushumba w’Itorero Bethesda Holy Church mu Rwanda, Bishop Rugamba Albert we ngo abona uyu muco atari wo guhora mu masengesho yo kwiyiriza ubusa mu gihe cy’iminsi myinshi ari ubujiji no kutizera.

Bibiliya igenda ivuga amagambo menshi atandukanye avuga ku mumaro wo gusenga wiyirije ubusa nk’aho Yesu yabwiye Abigishwa be ngo nimusenge mutajya mu moshya (Luka 22.40). Mu gitabo cy’ibyo ku 2Ngoma 20.3 kandi hagaragaramo uburyo kwiyiriza ubusa ari ingenzi cyane mu kwirukana abadayimoni (Matayo 17.21) ndetse no kuvuguruza imigambi ya satani kimwe no muri Matayo 18.1 aho usanga amasengesho yo kwinginga Imana umuntu yiyirije ubusa. Si iyi mirongo gusa igaragaza umumaro wo kwiyiriza no mu gitabo cy’Abagalatiya 6.8 hagaragaza ko iyo umuntu yiyirije ubusa aba yihaye Imana, ntawakwirengagiza kandi ko Yesu (Matayo 4.1…), Mose na Eliya biyirije ubusa iminsi igera kuri 40 batakira Imana.

Mu gitabo cya Yona 3:5 kandi havuga hati “Maze ab’i Nineve bemera Imana, bamamaza itegeko ryo kwiyiriza ubusa, bose bakambara ibigunira uhereye ku mukuru ukageza ku woroheje hanyuma y’abandi.”

Umuco wo kwiyiriza ubusa ugaragazwa nk’iturufu, benshi bakoresha bashaka no kwirukana abadayimoni, ijambo ry’Imana rigaragaza ko bavanwaho no gusenga no kwiyiriza ubusa.

Iki gikorwa kivugwaho mu buryo butandukanye, bamwe bagereranya no kuyoba bitewe n’uburyo cyakozwemo, abandi bagashimangira ko ari inzira ituma abantu baguma kugira ubumwe n’Imana.

Umushumba w’Itorero Bethesda Holy Church mu Rwanda, Bishop Rugamba Albert, yagaragaje ko guhora mu masengesho yo kwiyiriza ubusa mu gihe cy’iminsi myinshi ari ubujiji.

PNG - 953.1 ko
Umushumba w’Itorero Bethesda Holy Church mu Rwanda, Bishop Rugamba Albert, uvuga ko guhora mu masengesho yo kwiyiriza ubusa mu gihe cy’iminsi myinshi ari ubujiji


Mu bice bitandukanye by’igihugu usanga amwe mu matorero ategeka abayoboke bayo gusenga amasengesho y’iminsi myinshi batarya batananywa, mu gihe hari n’aho usanga umukirisitu ku giti cye cyangwa itsinda ry’abakirisitu biyemeza gusenga igihe kirekire biyicishije inzara.

Hari abasenga iminsi ibiri, itatu, irindwi ndetse no kugeza kuri 40 bitewe n’uburyo bayobowemo n’ubuyobozi bwabo cyangwa umuhamagaro bafite.

Mu kiganiro, IGIHE yagiranye n’abayoboke b’amadini n’amatorero atandukanye bavuga ko bajya basenga iminsi myinshi batarya batanywa kubera ibyifuzo baba bafite bashaka ko Imana ibisubiza.

Umwe yagize ati ‘‘Mu cyumweru nshobora kurya rimwe cyangwa kabiri, indi minsi yose nkayimara ndi mu masengesho kubera ko hari igihe ndangiza amasengesho yanjye y’iminsi itatu ku Itorero bagategura iminsi itatu na bo cyangwa se korali ndirimbamo na yo ikayapanga. Ni uko nyine ugasanga umuntu yiberaho ubuzima bwo gusenga gusa ntaho ahurira n’ibiryo.’’

Undi yagize ati ‘‘Hari igihe kigera ku Itorero nsengeraho bagategura amasengesho y’iminsi 40, ayo masengesho ndayasenga nayarangiza nkaruhuka iminsi mike. Nanjye ngategura ayanjye y’iminsi 20 ntarya ntanywa ndi mu bwiza bw’Imana gusa.’’

Gukora aya masengesho yo kutarya no kutanywa ni icyitegererezo kiva kuri Yesu, dore ko na we ngo yigeze kumara iminsi 40 ntacyo akoza ku munwa nk’uko biri muri Matayo 4:1-2.

Ibyo ni ubujiji no kutizera

Umushumba w’Itorero Bethesda Holy Church mu Rwanda, Bishop Rugamba Albert, yavuze ko nubwo gusenga ari ingenzi, ariko bidakwiye ko umuntu amara iminsi myinshi atarya atanywa.

Yagize ati ‘‘Ubundi gusenga si bibi ariko kuva mu masengesho y’iminsi 40 ukajya mu y’irindwi ni ubwiyahuzi ; ni ikimenyetso cyo kutizera. Amasengesho nk’ayo yego yabaho bakayakora nka rimwe mu mezi atandatu cyangwa se mu mwaka. Gusenga ni ukwizera ko icyo usabye Data mu izina rya Yesu ugihawe.’’

Bishop Rugamba yakomeje avuga ko kugira ngo umuntu usenga Imana imwumve bitagombera ko yiyicisha inzara iminsi myinshi ngo kuko iyo umuntu asenga yizeye nta kabuza Imana yumva gusenga kwe ikamuha icyo yayisabye.

Yakomeje avuga ko umuntu usenga adafite kwizera n’iyo yamara iminsi 100 atarya, atanywa gusenga kwe kutagera ku Mana.

Daniel MUKESHIMANA/Umubavu.com



Tanga igitekerezo kuri iyi nkuru



Igitekerezo
VIVA Kuya 2-02-2018

Ubuse abantu turajya hee ??uwo bishop udasenga satani azamwigarurira.

Deo Kuya 29-01-2018

Gusanga kugamije kwiyiriza ubusa ni igikorwa umuntu ubwe yitegurira bitewe nibihe ashaka kugirana ni imana,aho bigenda bibera ubujiji nkuko uwo mushumba yabivuze nuko hari ahantu bashaka kwiriza ubusa muri gahunda biteguriye bakanashaka kubihuza niyo abandi bateguye birengagijeko abo bandi ntayandi baribarimo imibiri yabo ifite imbaraga zo gukora ayo biteguriye gukora.