Birangiye Radiyo Amazing Grace ihagaritswe gukora kubera ikiganiro cy’umuvugabutumwa Nicolas Niyibikora

Kuri uyu wa Mbere tariki ya 12 Gashyantare 2018, Urwego rw’Abanyamakuru bigenzura (RMC) rwasabye Urwego Ngenzuramikorere (RURA) guhagarika by’agateganyo Amazing Grace Christian Radio amezi atatu izira kuba yarahaye urubuga umuvugabutumwa witwa Niyibikora Nicolas akigisha yibasira abari n’abategarugori ataretse na Kiliziya Gatolika.

Iki cyemezo cyafashwe nyuma y’ikirego Impuzamiryango iharanira uburenganzira bw’abagore, Pro-Femme Twese Hamwe yagejeje kuri RMC.

Akumba gato k’inama kari kakubise kuzuye ubwo Urwego rw’Abanyamakuru bigenzura rwumvaga ikirego cyatanzwe n’Ihuriro ry’Abagore barega Radiyo Amazing Grace (Radiyo Ubuntu butangaje) nkuko BBC ibivuga.

PNG - 447.1 ko
Icyakora umuyobozi wa Radiyo Amazing Grace, Gregory Brian Shoof avuga ko yari atarabona ibyavugiwe kuri Radiyo ye


Umuyobozi w’iri huriro ry’Abagore, Madame Jeanne d’Arc Kanakuze wari ugaragiwe n’abandi bagore ni we wagaragaje icyatumye barega iyi Radiyo.

Umuyobozi wa Radio Amazing Grace, Umunyamerica Gregory Brian Shoof, yavuze ko yababajwe n’amagambo y’umuvugabutumwa Nicolas Niyibikora kandi ko yari agitegereje ko ikiganiro gihindurwa mu Cyongereza kugira ngo abone uko agisobanuraho.

Ibi ariko byabaye nk’ibidashimishije inteko yumvaga ikirego kuko bagaragaje ko batumva ukuntu umuyobozi wa Radiyo yamara igihe kingana nk’igishize atarumva uburemere bw’ibyatambukijwe na Radiyo ye.

PNG - 391.8 ko
Kuba adafite ushinzwe kugenzura ibitambuka kuri Radiyo byazamuye igisa n’urusaku


Yavuze ko impamvu nkuru ari uko adafite umukozi ushinzwe kugenzura ibitambuka kuri Radiyo kandi wumva Ikinyarwanda.

Ibi byahise bizamura igisa n’uburakari bw’abaje bahagarariye abagore.

Nyuma y’itangazwa ry’iki cyemezo, ikigo ngenzuramikorere RURA, gishingiye ku ngingo ya 30 n’iya 31 mu mategeko ngengamyitwarire agenga umuwuga w’itangazamakuru, RMC yategetse Niyibikora gusaba imbabazi mu gihe kitarenze amasaha 48 ndetse n’iki gitangazamakuru kigakurwa ku murongo.

Icyakora uretse gusaba uyu muvugabutumwa Nicolas Niyibikora gusaba imbabazi abo yasebeje, ngo imbabazi ntizivanaho ibishobora kugaragara nk’ibyaha bizatahurwa mu iperereza ryatangijwe n’igipolisi bitegetswe n’umushinjacyaha mukuru.

Ku wa 29 Mutarama 2018 nibwo kuri Radio Amazing Grace hanyuze iki kiganiro cyaje ari inshamugongo ndetse gitesha agaciro abagore nkuko byagarutsweho mu bitangazamakuru bitandukanye ndetse n’abantu batandukanye.

Daniel MUKESHIMANA/Umubavu.com



Tanga igitekerezo kuri iyi nkuru



Igitekerezo
Nsabiyaremye cyprien Kuya 22-02-2018

Ariko ntabwo bamwe tuzi amagambo uwo wiyita pastor yavuze pe ,mwatubwira abayumvise natwe tukumva.

Bram Kuya 13-02-2018

None se muri iyi nkuru ko mutatubwiye ibyo uwo mu pasteur yavuze ??? Ubwo murumva iyi nkuru yuzuye ntago twese icyo kiganiro twagize umwaku cg amahirwe yo kucyumva

Bram Kuya 13-02-2018

None se muri iyi nkuru ko mutatubwiye ibyo uwo mu pasteur yavuze ??? Ubwo murumva iyi nkuru yuzuye ntago twese icyo kiganiro twagize umwaku cg amahirwe yo kucyumva

john Kuya 13-02-2018

nizereko mubo yavuze hatarimo mama,arko gufunga radio siwo muti hari nundi muntu watanze sms nkiyo uwo mupasiter yatambukije kdi iyo nkuru yarasomwe cyane

Rwimana Kuya 13-02-2018

Sinibaza impanvu mumwita umuvugabutumwa ahubwo kuko usibye n’IMANA numuntu ntiyatuma nkibyo yavuze.