Agiye gusohora igitabo yifuza ko kizasimbura Bibiliya na Korowani

Mu mpera z’uyu mwaka wa 2019, Umunyamakuru, Umunyamategeko akaba n’Umusesenguzi mu bya Politiki, Mubalaka Edouard yitezweho kuzasohora igitabo yise ‘Isoko y’u Rwanda’, igitabo gikubiyemo ukuri ku mateka y’u Rwanda n’uko abamisiyoneri bahinduye ukwemera kw’abanyarwanda bityo ngo akaba yifuza ko kizasimbura Bibiliya na Korowani.

Mubalaka yanditse iki gitabo ngo ashaka gushyira ukuri ahabona ku nkomoko y’u Rwanda, Imana yarwo, imyemerere y’abanyarwanda n’uko byagiye bivangirwa n’abamisiyoneri bikifashishwa mu buryo butari bwo.

Mu gitabo cye ashaka kuvuga ko ‘Kigaragaza aho amateka y’u Rwanda n’Imana yarwo bikomoka, kigakuraho urujijo n’ibyo abantu bahinduye uko babishaka mu nyungu zabo, barangiza bakabyandika muri Bibiliya na Korowani”.

Gikubiyemo amateka y’u Rwanda kuva kuri Gihanga Ngomijana kugera ku mwaduko w’abazungu, harimo ubupfura, indangagaciro, kirazira, ubutwari by’abanyarwanda n’ibindi.

Mubalaka avuga ko Imana y’i Rwanda itandukanye cyane n’iya Israel, iya Isaka n’iya Yakobo zikunze kwiragizwa na benshi, ngo bitewe n’uko u Rwanda ntaho utarusanga, n’Imana yarwo ntaho utayisanga ariko izo zindi biba bisobanuye ko ari izabo gusa.

Ati “Imana y’u Rwanda ni byose, niyo yaremye ijuru n’Isi noneho irema natwe abantu. Niyo iduha kubaho, niyo iduha gutunga no gutunganirwa. Iyo ni Imana y’u Rwanda ya yindi iguha ntimugure kuko muguze yaguhenda.”

Mubalaka Edouard yakomeje avuga ko yifuza ko igitabo cye kizasimbura Bibiliya na Korowani.

Ati “Ndashaka ko kizasimbura Korowani y’Abarabu. Ndashaka ko gisimbura Bibiliya, abayikoze ni abahanga koko, baraje baradupfunyikira baratubwira ngo ‘Ntuzayihindureho cyangwa wongereho akadomo.”

Ngo bavuze ko ‘Guhindura cyangwa kongera ikintu kuri Bibiliya birutwa n’uko Isi yarimbuka’. Ibyo ngo bifasha abayanditse kutagira undi ugira icyo ayinenga, yabigerageza bakamwita umuhanuzi w’ibinyoma’.

Ati “Tuzajya tugisoma niturangiza dusenge. Twanze kwihanganira abatubwira ngo abanya-Israheli bambutse inyanja itukura kuko biba bisa nk’aho ari ibitangaza bikomeye cyane.”

Mubaraka avuga ko hari ibitangaza bikomeye cyane byabaye ku banyarwanda bikubiye muri icyo gitabo birimo ibyaranze urugamba rwo kubohora igihugu n’abanyarwanda.

Akomeza avuga ko igitabo cye kizaba gisobanura ukuntu Imana zindi zigishwa hirya no hino zakomotse ku Mana y’u Rwanda, kigakura urujijo ku byo yita ubuyobe birimo kuvuga ngo ‘Umuntu nagukubita urushyi mu musaya uzatege undi akubitemo, nakwambura igishura uzamuhe n’umwitero n’ibindi.

Twabibutsa ko uyu Mubalaka Edouard uvuga ko yifuza gusimbuza igitabo cye Bibiliya na Korowani, mu mwaka ushize wa 2018 yatangije icyo yise “Umunsi Wera w’Umucyo” (White Day and Shine/Light) nawo utaravuzweho rumwe.

Ubwo yatangizaga uyu munsi witabiriwe n’abambaye imyenda y’umweru ku wa 7 Nyakanga 2018 mu Mujyi wa Kigali, yavuze ko iyi gahunda ifite intego yo kugira umutima w’urukundo kandi utabara.

Icyo gihe kandi yavuze ko igikorwa yatangije kidashingiye ku bitabo by’iyobokamana nka Bibiliya na Korowani n’izindi nyigisho zose zahamya ko hari izindi mana zitari iy’u Rwanda.

Ati “Twebwe tuzagendera ku mahame twishyiriyeho. Iyo usesenguye ibivugwa muri ibyo bitabo byose usanga ibikubiyemo bitatureba. Ahubwo ikitureba ni ukwimenya, tukamenya aho dukomoka, indangagaciro zituranga, arizo z’ubunyarwanda, tukemera Imana yacu y’u Rwanda ari na yo yaremye Ijuru n’Isi n’ibiriho byose.”

Uyu munsi yatangije icyo gihe hari abawitiriye uw’idini rya Satani gusa yabihakanye yivuye inyuma ati "Umunsi Wera w’Umucyo ntaho uhuriye n’idini rya Satani witiriwe kuko atari idini ryashinzwe ahubwo ari igikorwa gihuza abantu mu busabane n’ibyishimo ndetse no gushima Imana.”

Mubalaka agiye gusohora igitabo ku myizerere y’abanyarwanda, yifuza ko kizasimbura Bibiliya na Korowani

Umwaka ushize nabwo Mubalaka Edouard yatangije icyo yise ’Umunsi Wera w’Umucyo’ utaravuzweho rumwe

@Umubavu.com





Tanga igitekerezo kuri iyi nkuru



Igitekerezo
Niyiduha jean marie Kuya 11-06-2019

Yewewe mbega ubuyobo nabwo tuzemera abantu bayoborwa nibigirwamana nkamwe hsriho imana imwe gusa ariyo tugomba kuramya yonyine naho ubundi bibiriya numuhanuzi utavangiye nagato

Niyiduha jean marie Kuya 11-06-2019

Yewewe mbega ubuyobo nabwo tuzemera abantu bayoborwa nibigirwamana nkamwe hsriho imana imwe gusa ariyo tugomba kuramya yonyine naho ubundi bibiriya numuhanuzi utavangiye nagato