Abakunzi b’indirimbo zihimbaza Imana bungutse umuhanzi mushya  uzamukanye imbaraga zidasanzwe

Muzika nyarwanda ikura umunsi ku wundi ari nako yunguka abahanzi bashya kandi ubona ko bafite impano n’akazoza gafatika. Umuhanzi mushya NKURUNZIZA Nathanael ni umwe mu bahanzi baririmba indirimbo zihimbaza Imana (Gospels) ugitangira muzika ariko akaba atangiranye imbaraga nyinshi aho yakoze indirimbo zigera kuri eshatu (3) ziri mu njyana zitandukanye nka Country, Reaggae, na Seben.

Ubusanzwe uyu muhanzi mushya w’indirimbo ziramya zikanahimbaza Imana NKURUNZIZA Nathanael, avuka mu Karere ka Nyamasheke mu murenge wa Kanjongo, ni Umukirisitu wo mu Itorero rya Free Methodist Church in Rwanda ( FMC), asanzwe ari Umutoza w’abaririmbyi muri Chorale Voice of God kandi akaba yaranagiye atoza andi ma Chorale atandukanye arimo nka Chorale INTEGUZA Z’UMWAMI yo muri Kaminuza ya KIBOGORA Polytechnic na Chorale La Lumiere yatoje akiga mu ishuri ryisumbuye rya Rangiro (Ecole Secondaire de RANGIRO).

Aganira n’Umunyamakuru w’Umubavu, uyu musore yatangaje ko impano yo kuririmba ayikomora kuri Mama we kuko yabyirutse abona aririmba muri Chorale, maze igihe kiragera maze nawe amushyira muri Chorale y’abana bato ari naho yahimbiye indirimbo ye ya mbere ari muri iyo Chorale y’Abana.

JPEG - 187.4 kb
Umuhanzi NKURUNZIZA Nathanael azamukanye imbaraga zidasanzwe mu ruhando rw’indirimbo zihimbaza Imana


Umuhanzi Nathanael NKURUNZIZA yakomeje avuga ko icyatumye ahanga indirimbo ndetse agatangira no kuzishyira hanze, yari yarahize ko azaba mu buzima bwo ’Guhimbaza Imana’ avuga ubutumwa bwiza mu ndirimbo akaba yari yarabihigiye Imana ubwo yamukizaga uburwayi bukomeye yari arwaye agiye gupfa maze agahigira Imana ko nimunkiza azayiririmbira, akabwiriza ubutumwa bwiza mu buryo bw’Indirimbo maze n’imitima myinshi ikanahakirira.

JPEG - 99.7 kb
Nkurunziza Nathanael nawe yinjije mu ruhando rwa Gospel mu Rwanda


Kugeza ubu umuhanzi Nathanael NKURUNZIZA amaze gushyira hanze Indirimbo eshatu arizo: IGIHE, NARACUNGUWE n’UMUGAMBI W’IMANA.

Izi ndirimbo kandi zikaba zije zisanga indi ndirimbo yitwa IZUBA RIKIRASA yakozwe mu mwaka wa 2011 ubwo yari arangije kwiga Secondaire akaba yarayiririmbye mu buryo bwo gushima Imana yarimubashishije kurangiza amashuriye yisumbuye.

JPEG - 238.8 kb
Wumvise indirimbo ’Izuba Rikirasa’ ya Nathanael wumva ko ikoranye ubuhanga


Umunyamakuru w’Umubavu abajije umuhanzi Nathanael NKURUNZIZA icyo ateganya mu bihe biri imbere by’umwihariko mu rugendo rwe rwa muzika yatangiye, yasubije ko afite gahunda yo gukora igitaramo mu kwezi kwa munani (Ukwakira k’uyu mwaka wa 2018) kandi ko akomeje gahunda yo gushyira hanze indirimbo zamamaza ubutumwa bwiza bwa Kristu anavugako hari izindi ndirimbo ebyiri zizagera hanze mu gihe cy’amezi abiri ari imbere.

JPEG - 228.7 kb
Imihigo irakomeje kuri Nathanael wanatangiye kwitegura igitaramo azakora mu mezi ari imbere


Abajijwe abahanzi afatiraho icyitegererezo (Role model mu Cyongereza), yatubwiye ko hanze y’U Rwanda ari Travis Green wo muri Amerika mu gihe hano mu Rwanda yatubwiye UWIMANA Aime.

Abajijwe kandi inama yagira abandi bahanzi bagenzi be, yavuze ko yabashishikariza guhimba bahereye kuri Bibiliya bakabwiriza abantu benshi mu ndirimbo baririmba babigisha Ijambo ry’Imana maze bakabasha gukira Imitima. Yongeyeho ko bagenzi be bakwiye kugerageza gukora neza bakajya bavuga ubutumwa bwiza mu ndirimbo bejejwe ndetse barangwa n’urukundo muri byose.

Mu gusoza, umuhanzi NKURUNZIZA Nathanael arasaba abantu bakunda indirimbo ze zo guhimbaza Imana n’abakunda Imana muri rusange gushyigikira uyu murimo Imana ishyize muri we kimwe n’abandi bose Imana iri gukoresha kugira ngo ubwami bwayo bwaguke bukwire mu isi maze abatuye isi yose babone umucyo w’izuba ry’agakiza k’Uwiteka uneshereza abakunzi be ati “byose bikorwe ku bw’icyubahiro cy’Imana yacu (Only for God’s Glory)”.

Nathanael arashimira abantu bose bamuba hafi mu nama zitandukanye bamugira, amasengesho, n’ubundi bufasha bukomeye kandi anashima n’Imana imugejeje aha akaba ayiragiza n’ibizaza byose.

Umva izi ndirimbo zitandukanye zinogeye amatwi za NKURUNZIZA Nathanael:

Iyi ndirimbo yise ’IZUBA RIKIRASA’ ikunzwe na benshi yayikoze mu mwaka wa 2011 ubwo yari arangije kwiga Secondaire:

Daniel MUKESHIMANA@Umubavu.com


Travel for Free!


Tanga igitekerezo kuri iyi nkuru



Igitekerezo
Betty Kuya 7-05-2018

Imana igufashe muvandi.