Abafite ubumuga bashaka ko Bibiliya ihindurwamo amwe mu magambo bita ko abatesha agaciro

Kugeza ubu abafite ubumuga ntibumvikana n’Umuryago wa Bibiliya mu Rwanda ku bijyanye no gukuramo ndetse no guhindura amwe mu mazina bavuga ko abambura ubumuntu ndetse akanabatesha agaciro.

Abafite ubumuga bavuga ko muri iki gitabo (Bibiliya) cyemerwa na benshi ku Isi, harimo amagambo atajyanye n’igihe kandi yanditswe n’abantu, bityo ko bo banakwiye kuyahindura.

Umudepite uhagarariye abafite ubumuga mu Nteko Ishinga Amategeko, Rusiha Gaston yabwiye Radiyo Flash ko inyito y’impumyi, ikiragi n’ikimuga n’ayandi atemewe mu Rwanda agaragara muri Bibiliya

Yagize ati “ Urumva ni mvugo zitakivugika, imvugo abantu batagishaka kumva ariko iyo zikomeje kugarukwaho mu bitabo nka Bibiliya kandi ari igitabo twese twubaha ntabwo biba ari byiza.”

Yakomeje agaragaza ko amagambo ari muri Bibiliya atari ay’Imana ahubwo ari ayo abantu banditse kandi ari bo banakwiye no kuyahindura.

Yagize ati “ Sinzi impamvu rero bavuga ko batabihindura ntabwo nyumva kandi twarumvikanye ko bigomba guhinduka ; ikintu kidahindua ku isi ni ikihe ? Ntabwo kibaho rwose ariya ntabwo ari amagambo y’Imana ni amagambo abantu banditse muri Bibiliya ntabwo Imana yanditse ngo ibi ni ibimuga ; ni abantu bayanditse. Ikintu rero umutu yanditse kirahinduka cyeretse ijambo ry’Imana niryo ridahinduka.”

Umwe mu bayobozi b’Umuryango wa Bibiliye mu Rwanda, Pasiteri Gasake Michel,
yasobanuye ko amagambo ari muri iki gitabo atapfa guhindurwa kuko ijambo rishobora kuvuga impumyi ridashaka kuvuga ufite ubumuga bwo kutabona.

Yagize ati “ Bibiliya ntabwo iyo ivuga wenda impumyi ni urugero cyangwa ikavuga umuntu ufte ubumuga ntabwo iba ivuga iby’umubiri byonyine ; ushobora kuba ufite ubuhumyi no muri roho ni ubumuga ; ishobora kuba aribyo Bibiliya irimo kuvuga biterwa n’inkuru uba urimo gusoma n’ubusobanuro bwayo.”

Yakomeje avuga ko ibi aribyo byatumye Umuryango wa Bibiliya mu Rwanda utihutira gukuramo amagambo ngo uyasimbuze.

Uretse iyo mpamvu, mu bihe bishize hanatanzwe igaragaza ko kugeza ubu nta n’amazina mashya yiswe abafite ubumuga runaka ahubwo usanga ari interuro isobanura uko ateye. Urugero aho kuvuga ikiragi, ukavuga ufite ubumuga bwo kutavuga ; Impumyi ikitwa ufite ubumuga bwo kutabona. Ibyo na byo bikaba indi nzitizi kuba ahanditse impumyi (ijambo rimwe) hasimbuzwa amagambo ane.

PNG - 1 Mo
Abafite ubumuga bati"Bibiliya igomba guhindurwamo amagambo adutesha agaciro"

Daniel MUKESHIMANA/Umubavu.com



Tanga igitekerezo kuri iyi nkuru



Igitekerezo
Tesi Kuya 2-02-2018

mfite ubumuga, aliko rwose namwe,iryo zina ntacyo ritwaye muli bible,badushakire ibiduteza imbere,naho ibyo ntacyo bimaze,kdi nawe nyirikinyamakuru nta mpamvu yo kudukoreshereza Ifoto muli bino bintu plz.