Kuva mu mwaka wa 2022 hazakoreshwa imodoka zitagira abashoferi

Uko bukeye nuko bwije ikoranabuhanga niko rigenda ryunguka ibintu bishya kugeza aho kuri ubu kuva mu mwaka wa 2022, igihugu cya Singapour giteganya gutangira gukoresha imodoka zitwara abantu zitagira abashoferi nyuma y’ikoreshwa ry’indege zitagira abapilote.

Leta ya Singapour ivuga ko izo modoka zizajya zica mu turere dutatu turimo imihanda idakunze kugaragaramo urujya n’uruza rw’abantu. Iyi mihanda ngo niyo yagenewe kugendeshwamwo aya mabisi atagira abashoferi gusa.

PNG - 848 ko
Kaminuza ya Nanyang Technological yo yatangiye gukoresha izi modoka


Izi modoka zitwara abagenzi zizafasha mu duce tutarangwamo abantu benshi, hafi y’imihanda ikunze kunyuramo amagariyamoshi ndetse n’ahanyuraga amabisi manini.

Igihugu cya Singapour gifite abaturage benshi bituma kizera ko ubwo buhanga bwo kudakoresha abashoferi buzafasha mu bibazo by’ubutaka n’amikoro make y’abantu.

Khaw Wan, Minisitiri ushinzwe gutwara abantu n’ibintu yagize ati "Izi modoka zizafasha abantu cyane mu buryo bwo gukora ingendo zabo za buri munsi bitagoranye cyane cyane ku bageze muza bukuru. Imiryango ifite abana bakiri bato ndetse n’ifite abafite ubumuga".

PNG - 721.8 ko
Taxi zitagira abashoferi nazo zamaze kugeragezwa muri Singapour


Izi modoka zitagira abashoferi zizaba zije gusimbura izari zihasanzwe, kandi zizakora ahanini mu masaha akuze atagaragaramo urujya n’uruza rw’abantu.

Ubusanzwe nta murongo w’imodoka ukunze kurangwa muri Singapour ugereranije no mu bindi bihugu byo mu majyepfo y’umugabane wa Asia, kubera ukwiyongera kw’imihanda na politike yo guteza imbere uburyo bwo gutwara abantu.

Ku ikubitiro mu mwaka wa 2022, iki gihugu cyizeye kuzahita gifata iya mbere mu ikoreshwa ry’ubuhanga bwo gutwara abantu mu modoka zitagira abashoferi.

Daniel MUKESHIMANA/Umubavu.com



Tanga igitekerezo kuri iyi nkuru



Igitekerezo