Kirehe : Bameze nk’abafunzwe  kubera indangamuntu bahawe

Abaturage baturiye umupaka wa Rusumo bo mu Karere ka Kirehe , bavuga ko bafite ikibazo cyo kuba indangamuntu zabo zanditseho izina rimwe gusa ibi bikababera imbogamizi kuko hari serivisi zimwe na zimwe badashobora guhabwa zirimo kutabona icyangombwa kibemerera kwambuka umupaka.

Abaturage bo mu midugudu Nyakwisi,Shungerezo na Rusumo yo mu Kagari ka Nyakurazo ,Umurenge wa Kigarama ho muri Karere ka Kirehe nibo bavuga ko basangiye iki kibazo cyo kuba indangamuntu zabo zarasohotseho izina rimwe.

Ngo aba baturage ubwo hafatwaga indangamuntu nshya bari bandikishije amazina yabo bose ariko ngo izabo zagiye gusohoka ziza ziriho izina rimwe gusa.

Aba baturage bavuga ko nubwo baturiye umupaka uhuza u Rwanda na Tanzania badashobora kwambuka kuko badahabwa icyangombwa kuko indangamuntu zabo ziriho izina rimwe.

Bavuga ko bagerageje kwitabaza inzego z’ibanze zikababwira ko zizabakorera ubuvugizi ndetse ko ubuyobozi bw’Akarere bwaje kubasura bakabugezaho iki kibazo bukabemerera ko buzaguruka bugafotora indangamuntu zabo bukajya kuzikosoza ariko ngo barategereje amaso ahera mu kirere.

Aba baturage bavuga ko nubwo ari abanyarwanda ariko bameze nk’abafunze aho batanga urugero ko ibyangombwa byose basaba batanga amazina yabo abiri bityo bikaba bidahuje n’irangamuntu bityo bakaba basaba ko iki kibazo cyakosorwa bakaba abanyarwanda nk’abandi.

Umunyamabanga Nshingwabikorwa w’Umurenge wa Kigarama,Rwabuhihi Pascal yabwiye Radio/TV1 dukesha iyi nkuru ko iki kibazo atari akizi ariko ko kuva kimenyekanye ubuyobozi bugiye kugikurikirana kugira ngo bufashe aba baturage kubona indangamuntu ziriho amazina yabo yose.

Gabriel Habineza/Umubavu.com



Tanga igitekerezo kuri iyi nkuru



Igitekerezo