Ku myaka 19 gusa, aciye agahigo k’Umunyarwanda muto wemerewe gutwara indege za Boeing

Ni umwana witwa Jean Vladmir Mwezi Huriro wavukiye i Ruli mu Karere ka Gakenke nyuma bakimukira Kabeza muri Kicukiro hafi y’ikibuga cy’indege. Muri uku kwezi nibwo uyu mwana yashyizeho agahigo ko kuba Umunyarwanda wa mbere muto uhawe icyemezo cyo gutwara indege zo mu bwoko bwa Boeing 737-800NG, nyuma yo gusoza amasomo ye mu ishuri ryo muri Afurika y’Epfo, ryitwa 43 Air School.

Mwezi w’imyaka 19, yakuriye mu muryango w’abana batanu niwe muhungu wenyine wa Jean de Dieu Ngirabega na Godelieve Uwantege. Yavukiye i Ruli mu Karere ka Gakenke mbere y’uko bimukira Kabeza muri Kicukiro hafi y’ikibuga cy’indege nkuko Igihe cyanditse iyi nkuru kibivuga.

PNG - 772.3 ko
Jean Vladmir Mwezi Huriro w’imyaka 19 uciye agahigo ko kuba Umunyarwanda muto wemerewe gutwara indege za Boeing


Mu kiganiro yagiranye na The New Times, Mwezi yatangaje ko icyifuzo cyo gutwara indege yakigize ku myaka 11, ubwo yakundaga kwitegereza indege zigwa, zinaguruka.

PNG - 639.6 ko
Jean Vladmir Mwezi Huriro ngo yakundaga kwitegereza uburyo indege zigwa


Yagize ati “Uko nakuraga nakomeje kwifuza ndetse nkanatekereza natwaye indege. Ubwo nabibwiraga ababyeyi banjye baranshyigikiye bambwira gukurikira ibyo nkunda ari byo gutwara indege.”

Umwaka ushize nibwo Mwezi yagiye muri Afurika y’Epfo mu ishuri rya 43 Air School ryigisha gutwara indege atangira kumva ko azakabya inzozi ze. Aha niho yaje gukura icyemezo cyo gutwara indege z’abagenzi, nyuma y’amasomo atandukanye yagiye ahabwa.

Ati “Nize amasomo y’ibanze mu bijyanye no gutwara indege ya Boeing 737 nk’itsinda ariko nahamaze amasaha make. Icyemezo gisabwa mu gutwara indege z’abagenzi ntacyo nari mfite. Akenshi iyo abakoresha batoranya abapilote bahitamo ugifite.”

Yongeraho ko yize amasomo y’amezi atatu ku byerekeranye no gutwara indege z’abagenzi ari nabyo yaherewe icyemezo.

Mwezi wagowe no kuba yari umutangizi mu bijyanye no gutwara indege, yemeza ko hari ubwo byageze akumva yabihagarika ariko imbaraga zo gukomeza akaziterwa no kuzirikana icyo ashaka, umuhate wo kugera ku nzozi ze no kwigomwa.

Yemeza ko imyaka afite atari imbogamizi yo kuba yatangira gukabya inzozi ze no gutungwa n’ibyo yize kuko amasomo yo gutwara indege yayahawe neza mu buryo bukwiye kandi afite ubumenyi, ubuhanga n’umuhate.

Mwezi ufite icyifuzo cyo gutwara indege ya Boeing 777-300 nka Kapiteni kuko akunda cyane ikoranabuhanga zikoresha, avuga ko ibyo agezeho abikesha Imana, ubufasha bw’ababyeyi, kugira umuhate no gukora cyane ndetse n’abamwigishije.

Daniel MUKESHIMANA/Umubavu.com



Tanga igitekerezo kuri iyi nkuru



Igitekerezo
fazzo ishimwe Kuya 28-11-2017

gusa ni byiza cyaneeee gutwara indege peeeeee !!!!! ark se buriy ninde utakabya Inzozi ufite money ?? dore ko umuhate tuwuhoranaaaaaa :’’’’