Abanyeshuri ba Kaminuza y’u Rwanda bahawe mudasobwa zari zigenewe abiga mu mashuri abanza n’ayisumbuye

Bamwe mu banyeshuri biga muri za Kaminuza mu Rwanda by’umwihariko abo muri Kaminuza y’u Rwanda baranenga cyane mudasobwa zo mu bwoko bwa Positivo bahabwa byanatumye bandikira Inteko Ishingamategeko bayisaba ubuvugizi ku kibazo cy’izi mudasobwa cy’uko zidafite ubushobozi bwo kwakira zimwe muri porogaramu bakoresha mu masomo yabo.

Nkuko abagize inteko ishingamategeko muri komisiyo yayo y’uburezi, umuco n’ikoranabuhanga babigaragarije Minisitiri ufite ikoranabuhanga mu nshingano Jean Philbert Nsengimana, ngo aba banyeshuri bavuga ko izi mudasobwa zitujuje ubiziranenge.

PNG - 1 Mo
Minisitiri w’ikoranabuhanga n’itumanaho, Jean Philbert NSENGIMANA


Mu gusobanura iki kibazo, Minisitiri Jean Philbert Nsengimana avuga ko izi mudasobwa zitari zigenewe abanyeshuri bo muri za kaminuza kuko ngo zijya kuza mu Rwanda, hari hagamijwe ko zizakoreshwa n’abanyeshuri bo mu mashuri abanza n’ayisumbuye.

Cyakora bamwe mu banyeshuri bibaza uburyo niba izi mudasobwa zari zigenewe abo mu byiciro byo hasi, impamvu bemeye ko zihabwa abakuru kandi bazi amasomo biga, cyne ko hariho izindi mudasobwa zagenewe abanyeshuri bo mu mashuri abanza muri gahunda yiswe One lap top per child (OLPC mu magambo ahinnye).

Mu gushakira umuti iki kibazo cy’abanyeshuri binubira izi mudasobwa cyane ko ngo nubwo bazibakopa bo bavuga ko zidafite ubushobozi ugereranyije n’izindi,Minisitiri Nsengimana avuga ko ngo bagiye kuvugana n’uruganda rukazongerera ubushobozi, cyakora ngo bigasaba ko n’ikiguzi cy’izi mudasobwa kiyongera.

PNG - 580.7 ko
Iyi ni mudasobwa yo mu bwoko bwa Positivo zihabwa abanyeshuri ba Kaminuza y’u Rwanda ku nguzanyo


Mu busanzwe ngo mudasobwa ya positivo iva ku ruganda ihagaze amadolari y’Amerika 240, akaziyongera kugera ku madolari 280, n’ukuvuga arenga ibihumbi 230 by’amafaranga y’u Rwanda.

Abadepite babajije impamvu izo laptop zigihenze kandi ziteranyirizwa mu Rwanda, aha Ministre Nsengimana yagaragaje ko biterwa n’uko kuzana ibikoresho byazo no kubiteranyiriza mu Rwanda bituma igiciro kirushaho kwiyongera kurusha iziza mu Rwanda zuzuye.

Abanyeshuri biga architecture muri Koleji y’Ubumenyi n’ikoranabuhanga,ngo bandikiye inteko ishingamategeko bayigezaho iki kibazo cya positivo, cyakora sibo bonyine kuko hari n’abandi babwiye kimwe mu binyamakuru bikorera hano mu Rwanda ko izo bahawe zatangiye kwangirika bigaragara ko uretse n’ubushobozi buri hasi bw’izi mudasobwa, ngo zitanaramba cyane ko hashize umwaka urenga gato bazihawe.

PNG - 568.6 ko
Minisitiri w’Uburezi Dr Papias MUSAFIRI Malimba ashyikiriza umunyeshuri mudasobwa yo mu bwoko bwa Positivo


Hari n’abandi biga muri Kaminuza y’u Rwanda babwiye itangazamakuru ko mudasobwa bahawe aho kubakemurira ikibazo nk’uko bari babyiteze ahubwo ngo zaje kubibateza kuko nta cyo ngo zibamariye bitewe n’uko zamaze kuzima.

Bagaragaza ko mudasobwa bahawe zazimye nta n’ukwezi ziramara, bamwe zikaba ngo zitarigeze zinakora, abandi ngo kuzizimya bisaba gukuramo batiri (battery).

Mu busanzwe abanyeshuri bahabwa izi mudasobwa nk’inguzanyo, aho amafaranga yazo yongerwa kuyo bagenerwa yo kubatunga azwi nka bourse, binavuze ko abazihabwa ari ngo abishyurirwa na leta.

Inganda 2, urwa POSITIVO rwo muri Brazil rumaze imyaka 40 n’urwa BGH rwo muri Argentine rumaze imyaka 100 zikora mudasobwa, ni zo zihurije hamwe zikora uruganda rwa POSITIVO BGH rukaba rukora mudasobwa hano mu Rwanda ndetse na mudasobwa zihabwa aba banyeshuri ni rwo ruzikora.

Uyu mushinga wa positivo wari watangijwe mu rwego rwo kubaka ibyo bita “Smart Classrooms” aho intego yari uko umwaka wa 2019 warangira buri shuri ryisumbuye ribasha gukoresha mudasobwa mu myigishirize.

Daniel MUKESHIMANA/Umubavu.com



Tanga igitekerezo kuri iyi nkuru



Igitekerezo