Ubusugi : Umutungo ugoye kuwucunga

Mu bihugu byinshi ku isi usanga mu mico yabyo kwifata mu bijyanye n’imibonano mpuzabitsina mbere yo kurushinga ku rubyiruko ari inshingano za buri wese ariko hari aho usanga bamwe bibagora abandi ntibabikozwe bityo bikabaviramo gutakaza ubusugi bwabo(ku bakobwa) ndetse no guta ubumanzi(ku basore) mbere yo gushinga ingo zabo ugasanga bafunguye agaseke igihe kitaragera.

Iyo uganiriye n’abantu benshi bakubwira ko kwifata ndetse no kurinda ubusugi ku mwari wese byakagombye kuba umuco uhoraho cyane ko ari ikimenyetso ndakuka kerekana ko ababyeyi batanze uburere ndetse n’imico myiza ku mwana,ariko uko iminsi igenda ishira bigenda bigaragara ko umuco ugenda ukendera bityo umuntu akaba yakwibaza iherezo ndetse n’igitera ibi byose.

Twagerageje kuganira n’abantu batandukanye kuri iyi ngingo bityo buri cyiciri kitubwira uko kibyumva :

Uyu ni umwe mu bari twaganiriye yagize ati “umukobwa watakaje ubusugi mbere yo kurushinga aho ari hose aba yumva afite isoni ndetse n’ikimwaro cyane ko bifatwa nkaho aba asebeje umuryango wose ugasanga abantu bavuga ko nta burerwe ababyeyi batanza,icyo umwari cyangwa umusore bakoze cyose cyitirirwa umuryango cyane ko ariho abanyarwanda bahereye aho babona umwana w’umukobwa akoze ikintu kibi bati ‘ni uwa nyina’ nyamara icyo umuhungu akoze kiza bati ‘ ni uwa se cyangwa imfura itega nka se’, ibi byose byanyeretse ko umwari aba akwiye kwifata ndetse no kurinda ubusugi bwe kugeza igihe azashakira cyane ko agapfundikiye gatera amatsiko”.

Yongeyeho ko muri iyi minsi usanga bigoranye ku rubyiruko cyane abari gucunga ubusugi bwabo kubera aho isi igenda igana aho usanga bamwe birirwa babona ku mbuga nkoranyambaga ubusambanyi ndetse no kwambara ubusa bwarabaye nk’umuco bityo ibi byose bigatuma bamwe bijandika muri izi ngeso zitari nziza bityo bikabaviramo kuhatakariza ubusugi bwabo batararushinga.

Ku ruhande rw’abasore bo mu bo twaganiriye,uyu yagize ati “sinizera ko hakiriho abakobwa b’amasugi nkurikije aho iminsi igeze n’ibyo mbona,simbyizera na gato keretse wenda ukimara kubyarwa !!!Icyakora mubonye byanshimisha cyane cyane ko yaba ari impano y’Imana inyihereye”.

Ku ruhande rw’ababyeyi ngo bo babona uyu ari umuco mwiza wo gupfundura agaseke igihe kigeze ngo cyane ko bibahesha ishema nk’ababyeyi bareze neza kandi byaba binagenze nabi ugasanga n’ubundi nibo birengera ingaruka zabyo bivugwa ko batatanze uburere bwiza,aba ni bamwe mu babyeyi badusangije ubuhamya bwabo :

Uwa mbere yagize ati “nashatse mfite imyaka 28 y’amavuko ndangije icyiciri cya mbere cya Kaminuza,nageze aho ntaratekereza iby’imibonano mpuzabitsina aribyo byatumye nshaka nkiri isugi cyane ko nari mfite intego yo kuzashimisha umwo tuzashakana,ikindi numvaga mfite ubwoba bwo gutwita kandi ntarashaka,ibi byose byabaye uruhisho ndetse n’impano ikomeye ku mugabo wange,icyakora natunguwe no yatangariye ko asanze ndi isugi yibaza iturufu nakoresheje kugira ngo mbigereho.Ibi byatumye umugabo wange ankunda,arankundwakaza,aranyubaha,ampa agaciro ndetse aranyizera muri byose kuko namuzaniye agaseke kagipfundikiye”.

Bitandukanye n’uyu,undi we yagize ati “gewe nashatse mfite imyaka 25 y’amavuko kandi ntari isugi,nari mfite isoni ndetse n’ikimwaro nibaza icyo nzasobanurira uwo tuzashakana nuko azabyakira yewe n’uburyo azajya amfata,ku munsi w’ubukwe bwacu mu gihe abandi bari banezerewe gewe nari nabuze aho nkwirwa ndetse nibaza icyo ndamusobanurira mbese nari nashobewe cyane ko Masenge yari yambajije icyo kibazo nkamubeshya ko ndi isugi,kubw’amahirwe nasanze umugabo wange ntacyo bimubwiye ariko nkaba mbwira abari bagifite ubusugi bwabo kubukomeraho bikomeye kuko ari impano ikomeye babikiye abo bazashakana cyane ko umunyarwanda yabivuze neza ati ‘Amahirwe y’ihene siyo y’intama’ kuko hari benshi basanga uteri isugi ntimucane uwaka,abamaze guta ubusugi bwabo nabo isi ntibarangiriyeho ariko bisubireho kandi bagarukire aho”.

Yongeyeho ko nubwo iyi minsi igoye,ababyeyi bakwiye kumva ko inshingano ari izabo mu guha abana babo uburere byiza kuko ngo “umwana apfa mu iterura” cyane ko ngo nko mu igihe haramuka habayeho gusendwa k’umwana wabo aribo ingaruka zigarukaho.Ikindi ngo bagomba kubasobanurira iby’ubuzima bw’imyororokere kugira ngo batazagira undi bajya kubibaza bityo bikabaviramo gutakaza impano ikomeye bakagombye guteganyiriza abo bazashakana.

Bamwe bati “uyu ni umuco mwiza ku mwari wese kwifata no gucunga ubusugi bwe” abandi bati “ibi ni ibya kera abantu batarajijuka cyane ko bigora umuntu gutera akabariro neza !!!” Gusa ibi byose ntibikuraho ko buri wese yakuyemo irye cyane ko ngo “umwana w’ubwenge yumvira mu rusaku”.Ikindi nuko kujijuka,ubusirimu no gutera imbere bitandukanye cyane no kwijandika mu ngeso mbi zo kwiyambika ubusa ndetse n’ubusamanyi.Ni aha buri wese rero cyane cyane abibazaga niba koko mu by’ukuri ubusugi aribwo bugaragaza uburere bwiza bityo umupira uraherejwe haba ku babyeyi ndetse cyane cyane ku rubyiruko rushaka kwihitiramo ibyarugirira umumaro mu gihe cyo gushaka.

Daniel MUKESHIMANA/Umubavu.com



Tanga igitekerezo kuri iyi nkuru



Igitekerezo
willy Kuya 10-01-2018

Ewana Imana izamfashe inyobore kwisugi kuko ntabwo naba ntarijanditse ubusambanyi ngo nsange atari isugi dukiranuke !!!

willy Kuya 10-01-2018

Ewana Imana izamfashe inyobore kwisugi kuko ntabwo naba ntarijanditse ubusambanyi ngo nsange atari isugi dukiranuke !!!

Ngoga Kuya 10-01-2018

Nibyiza gucunga no kurinda ubusugi kubakobwa kuko ubwabo bibahesha ishema kuko ntawutaterwa ishema no gukora ibyabandi bananiwe bisubireho

Jean Paul Kuya 9-01-2018

Nibyo ariko nkuko habaho akagoroba k’ababyeyi hazajyeho urubohero rw’urubyiruko muri buri mudugudu bisuzume bagirane inama.

Emmy Kuya 9-01-2018

Ubusugi

simeon nzacahinyeretse Kuya 9-01-2018

Ntakiza kumwari nkogucunga ubusugi bwe kko iyo urongoye umugore wawe yaratakaje ubusugi mubwari bwe birababaza gusa ukarenzaho.

simeon nzacahinyeretse Kuya 9-01-2018

Ntakiza kumwari nkogucunga ubusugi bwe kko iyo urongoye umugore wawe yaratakaje ubusugi mubwari bwe birababaza gusa ukarenzaho.

Fanny Kuya 8-01-2018

Ni ukuri Imana ifate abakiri zo,ibarinde kwijandika muri ibyo byaha