Urutonde rw’abakinnyi 15 bazitabira Tour du Rwanda 2017

Ishyirahamwe ry’Umukino w’Amagare mu Rwanda (FERWACY), ryashyize hanze urutonde rw’abakinnyi 15 bazaserukira igihugu muri Tour du Rwanda 2017, igiye kuba ku nshuro ya cyenda kuva yagirwa mpuzamahanga mu 2009.

Abakinnyi 15 bazahagararira u Rwanda batoranyijwe mu bagera kuri 28 bari bamaze ibyumweru bitatu mu mwiherero mu Kigo Africa Rising Cycling Center kiri i Musanze ndetse mu mpera z’icyumweru gishize banakinnye amasiganwa abiri harimo iryavaga i Nyanza risorezwa i Rubavu n’iryavaga Rubavu ryerecyeza i Musanze, mu rwego rwo gukaza imyitozo.

Umutoza w’Ikipe y’Igihugu, Sterling Magnell, afatanyije n’abatoza andi makipe arimo Club Benediction de Rubavu na Les Amis Sportifs de Rwamagana, ni bo basohoye urutonde ntakuka rw’abazakina muri iri rushanwa rizatangira tariki 12 risozwe ku ya 19 Ugushyingo 2017.

Mu bakinnyi bahamagawe mu Ikipe y’Igihugu y’u Rwanda harimo Nsengimana Jean Bosco, Uwizeye Jean Claude, Byukusenge Patrick, Ukiniwabo René Jean Paul na Munyaneza Didier.

Muri Club Benediction de Rubavu hahamagawe Uwizeyimana Bonaventure, Gasore Hategeka, Ruberwa Jean, Nduwayo Eric na Nizeyimana Alex mu gihe Club Les Amis Sportifs de Rwamagana yitabaje Hakiruwizeye Samuel, Rugamba Janvier, Mfitumukiza Jean Claude, Jimmy Uwingeneye na Tuyishimire Ephraim.

Kuri uru rutonde ntihagaragara amazina akomeye arimo Twizerane Mathieu, Karegeya Jérémie na Biziyaremye Joseph.

Ndayisenga Valens umaze kwegukana iri siganwa inshuro ebyiri ntabwo azakinira u Rwanda kuko ari mu ikipe ya Tirol Cycling Club yo muri Autriche ari nayo azakinira kimwe na Areruya Joseph wabaye uwa kane umwaka ushize na Mugisha Samuel wabaye umukinnyi uzamuka kurusha abandi, ntibazakinira u Rwanda kuko bamaze kuba abakinnyi ba Dimension Data yo muri Afurika y’Epfo.

Amakipe 17 arimo ayo muri Afurika no ku yindi migabane niyo azitabira iyi Tour du Rwanda 2017, izatwara akayabo ka miliyoni 400 y’amafaranga y’u Rwanda mu gutegura no guhemba.

Imihanda izakoreshwa muri Tour du Rwanda 2017

- Tariki 12 Ugushyingo 2017 : Prologue, Kigali-Kigali (3,3Km)

- Tariki 13 Ugushyingo 2017 : Etape ya mbere : Kigali-Huye (120,3 Km)

- Tariki 14 Ugushyingo 2017 : Etape ya kabiri : Nyanza-Rubavu (180 km)

- Tariki 15 Ugushyingo 2017 : Etape ya gatatu : Rubavu-Musanze (Bazabanza kuzenguruka umujyi wa Rubavu inshuro enye, 95kms)

- Tariki 16 Ugushyingo 2017 : Etape ya kane : Musanze–Nyamata i Bugesera (121km)

- Tariki 17 Ugushyingo 2017 : Etape ya gatanu : Nyamata-Rwamagana+Kuzenguruka umujyi wa Rwamagana (93.1 km)

- Tariki 18 Ugushyingo 2017 : Etape ya gatandatu : Kayonza-Kigali (Bazasoreza Stade ya Kigali banyuze mu muhanda w’amabuye wo kwa Mutwe) (86.3 km)

- Tariki 19 Ugushyingo 2017 : Etape ya karindwi : Kigali-Kigali (120 km)

Urutonde rw’amakipe azitabira Tour du Rwanda 2017 :

Amakipe y’ibihugu yo muri Afurika :

• Ikipe y’Igihugu y’Ibirwa bya Maurice
• Ikipe y’Igihugu ya Ethiopie
• Ikipe y’Igihugu ya Érythrée
• Ikipe y’Igihugu ya Maroc
• Ikipe y’Igihugu ya Algérie

Andi makipe akina amarushanwa Mpuzamahanga :

• Dimension Data For Qhubeka (Afurika y’Epfo)
• Tirol Cycling Team (Austria)
• Team Illuminate (USA)
• Bike Aid (u Budage)
• Dukla Banska Bystrica (Slovakia)
• Interpro Cycling Academy (Japan)

Andi makipe asanzwe

• Ikipe ya Lowestrates.Com (Canada)
• Ikipe ya Haute-Savoie/Auvergne Rhône-Alpes (u Bufaransa)
• Ikipe ya Kenya Riders Safaricom (Kenya)



Tanga igitekerezo kuri iyi nkuru



Igitekerezo