Tour du Rwanda : Areruya Joseph yisubije umwenda w’umuhondo

Nyuma yuko umunya-Eritrea, Eyob Metkel, ukinira Ikipe ya Dimension Data for Qubeka yo muri Afurika y’Epfo, yegukanye agace ka kane ka Tour du Rwanda kavaga i Musanze kerekeza i Nyamata mu Karere ka Bugesera ku ntera y’Ibilometero 120,5, byatumye Areruya Joseph basanzwe bakinana asubirana umwenda w’umuhondo.

Uyu musore utajya wiburira muri buri Tour du Rwanda kuko ataha yegukanye uduce twinshi, yanikiye bagenzi be agera i Nyamata ari kumwe n’Umunyarwanda Areruya Joseph basanzwe bakinana, binatuma bakuramo ibihe byari byarashyizwemo n’umusore ukomoka mu Busuwisi, Pellaud Simon bityo Areruya yisubiza umwenda w’umuhondo.

PNG - 1.1 Mo
Eyob Metkel, ukinira Ikipe ya Dimension Data for Qubeka yo muri Afurika y’Epfo, wegukanye agace ka kane ka Tour du Rwanda kavaga i Musanze kerekeza i Nyamata


Kuri uyu wa Kane abasiganwa 68 muri 73 batangiye Tour du Rwanda 2017, bahagurutse i Musanze berekeza i Bugesera aho banyuze Nyabugogo - Kicukiro na Gahanga basoreza mu Mujyi wa Nyamata ku ntera y’ ibilometero 120,5.

PNG - 1 Mo
Areruya Joseph wisubije umwenda w’umuhondo afashijwe na mugenzi we bakinana muri Afurika y’Epfo.


Ni ku nshuro ya mbere amagare yari agiye kugera mu Karere ka Bugesera muri Tour du Rwanda kuva yaba mpuzamahanga mu myaka icyenda ishize gusa Rwanda Cycling Cup iheruka kuhahagurukira mu gace ka Nyamata-Muhanga ndetse na Shampiyona y’Igihugu ya 2016 niho yabereye.

PNG - 270.5 ko
Tour du Rwanda irimo guhangana kudasanzwe

Dore uko abakinnyi batanu ba mbere bakurikirana mu gace ka Musanze-Nyamata :

1. Eyob Metkel : 2:52’54”

2. Areruya Joseph : 2:52’54”

3. Nsengimana Jean Bosco : 2:53’23”

4. Kangangi Suleiman : 2:53’49”

5. Byukusenge Patrick : 2:55:09”

Pellaud Simon ukinira Team Illuminate yo muri Leta Zunze Ubumwe za Amerika wari ufite umupira w’umuhondo, yasoje ari uwa 33 akoresheje 2:55’27” aba mbere bamusize iminota ibiri n’amasegonda 33.

Kubera ko yarushaga Areruya Joseph umunota umwe ku rutonde rusange byatumye Areruya ahita aba uwa mbere ashyiramo n’ikinyuranyo cy’umunota n’amasegonda 33.

Daniel MUKESHIMANA/Umubavu.com



Tanga igitekerezo kuri iyi nkuru



Igitekerezo