Saint Valentin igiye gusanga abasore bafite abakunzi muri Miss Rwanda bigunze

Ni nyuma yuko ubuyobozi bwa Rwanda Inspiration Back Up itegura igikorwa cyo gutora Nyampinga w’u Rwanda, butangarije abasore bafite abakunzi bari mu mwiherero I Nyamata ko batemerewe kubonana nabo ku munsi w’abakundana uzwi nka Saint Valentin.

Nkuko bisanzwe, buri mwaka ku itariki ya 14 Gashyantare ya buri mwaka, isi yose cyane cyane Abakirisitu, yizihiza umunsi wa mutagatifu Valentin ufatwa nk’urugero rukomeye rw’abakundana.

Umunsi w’abakundana (Saint Valentin ) uba ari umunsi ukomeye ku bakundana, aho buri umwe agerageza uko ashoboye akereka umukunzi ko urwo amukunda rutari urw’agahararo. Bamwe batanga impano zitandukanye yewe hari n’abemera bagatera ivi kuri uwo munsi basaba abakunzi babo ko bazabana by’iteka ryose.

Kuri uyu wa Gatatu tariki ya 14 Gashyantare 2018, nibwo biteganyijwe ko umunsi wa Saint Valentin wa 2018 uzizihizwamu gihe abakobwa 20 beza baturutse mu Ntara zitandukanye z’igihugu n’umugi wa Kigali bari mu mwihererero i Nyamata aho bahataniye ikamba rya Miss Rwanda 2018, ibi bikaba bigiye gutuma bamwe mu basore bafitemo abakunzi bigunga kuri uyu munsi nyuma yo gukurirwa inzira ku murima n’abashinzwe gutegura irushanwa rya Nyampinga ko bidashoboka ko bazabonana bakishimana.
N’ubwo benshi muri aba bakobwa baterura ngo bavuge ko bafite abakunzi, ntibyaba ari igitangaza ko babafite dore ko hari n’amakuru avuga ko hari bamwe mu basore bafite abakunzi muri iri rushanwa ndetse banasigaye babamamaza ngo bazabashe kwegukana ikamba rya Nyampinga w’igihugu muri uyu mwaka wa 2018.
Mu kiganiro n’itangazamakuru, Vanessa Mpogazi ushinzwe itangazamakuru muri Miss Rwanda 2018, yavuze ko aba bakobwa batemerewe kubonana n’abakunzi babo ku munsi w’abakundana kuko ngo uretse nabo, nta n’uwundi muntu wemerewe kubasura.
Yagize ati “ntabwo bazabonana n’abakunzi babo kuko iyo bari mu mwiherero nta muntu uba wemerewe kubasura. Bashobora kuzagira umunsi mukuru hagati yabo ariko ntabwo hazaza abantu bo hanze.”
Abakobwa bahatanira ikamba rya Nyampinga w’u Rwanda batangiye umwiherero kuwa Gatanu tariki ya 09 Gashyantare 2018, bakaba bari guhabwa amasomo atandukanye agamije kubategura kuzahatana ku munsi wa nyuma w’irushanwa uteganyijwe ku wa 24 Gashyantare 2018 muri Kigali Convention Center.

Daniel MUKESHIMANA/Umubavu.com



Tanga igitekerezo kuri iyi nkuru



Igitekerezo