Safi ngo siwe uzarota Judith we agarutse I Rwanda ngo yongere kumukoraho

Ni nyuma yuko Niyibikora Safi na Niyonizera Judith bambikanye impeta ku itariki ya 01 Ukwakira 2017 nyuma Judith agahita yerekeza mu gihugu cya Canada aho yari asanzwe aba aho amaze ukwezi kurenga bituma umugabo we avuga ko amukumbuye ngo amukoreho.

Tariki ya 01 Ukwakira 2017 nibwo Safi Madida yashyingiwe mu buryo bwemewe n’amategeko y’u Rwanda ko yemeye kubana akaramata na Niyonizera Judith ndetse ku mugoroba w’uwo munsi hakanaba ibirori byo gusaba no gukwa byabereye mu mujyi wa Kigali ku musozi wa Rebero.

PNG - 1 Mo
Byari ibyishimo ku itariki ya 01 Ukwakira 2017 hagati ya Judith na Safi


Nyuma y’uko Safi Madiba akoze ubukwe yahise yerekeza muri Zanzibar mu kwezi kwa buki nyuma aza kunyura mu gihugu cya Tanzaniya aho yahuriye n’umuhanzi wo muri Wasafi ya Diamond bemeranywa gukorana n’indirimbo izasohoka muri Mutarama umwaka utaha wa 2018.

PNG - 1 Mo
Niyonizera Judith na Safi Madiba basezeranye kubana akaramata ku itariki ya 01 Ukwakira 2017
PNG - 1.2 Mo
Nyuma y’ubukwe bwabo, Judith na Safi bahise berekeza kurya ubuzima muri Zanzibar


Nta kwezi gushize Safi Madiba atangaje ko yavuye mu itsinda rya Urban boyz ndetse yatangiye no gukora umuziki ku giti cye. Ibi byaje no kwemezwa na Humble Jizzo mu kiganiro Urban boyz yagiranye n’itangazamakuru ku italiki ya 10 Ugushyingo 2017.

Ikintu gikomeje gutangaza abantu ni uburyo umuziki wa Safi Madiba wakiranywe ubwuzu ndetse mu gihe gito amaze atangaje ko yiyomoye ku itsinda rya Urban boys afite abafana benshi bamushyigikiye.

Ibi bigaragarira ku ndirimbo "got it" yafatanyije na Meddy uburyo abantu bakomeje kuyishimira ubona ko ari ibintu biha imbaraga uyu muhanzi ushimwa na benshi kubera ijwi rye ryihariye.

Bamwe bibazaga niba iyi ndirimbo Safi Madiba yarayihimbiye umugore we ariko yabihakanye avuga ko atari we.

Nk’uko yabitangarije Radio 10 kuri iki cyumweru Safi Madiba yemeje ko iyi ndirimbo yayihimbye ari uko ahuye na Meddy bayandika bagendeye ku byiyumviro nk’abahanzi bagize.

Yakomeje avuga ko ari ubutumwa bugenewe buri mufana wese kandi ko nawe yishimira intambwe amaze gutera mu gihe gito amaze akora wenyine.
Intambwe Safi amaze gutera ishimangirwa n’uburyo ku italiki ya 25 yegukanye igihembo cy’umuhanzi w’umwaka muri Smart Service Awards.

PNG - 897.1 ko
Safi yakiriye igihembo cye ari kumwe n’abo muri ’The Mane’


Iki gihembo yari agihanganiye n’abandi bahanzi bakomeye mu Rwanda nka Christopher, Bruce Melody, Tom Close, na Knowless.

Safi kandi yavuze ko umugore we uri muri Canada bavugana barebana buri munsi binyuze mu buryo bw’ikoranabuhanga. Gusa avuga ko akumbuye cyane kumukoraho kuko aricyo kibura.

Hashize iminsi mike Safi asinye amasezerano y’imyaka itatu na Label ya "The Mane" izamufasha mu bijyanye n’umuziki we.

Safi cyo kimwe n’iyi nzu nshya ya "The Mane" bavuga ko intego ari ukuzamura umuziki we bakawugeza ku rwego mpuzamahanga.

Safi yinjiye muri ’The Mane’ asangamo umuhanzikazi Marina uri kuzamuka cyane muri iyi minsi wasinyemo imyaka 10 yose.

Daniel MUKESHIMANA/Umubavu.com



Tanga igitekerezo kuri iyi nkuru



Igitekerezo