Perezida Kagame yavuze ikimuri ku mutima ku isezererwa rya Arsenal muri Europa League

Nyuma yuko ikipe ya Arsenal isezerewe mu irushanwa rihuza amakipe yatwaye ibikombe iwayo ku mugabane w’u Burayi(Europa League), Perezida Kagame ntiyahishe imbamutima ze kuri iyi kipe asanzwe akunda aho yavuze ko kimwe n’abandi bakunzi b’iyo kipe, akumbuye kuyibona mu bihe byiza itwara ibikombe.

Learn how to Thrive

Mu ijoro ryo kuri uyu wa kane nibwo ikipe ya Arsenal yagombaga guhura na Atletico Madrid mu mukino wo kwishyura muri Europa League, umukino warangiye itsinzwe igitego 1-0 mu gihe mu mukino ubanza wa ½ cy’irangiza bari banganyije igitego 1-1 bityo ikipe ya Arsenal ihita isezererwa muri iri rushanwa rukumbi yari isigayemo muri uyu mwaka w’imikino.

Isezererwa rya Arsenal niryo ryatumye Perezida Kagame yandika ku rukuta rwe ku rubuga nkoranyambaga Twitter, asa n’ugaragaza ko kuba aho Arsenal yambariye inkindi irimo kuhambarira ubucocero ari umugayo kuri beneyo, ariko kandi ngo hakenewe impinduka ikipe akunda ikongera kuba ikipe itwara ibikombe nk’uko yahoze.

PNG - 388.3 kb
Imbamutima za Perezida Kagame nyuma y’isezererwa rya Arsenal akunda muri Europa League


Yagize "Ni byo koko hari hakenewe impinduka muri Arsenal, ariko izabaye mbona atari zo zari zikenewe. Amahirwe kuri buri wese bireba. Gusa twari dukeneye ko Arsenal isubira mu bihe byayo byiza, ikongera ikaba mu makipe ya mbere afite n’umukino mwiza."

Perezida Kagame yakomeje avuga ko atanyuzwe na gato n’uburyo Arsenal isoje uyu mwaka w’imikino, ndetse akaba atanishimira uburyo idaheruka igikombe.

Ati "Icyo navuga ku ikipe yanjye nkunda ya Arsenal nuko nk’ikipe ubusanzwe igira umukino mwiza ndetse ikaba ifite umutoza mwiza nka Arsene Wenger, itagakwiye gusoza gutya uyu mwaka w’imikino."

"N’ubwo umutoza agiye ndetse n’ibikombe bikaba byarabuze, ikibazo nkibona kuri ba nyiri ikipe. Gusa ku bwanjye sindacika intege ndacyari umufana w’akadasohoka wa Arsenal."

Arsenal iheruka kuba ubukombe mu mwaka wa 2003/2004, ubwo yegukanaga igikombe cya shampiyona (ari na cyo iheruka) iciye agahigo ko gusoza imikino yose ya Premier League idatsinzwe umukino n’umwe.

Muri uyu mwaka w’imikino iviriyemo muri ½ cy’irangiza muri Europa League, ikaba iri ku mwanya wa gatandatu (6) ku rutonde rwa shampiyona n’amanota 57, ikaba isigaje imikino ine, ari nay o Umutoza Arsene Wenger asigaje muri iyi kipe ubundi agahita atandukana na yo.

PNG - 941.5 kb
Perezida Kagame asanzwe ari umufana ukomeye w’ikipe ya Arsenal
PNG - 564.6 kb
Ku itariki ya 03 Gicurasi muri 2014, nibwo Tony Adams wahoze ari Kapiteni wa Arsenal yahaye Perezida Kagame umwenda w’iyi kipe isanzwe imuba ku mutima

Daniel MUKESHIMANA@Umubavu.com


Travel for Free!


Tanga igitekerezo kuri iyi nkuru



Igitekerezo