Nyuma yo gutsindwa na APR FC y’abakinnyi 10, Karekezi yaciye amarenga yo kuva muri Rayon Sports

Hashingiwe ku magambo yanditse kuri Instagram ye nyuma yo gutsindwa n’ikipe ya APR FC yakinaga ari abakinnyi 10 gusa, umutoza wa Rayon Sports Karekezi Olivier, kuri ubu utishimiwe na gato n’abafana kubera gutsindwa na mukeba ubugira kabiri, yaciye amarenga ko ashobora kuva ku butoza bw’iyi kipe dore ko n’abafana bashakaga kumusagarira nyuma y’umukino.

Learn how to Thrive

Kuri iki cyumweru tariki ya 25 Gashyantare 2018 ni bwo ikipe ya Rayon Sports yongeye gutsindwa na APR FC mu mukino w’ikirarane w’umunsi wa 10 wa Shampiyona warangiye ari igitego 1-0.

Nyuma y’uyu mukino, bamwe mu bafana bari bafite umujinya w’umuranduranzuzi, bituma hitabazwa Polisi kugira ngo Umutoza Karekezi Olivier atavaho asagarirwa.

Nyuma y’ibi byose, Umutoza Karekezi Olivier yashyize ifoto y’umwana we ku rukuta rwe rwa Instagram, yandikaho amagambo y’Icyongereza, avuga tugenekereje mu kinyarwanda agira ati “Bidatinze ndongera guhura n’umuryango wanjye”.

PNG - 658 kb
Ubu butumwa Karekezi yanditse kuri Instagram ye nibwo buri gushingirwaho bivugwa ko yaba yaciye amarenga ko ashobora kuva muri Rayon Sports dore ko umuryango avuga ashaka utabarizwa mu Rwanda


Ibi byatumye benshi bibaza niba atari amarenga y’uko uyu mutoza ashobora kuba agiye kwisubirira muri Suwede ahari umuryango we.

Karekezi yaje muri Rayon Sports yizeza kwegukana ibikombe bikinirwa mu Rwanda ariko by’umwihariko agafasha iyo kipe kugera mu matsinda ya CAF Champions League cyangwa aya CAF Confederations Cup.

Umwuka utari mwiza hagati ya Karekezi Olivier na bamwe mu bafana ba Rayon Sports umaze iminsi, ariko warushijeho kuba mubi ubwo yanganyirizaga i Kigali igitego 1-1 na LLB S4A FC y’i Burundi mu ijonjora ry’ibanze mu irushanwa rya CAF Champions League.

Icyakora byabaye amahire ubwo yajyanaga ikipe ya Rayon Sports gukina umukino wo kwishyura, akabasha gutsinda igitego 1-0 cyatumye abona itike yo kujya mu cyiciro gikurikiyeho, aho agomba guhura na Mamelodi Sundowns yo muri Afurika y’epfo yanegukanye igoikombe cy’iryo rushanwa mu mwaka ushize.

Icyakora Umutoza Karekezi ashobora kutageza kuri uwo mu kino uteganyijwe ku itariki ya 10 Werurwe akiri umutoza wa Rayon Sports bitewe n’uko umwuka utari mwiza urimo kugenda urushaho kuba mubi nyuma yo gutsindwa na APR FC ubugira kabiri.

Kugeza ubu Rayon Sports ya Karekezi iri ku mwanya wa 4 n’amanota 18 ku rutonde rw’agateganyo rwa Shampiyona, ikarushwa amanota 5 na Kiyovu Sports ya mbere, ikarushwa 3 na AS Kigali ya Kabili, mu gihe irushwa amanota 2 na APR FC ya gatatu.

Karekezi yageze muri Rayon mu kwezi kwa 7, 2017 avuye muri Sweden aho yatozaga ikipe y’abana batarengeje imyaka 17, atangirana ibihe byiza yegukana igikombe cy’irushanwa Agaciro Development Fund, akurikizaho icya Super Cup yatsindiyeho APR FC ibitego 2-0.

Icyakora ubuzima bwe muri Rayon Sports bwaje gusa n’ubuhinduka ubwo Umutoza wari umwungirije, Ndikumana Hamad Katauti yitabaga Imana kuwa 15 Ugushyingo 2017, uwo munsi Karekezi Olivier na we agahita atabwa muri yombi agafungwa ibyumweru hafi bitatu.

Daniel MUKESHIMANA/Umubavu.com


Travel for Free!


Tanga igitekerezo kuri iyi nkuru



Igitekerezo