Migi watangiye imyitozo muri APR FC agiye kujya ahembwa akayabo

Mugiraneza Jean Baptiste uzwi ku izina ‘Migi’ wari umaze imyaka igera kuri itatu akina hanze y’u Rwanda, yamaze gutangira imyitozo mu ikipe ya APR FC n’ubundi yahozemo kuri ubu akaba agiye kujya ahembwa arenga miliyoni y’amanyarwanda.

Uyu mukinnyi wamaze gushyira umukono ku masezerano y’umwaka n’igice akinira ikipe y’Ingabo z’u Rwanda, kuri uyu wa Mbere yatangiye imyitozo na bagenzi be yabereye i Remera ku kibuga cya Ferwafa.

PNG - 659.4 ko
Nyuma yo kumvikana na APR FC Migi yatangiranye imyitozo imbaraga


Migi wabaye umwe mu bakinnyi beza ba APR FC mu kibuga hagati mbere y’uko yerekeza muri Azam FC yo muri Tanzania na Gor Mahia yo muri Kenya aho atigeze agira ibihe byiza, aje yiyongera kuri mugenzi we Iranzi Jean Claude na we wamaze kugaruka nyuma yo kugira ibihe bishaririye haba muri Slovakia na Zambia aho yari amaze amezi atandatu adakina.

Nyuma y’imyitozo itangazamakuru ryashatse kuganira na Migi kugira ngo agire icyo atangariza abafana be n’aba APR FC muri rusange gusa ririnda kugira icyo avuga ndetse n’umutoza Jimmy Mulisa ntiyemera kuvuga.

APR FC yamaze kumvikana na Gor Mahia ku byo igomba kwishyura ku masezerano y’uyu mukinnyi itari icyifuza kugumana. Gusa Migi yari yatinze kugaragara mu myitozo kuko we atari yakumvikanye n’ubuyobozi ku bijyanye n’umushahara.

Bivugwa ko yemerewe agera ku madolari ya Amerika 1500 ku kwezi nk’umushahara (asaga miliyoni n’ibihumbi 200 mu mafaranga y’u Rwanda).

PNG - 697.1 ko
Migi agiye kujya ahembwa arenga miliyoni y’amanyarwanda

Daniel MUKESHIMANA/Umubavu.com



Tanga igitekerezo kuri iyi nkuru



Igitekerezo