Messi yeruye avuga ko nta mubano azigera agirana na Cristiano Ronaldo

Cristiano Ronaldo ukinira ikipe ya Ral Madrid yo muri Espagne na Lionel Messi wo muri Argentine ariko agakinira ikipe ya FC Barcelona, ni abakinnyi badakunze gucana uwaka ahanini biturutse ku kuba akenshi buri mwaka ari bo baba bahanganye mu itoranya ry’ugomba kuba umukinnyi mwiza wahize abandi. Kuri ubu Lionel Messi yongeye kubyutsa intambara y’amagambo nyuma y’aho abwiye Cristiano ko agomba kwibagirwa ko bazigera bagirana umubano yewe no mu gihe bazaba batagikina ruhago.

Lionel Messi akomeza vuga ko abona nta bushuti buzigera bushoboka hagati ye na Ronaldo ashingiye ku kuba n’ubusanzwe ntabwo basanzwe bagirana biturutse ku guhangana kwabo dore ko bigenda bikanagera no mu bafana babo ugasanga ari urugamba kumenya uhiga undi bitewe n’uwo buri wese aba afite ku mutima we.

Cristiano Ronaldo na Lionel Messi ni abakinnyi bidashidikanywaho ko ari bo bifatiye iki kinyejana dore ko bombi bibitseho ibihembo by’imipira ya Zahabu 10 (Ten Ballon d’Or awards) kurusha abandi bose babayeho byumwihariko bakinira muri Shampiyona imwe yo muri Espagne (La Liga Santander), uretse igihembo kimwe Ronaldo yaherewe muri Manchester United mu mwaka wa 2008.

Lionel Messi umaze gutsindira ikipe ye ya Barcelona ibitego bigera kuri 369 mu mikino isaga 400, yavuze ko abona umubano we na Cristiano udashoboka bitewe nuko no mu minsi yabo ya mbere ntawo bigeze kugirana.

Gusa akomeza avuga ko mu buzima busanzwe nta kibazo basanzwe bagirana uretse gusa gusuhuzanya mu gihe bahuriye mu birori byo gutoranya umukinnyi wahize undi cyane cyane mu gutanga umupira wa Zahabu.

PNG - 955 ko
Ubusanzwe Messi na Ronaldo nta kibazo bafitanye
PNG - 716 ko
Icyakora aba bagabo bombi basuhuzanya akenshi iyo bahuriye mu birori byo gutoranya uwahize undi

Messi mu magambo ye aganira na World Soccer Magazine. ati “sinzi niba wenda tuzaba inshuti mu gihe tuzaba tutagikina umupira. Nta mubano udasanzwe dusanzwe tugirana, tubonanira gusa mu birori byo guhemba uwitwaye neza kurusha undi ndetse ni nabwo tuvugana. Gusa nta kibazo dufitanye ariko nta n’umubano udasanzwe dufitanye”.

PNG - 682.1 ko
Lionel Messi udakunze gucana uwaka na mugenzi we Cristiano kubera guhora bahanganye mu kibuga


Aya magambo aje mu gihe Angel Di Maria wigeze gukina muri Real Madrid akinana na Cristiano, yaherukaga gutangaza ko Lionel Messi ari we mukinnyi abona mwiza kurusha abandi bose ku isi ashingiye ahanini ku buryo yitwaye mu mikino y’igikombe cy’u Burayi cya 2016 nubwo atabashije kucyegukana.

Angel Di Maria w’imyaka 32 kuri ubu ukinira ikipe ya Paris Saint Germain, yavuze ko Cristiano Ronaldo ari umukinnyi mwiza ariko ko kuri we atamurutisha Lionel Messi.

Avugana na TyC Sports, Di Maria yagize ati “Messi azahora ari we mukinnyi mwiza iteka ryose. Niwe mukinnyi mwiza mbona buri mwaka w’imikino. Ronaldo nawe ni umukinnyi mwiza ariko Messi we si uwo kuri uyu mubumbe turiho, sinabona uburyo mvuga Messi, buri gihe agaragaza itandukaniro !”.

PNG - 701.9 ko
Di Maria we abona nta wundi mukinnyi ku isi wamurutira Messi


Lionel Messi yatangiye gukinira ikipe ya Barcelona mu mwaka wa 2004 akiri umwana aho yakinnye imikino 32 agatsindamo ibitego 11.

PNG - 964.2 ko
Messi agerageza kwitanga uko bishoboka kose kugira ngo aheshe ikipe ye intsinzi


Ari kumwe na Barcelona, bamaze gutwara ibikombe bigera kuri 8 bya Shampiyona ya Espagne (La Liga Santander) kuva atangiye gukinira iyi kipe mu buryo bweruye mu mwaka w’imikino wa 2004/05.

Lionel Messi kandi ari kumwe na Barcelona, bamaze kwegukana irushanwa ry’amakipe yabaye aya mbere iwayo rizwi nka Champions League inshuro 4, 3 bya UEFA Super Cup na 3 bya FIFA Club World Cup hatabariwemo ibihembo uyu mukinnyi yagiye yegukana ku giti cye.

Tubibutse ko kuri ubu ikipe ya FC Barcelona ariyo ikomeje kuyobora urutonde rw’agateganyo rwa Shampiyona ya Espagne n’amanota 59, igakurikirwa na Atletico Madrid ifite amanota 52, mu gihe mukeba wayo Real Madrid ihagaze ku mwanya wa 4 n’amanota 42 gusa. Uretse ibi kandi aya makipe yombi aracyari mu mikino ya Champions League aho Real itegerejwe mu Bufaransa kuri uyu wa gatatu yisobanura hagati yayo na Paris Saint Germain nayo ifite inyoya y’iki gikombe. Barcelona nayo itegereje kuzisobanura na Chelsea mu cyumweru gitaha. Iki gikombe cya Champions League gifitwe na Real Madrid inshuro ebyiri zose ziheruka, amateka atarakorwa n’indi kipe yose.

Daniel MUKESHIMANA/Umubavu.com



Tanga igitekerezo kuri iyi nkuru



Igitekerezo